1 Ə̈bə̈ ərə kru əmə ndə kə pa mə mbrə ərə mbrə ndə tshelə əmə ne a? Mə sə sə tə əzü-awla ne a? Mə wû Jezu Âgbɔ̂ Əyïngerə wû ne a? E sə sə tə ərə tshemandâ kosəra ə̂në mə mbrə̂ kə Âgbɔ̂ Əyïngerə kɔ ne a? 2 Kədə mə sə sə tə əzü-awla lə ala ə̂dû azü ne, bale ənə̂ e, mə sə tə əzü-awla ngâ lə ala e. Mbrə ə̂në, e sə tə ərə ə̂në ə sə kə yisə̂ nə gashu ə pa mə mbrə̂ kosəra nə̂ əmə tə əzü-awla nə̂ Âgbɔ̂ Əyïngerə ngâ gâ ye.

3 Əpʉ nə̂ əmə ə̂në mə pa kə azü ə̂në əndje za əpʉ gâ lə kumu əmə kɔ kə səye: 4 ä lï lï ənə̂ ä ndə kə pa ä zɨ rəgo ə ndju ərə ne a? 5 Mə lï ənə̂ əmə lï ndə kə pa mə za ə̈bə̈ kobɔ tə əwɔ əmə ə na ana də ətshə mata ə̂në ə̂dû azü-awla də alaye Âgbɔ̂ Əyïngerə gâ ndə Sefasə ə mbrə kɔ ne a? 6 Wala kʉtə̂ əmə də Barənabasə də̂ ä lï ənə̂ ä ndə kə pa ä mbrə kosəra ka ə sɔtə̂ rəgo a? 7 Rəkɔ, əde alɔ bale kə mbrə kosəra trugu â yɔ ərə də ngendja tshelə ngbede nə̂ ye? Əde kə lu aayɔ vinyə gâ lə kəndɨ nə̂ ye â zɨ ə̂lê nə zɨ ne? Əde kə bata ayarə â ndju ə̂ngû angɔ əndje ndju ne?

8 Kʉ lə əzü tə̂ əmə də̂ mə pa əpʉ səye rəkɔ a? Âgbɔ̂ əpʉ ndje pa əpʉ səye pa ne a? 9 Mbrə ə̂në əndje tâ gâ lə âgbɔ̂ əpʉ nə̂ Mayïzə ə pa: «Bə sə sə kə i ama pagra ə̂në tshə sə kə do tshelə aə̂lê rəgo kɔ gâ tə̂ nə ne.»* Əpʉ apagra də̂ Ndjapä nə pâ ndə nə kɔ a? 10 Wala ə də̂ kʉ mbrə əzə̂ də̂ tshə pâ əpʉ səkɔ ne a? Ngâ, mbrə əzə̂ də̂ əndje tâ əpʉ səkɔ gâ lə fraka kɔ. Əzü ə̂në tshə sə kə djo kəndɨ, tshə lï ndə kə pa tshə djo kəndɨ nə ə za lɔsu ye gâ pâ ərə ə̂në tshə sɔtə̂ nə je kɔ. Əzü ə̂në tshə sə kə da aə̂lê rəgo, tshə lï ndə kə pa tshə da, ə za lɔsu ye gâ pâ ə̂sə̂ ənə̂ ye ərə nə ə̂në tshə sɔtə̂ nə je kɔ. 11 Ə̂në ä lû aərə Ndjapä mbrə e gâ ye kɔ, kədə ä ko alabə̈ aərə tə̂ e, mata kə kɔ ə̂lê rəgo lə kəndɨ, ə sə tə ərə ə̂në ä ko ə ro pâ nə gâ ye a? 12 Kədə alabə̈ azü lï ndə kə pa əndje mbrə rə gâ tə̂ e, ə də̂ ä də̂ kə lï ndə kə pa ä ko alabə̈ aərə nə̂ e ə ro ə̂dû azü nə ne a?

Bale, ä mbrə̂ ərə mbrə̂ rə ne. Bale, ä sə kə ru tshelə ä lə aərə nɔ̂ ndə kə pa ə̈bə̈ ərə kânga äwä kânga tə̂ Ə̂rɔ̂ Əpʉ nə̂ Kristə nə ne. 13 E wusə̂ nə wu ə pa azü ə̂në əndje mbrə kosəra nə̂ Ndjapä lə Anda Ndjapä kɔ, əndje sɔtə̂ rəgo nə̂ əndje sɔ kʉ lə Anda Ndjapä nə ne a? Â azü ə̂në əndje mbrə kosəra kə to əkrɔ pâ gblaka kɔ, sɔtə̂ ənə̂ əndje ərə nə sɔ lə aərə ə̂në əndje ko gâ pâ gblaka nə kɔ ne a? 14 Äwä bale ndje, Âgbɔ̂ Əyïngerə zâ ama ə pa azü ə̂në əndje sə kə mʉ Ə̂rɔ̂ Əpʉ kɔ, əndje sɔtə̂ aərə kʉ tə̂ äwä kə mʉ Ə̂rɔ̂ Əpʉ nə.*

15 Bale, əmə, mə mbrə̂ ərə mbrə̂ Lïndə̂ əpʉ səkɔ ne. Mə tâ fraka səye tâ ndə kə pa e za äwä kə əmə kanika mə mbrə rə ne. Mbrə ə̂në, mə yî kəmə ə ro ndə kə pa mə tshu! Əzü bale sə sə kə za əpʉ ərə səye tə̂ əmə ə̂në ə sə tə əpʉ kə lʉ əmə tə̂ nə kɔ ne. 16 Kə mʉ Ə̂rɔ̂ Əpʉ nə sə sə tə ərə ndə kə pa mə da əkro əmə tə̂ nə ne, mbrə ə̂në ə sə tə ərə ə̂në əndje zâ ama kə əmə ndə kə pa mə mbrə nə kɔ, â əyo gâ pâ əmə kədə mə mʉ Ə̂rɔ̂ Əpʉ nə mʉ kə azü ne. 17 Kədə əmə də ə̂tə̂ əmə kə yî kəmə ndə kə mbrə kosəra səkɔ, əndje sə̂ kəmə kə piyi əmə ə pi. Bale, ə̂në ə sə tə ərə ə̂në əndje zâ ama ə zâ kə əmə ndə kə mbrə nə kɔ, mə sə kə mbrə kʉtə̂ kosəra nə ə̂në əndje zâ kə əmə kɔ. 18 Rəkɔ, ərə kə piyi əmə də nə kə də̂ yea? Ə tə nə kə də̂ kə mʉ Ə̂rɔ̂ Əpʉ nə tə ambanə, ə sɔ sɔtə̂ aərə ə̂në kə mʉ Ə̂rɔ̂ Əpʉ nə za äwä nə kə əmə ndə kə sɔtə̂ nə kɔ ne.

19 Ə̂në ə̈bə̈ əzü kânga äwä kânga tə̂ əmə ndə kə mbrə ə̈bə̈ ərə ne kɔ, bale mə mbrə̂ tə̂ əmə tə kanga nə̂ azü nɔ̂ ndə kə pa mə sɔtə̂ azü ə̂në əndje ngba ə ngba ə ro pâ nə kɔ mbrə Kristə. 20 Lə takpa tə̂ Ajuwufu, mə sə mata Juwufu ndə kə pa mə sɔtə̂ Ajuwufu nə mbrə Kristə nə. Lə takpa tə̂ azü ə̂në əndje sə kə bata âgbɔ̂ əpʉ nə̂ Mayïzə kɔ, mə sə mata əndje. Bale, əmə də ə̂tə̂ əmə, mə sə sə tshekudu âgbɔ̂ əpʉ nə ne, gu də̂, mə mbrə rə ndə kə pa mə sɔtə̂ azü ə̂në əndje sə tshekudu âgbɔ̂ əpʉ nə kɔ mbrə Kristə nə. 21 Lə takpa tə̂ azü ə̂në əndje wusə̂ âgbɔ̂ əpʉ nə̂ Mayïzə nə wu ne kɔ, mə sə mata əndje, ndə kə pa mə sɔtə̂ əndje mbrə Kristə nə. Gu də̂, mə sə sə tə ambanə tə̂ âgbɔ̂ əpʉ nə̂ Ndjapä ne, bale mə sə tshekudu âgbɔ̂ əpʉ nə̂ Kristə nə. 22 Lə takpa tə̂ azü ə̂në əndje mɔ ə mɔ tə̂ lɔsu əndje kɔ, mə mɔ ə mɔ ndje ndə kə pa mə sɔtə̂ əndje mbrə Kristə nə. Mə mbrə̂ tə̂ əmə tə ərə nɔ̂ lə takpa tə̂ azü nɔ̂ ndə kə pa mə she alabə̈ əndje ngâ lə kuzu. 23 Mə sə kə mbrə aərə sə̂ nɔ̂ mbrə Ə̂rɔ̂ Əpʉ nə kanika mə sɔtə̂ ə̂sə̂ ənə̂ əmə aə̂rɔ̂ aərə nə lə nə.

24 E wusə̂ nə wu ə pa azü ə̂në əndje kpe ärɔ̈ pâ lɔndɔ ə̂rû kɔ, kʉtə̂ əzü bale kə sɔtə̂ ərə ärɔ̈ nə ne a? Rəkɔ, e kpë ärɔ̈ nə ndə kə pa e sɔtə̂ ərə ärɔ̈ nə. 25 Aawowla awlra sə kə ru tshelə əndje tə̂ adongo aərə nɔ̂ lə kə gamba tə̂ əndje. Əndje, əndje sə kə mbrə rə ndə kə pa əndje sɔtə̂ kpɔtɔ piyi ə̂në ə lo lo ne kɔ. Ənə̂ əzə̂, əzə̂ mbrə rə ndə kə pa əzə̂ sɔtə̂ kpɔtɔ ngerə ə̂në ə ndɨ ndɨ tə̂ ərə ne kɔ. 26 Rəkɔ, əmə, mə kpe ärɔ̈ nə, mə kpe kpe təbu təbu ne. Mə sə tə awodu kutubɔ ə̂në mə sə sə kə da tshelə əyi ne. 27 Bale, mə sə kə gi əyo tə̂ akwa əmə ə ru tə̂ əmə ngbatshe ndə kə pa əndje gi əmə gi gashe mandânə ə̂në mə yîsə̂ əpʉ nə kə angâ əmə gâ ye kɔ ne.