1 Kədə mə sə kə pa kəmə aama aəgɔ nə̂ azü də ənə̂ atrawaya nə̂ Ndjapä, â yində angâ əmə də̂ azü yi ne, mə sə mata ə̂kprô ə̂në ə kɨ kɔ wala mata ə̈bə̈ kowɔ ə̂në ə kɨ ngbatshe kɔ. 2 Bale, mə â sə̂ kəmə də âkrâ kə pa ndəma Ndjapä â wusə̂ alengerə aəpʉ nɔ̂ â wûsə̂ aərə kəmə nɔ̂, kədə mə sə̂ kəmə də lɔsu ə̂në ə gi akaga gashe kɔ, â bale mə yində angâ əmə də̂ azü yi ne, mə sə sə tə ə̈bə̈ ərə bale ne. 3 Bale, kədə mə krû kəmə tshelə aərə nə̂ əmə nɔ̂ tə̂ alayïəyo â kâ kəmə tə̂ əmə gâ ala əwo, â yində angâ əmə də̂ azü yi ne, mə sə sə kə sɔtə̂ ə̈bə̈ ərə bale mandânə ne.

4 Əzü ə̂në tshə yində bəngâ nə, tshə sə kə ru tshelə ye, əzü ə̂në tshə yində bəngâ nə, tshə sə kə ma ə̂rɔ̂ nə kə ətshə, tshə sə sə kə za tshelə ye gâ tə̂ ye ne. Əzü ə̂në tshə yində bəngâ nə, tshə sə sə kə da əkro ye ne, tshə sə sə kə ma gao ne, 5 tshə sə sə kə mbrə ərə gana ne, tshə sə sə kə pra ərə kʉ mbrə ətshə ne, tshə sə sə kə ma əkɔ ne, tshə sə sə kə bata əpʉ tə̂ lɔsu ye ne. 6 Tshelə ye sə sə kə mɔ tə̂ əmbrʉ ərə ne, bale tshelə ye sə kə mɔ tə̂ djatra əpʉ. 7 Tshə sə kə gba tshelə aəpʉ nɔ̂ lə akrɔ bəngâ nə, tshə sə kə yində aəpʉ nɔ̂ də lɔsu ye, tshə sə kə za lɔsu ye gâ pâ aəpʉ nɔ̂, tshə sə kə ru ə ru lə aərə nɔ̂.

8 Kə yi tə̂ sə sə kə nglɔ nə bale ne. Kə pa ndəma Ndjapä ə nglɔ ndə ə̈bə̈ alɔ je, âkrâ kə pa aama aəgɔ ə nglɔ je, kə wusə̂ ərə ə nglɔ je. 9 Mbrə ə̂në kʉtə̂ alabə̈ aərə də̂ a wusə̂ nə kɔ â kʉtə̂ alabə̈ aəpʉ nə̂ Ndjapä də̂ a pa ndəma nə kɔ. 10 Bale, alɔ ə̂në ərə ə̂në ə lî nɔ̂ gâ ye kɔ kə wutu, ərə ə̂në ə sə tə mate ərə kɔ sə kə nglɔ nə.

11 Alɔ ə̂në mə dâka pə tə əgblə, mə pâ əpʉ mata əgblə, mə têgbɔ kumu əmə mata əgblə â aəpʉ lɔsu əmə sə̂ mata ənə̂ əgblə. Bale, ə̂në mə mbrə̂ koshe gâ ye kɔ, mə tshî aərə nə̂ aneshe tʉ gbrä gâ ye. 12 Kpəsəye, a sə kə wu ərə a pa də lə tatra, a wu ərə nə wu tə ə̂rɔ̂nə ne. Bale, ndə ə̈bə̈ alɔ, a wu Ndjapä je, ala əzə̂ də aəndje sə kə she gâ tə̂ nə. Kpəsəye, mə wusə̂ kʉtə̂ alabə̈ aərə, bale ndə ə̈bə̈ alɔ, mə wusə̂ ərə nɔ̂ je mata ə̂në Ndjapä wûsə̂ əmə gâ ye kɔ.

13 Rəkɔ, kpəsəye, aərə vəta səye daka pə je: əpʉ lɔsu də kə za lɔsu gâ pâ ə̈bə̈ ərə gâ ndə kə yi tə̂. Bale, âgbɔ̂ ərə nə prââ kə də̂ kə yi tə̂.