20 Ə̂në tshə sə pə kə tegbɔ kumu ye gâ pâ nə kɔ, ə̈bə̈ trawaya nə̂ Əyïlingû bʉ̂ gâ tə̂ ye lə ə̈lü ə pa: «Jozafu, ätä Davidə, awa ndə kə pa bə za əwɔ zə də Marə̂ ma əbə ma ne. Mbrə ə̂në əgblə nə ə̂në tshə zâ əndu ye kɔ nâ tə̂ äwä Âgbɔ̂ Yîrə̂.

5 Bale, trawaya nə zâ əpʉ ə pâ kə ayashe nə ə pa: «E-e, awa mä e mä ne, mbrə ə̂në mə wusə̂ nə ə pa e sə kə pra Jezu ə̂në əndje kû ətshə gâ ala masheyɔ gâ ye kɔ. 6 Tshə sə sə kotəye ne, tshə shê gâ ye mata ə̂në tshə pâ ndə nə gâ ye kɔ. E nä gâ əmə ə wü ətshe ə̂në əndje zâ ətshə shô gâ tʉ gâ tə̂ nə kɔ.

53 Bə wu ənə̂ zə ə pa mə lï lï ndə kə yu Abä əmə ndə kə pa tshə wla atrawaya nə̂ Ndjapä ə̂në əndje ngba tə bandanə kɔ kə əmə katshä katshä səye, ndə kə pa əndje ma awlra mbrə əmə ne a?

30 Bale, trawaya nə̂ Ndjapä nə pâ kə ətshə ə pa: «Marə̂, awa katə̂ kə mbrə bə gâ ye, mbrə ə̂në Ndjapä mâ ə̂rɔ̂tə̂ ye kə əbə gâ ye. 31 Bə sə kə za əndu ə zu əgblə koshe ə̂në bə sə kə dji əɨrɨ ye Jezu.

10 Bale, trawaya nə̂ Ndjapä nə pâ kə əndje ə pa: «E kätə̂ awa gâ ye; mbrə ə̂në mə sə də ə̂rɔ̂ əpʉ ndə kə pa kə e, ə̂në tshelə azü nɔ̂ ə sə də âgbɔ̂ ə̂rû tə̂ nə je kɔ.

14 «A mbë Ndjapä ə̂në tshə sə mâ ngâ lafɔ kɔ, â blatshe sə̈ pâ ashɔ lə ə̂grû tə̂ azü ə̂në Ndjapä yində əndje kɔ.»Atrawaya nə̂ Ndjapä mâ tə̂ əndje kə aawobata andalimi

10 Äwä bale ndje, mə pa kə e: ə̂rû sə kə sə lə takpa tə̂ atrawaya nə̂ Ndjapä mbrə əyïnyaka kpiabale ə̂në tshə tshi äwä angbrɔ kə mbrə tə̂ ye tʉ kɔ.»

10 Alɔ ə̂në əndje dâka pə kə lishi gâ lafɔ ə̂në Jezu ô na ye tə̂ nə kɔ, alabə̈ akoshe bishi ə̂në əndje yî aə̂mbî aləba kɔ wûtu gâ ngotə̂ əndje 11 ə pâ kə əndje ə pa: «Azü əgɔ Galile, e daka pə kə ka kotə̂ye ə lishi gâ lafɔ mbrə yekɔ? Jezu ə̂në tshə âfɔ lə takpa tə̂ e ə ô na ye mâ lafɔ kɔ, tshə sə kə gu nə kʉ rə mata ə̂në e wû ətshə ə̂në tshə ô na ye kɔ.»

1 Kə yi tə̂ e tə alaye azü däka pə lə takpa tə̂ e. 2 Ə̂sə̂ kə bata ayirə rö e rö ne: alabə̈ azü ə̂në əndje sə kə ko ayirə nə gâ ndə əndje kɔ, əndje kô atrawaya nə̂ Ndjapä gâ lə aanda nə̂ əndje ə wûsə̂ nə wû ne.

1 Kədə mə sə kə pa kəmə aama aəgɔ nə̂ azü də ənə̂ atrawaya nə̂ Ndjapä, â yində angâ əmə də̂ azü yi ne, mə sə mata ə̂kprô ə̂në ə kɨ kɔ wala mata ə̈bə̈ kowɔ ə̂në ə kɨ ngbatshe kɔ.

16 Â ə lï ndə kə pa a wusə̂ nə ə pa lengerə əpʉ lɔsu nə sə tə âgbɔ̂ ərə, əpʉ nə kə də̂:

Kristə nə mâ tə̂ ye gashu tə əzü kə azü nɔ̂,

Âgbɔ̂ Yîrə̂ yîsə̂ nə ə pa tshə sə tə ə̂rɔ̂ əzü,

atrawaya nə̂ Ndjapä wû ətshə.

Əndje mʉ̂ əpʉ ye lə takpa tə̂ amarä ə̂në əndje sə sə tə Ajuwufu ne kɔ,

azü tshepashɔ zâ lɔsu əndje kə ətshə,

əndje zâ ətshə o na ye gâ lafɔ lə ə̂yî.

16 Mbrə ə̂në, tə̂ alɔ ə̂në əndje ta râwâ, ə̂në tshema ə̈bə̈ makɔndji nə̂ atrawaya kɨ, ə̂në ängɔ̈ nə̂ Ndjapä sə kə kɨ nə, Âgbɔ̂ Əyïngerə də ə̂tə̂ ye, sə kə afɔ mâ lafɔ ə jerə, bale, azü ə̂në əndje zâ lɔsu əndje kə Kristə nə gâ ye â tshû kɔ, əndje sə kə she angbʉlînə. 17 Mandânə, əzə̂ də̂ asorô nə, ə̂në a daka pə ənə̂ əzə̂ je kɔ, Ndjapä sə kə ko əzə̂ də aəndje äwä bale ə o də əzə̂ mâ lafɔ lə andra ndə kə pa a te Âgbɔ̂ Əyïngerə nə lə əyi, â rəkɔ, a sə kə sə alɔnɔ̂ gâ ngotə̂ Âgbɔ̂ Əyïngerə nə.

5 Rəkɔ, əzü ə̂në tshə sɔ lagbanga, tshə yi aə̂mbî aləba je. Mə sə sə kə gba tshelə əɨrɨ ye lə fraka sorô alɔ bale ne, mə sə kə yerɔ ətshə kpro də əɨrɨ ye ətshi Abä əmə də ətshi atrawaya nə̂ ye.

38 Mbrə ə̂në mə wusə̂ nə mâ tə̂ lɔsu əmə ə pa wala kuzu wala sorô wala atrawaya nə̂ Ndjapä wala aawlra tshelafɔ wala tshe kpəsəye wala tshe dambʉ wala aawlra ə̂në ə sə gâ pâ aərə kɔ, 39 wala aawlra tshelə əyi wala aawlra djoko tʉ wala ə̈bə̈ ata ərə ə̂në Ndjapä mbrə̂ gâ ye kɔ lï lï ndə kə pa ə sɔ əzə̂ gashe tə̂ kə yində əzə̂ ə̂në Ndjapä nə yində əzə̂ lə Jezu Kristə, Âgbɔ̂ Əyïngerə nə̂ əzə̂ kɔ bale ne.