1 Alaye əmə, ənə̂ əmə, mə lï lï ndə kə pa, leme-e, mə pâ əpʉ kə e mata azü ə̂në əndje sə də Yîrə̂ Ndjapä nə kɔ ne. Bale, mə pâ əpʉ kə e mata azü tshepashɔ səye, mata aə̂ngê aneshe tə̂ äwä əpʉ nə̂ Kristə nə. 2 Mə zâ də̂ ə̂ngû angɔ kə e, mə zâ zâ də̂ rəgo ə̂në ə gbɔ ə gbɔ kɔ kə e ne, mbrə ə̂në e lï lï ndə kə pa e kânga kəmə tshelə e tə̂ nə ne. E lï lï də nə ndje kpəsəye ne, 3 mbrə ə̂në e daka pə alɔnɔ̂ tə azü tshepashɔ səye. Ə̂në e daka pə kə za tshelə e gâ tə̂ angâ e, ə daka pə kə pʉ nə lə takpa tə̂ e kɔ, e sə sə pə tə azü tshepashɔ səye ne a? E sə sə kə mbrə tə̂ e tə ə̂dû azü ne a? 4 Alɔ ə̂në ə̈bə̈ əzü lə takpa tə̂ e pa: «Əmə, mə də̂ əzü nə̂ Palɔ!» Ə̈bə̈ ata nə pa: «Əmə, mə də̂ əzü nə̂ Apolɔsə!» E sə kpî tə̂ ə̂dû azü nə a?

5 Rəkɔ, Apolɔsə nə sə tə əde? Palɔ nə sə tə əde? Ä sə tə aamba alayïkosəra nə̂ Ndjapä, ə̂në tə̂ äwä ä, e zâ lɔsu e kə Kristə nə, â əzü bale bale mbrə̂ kosəra ə̂në Âgbɔ̂ Əyïngerə zâ kə ətshə kɔ. 6 Əmə, mə shî ərə nə, Apolɔsə wûlu ə̂ngû gâ tə̂ nə, bale Ndjapä kə mbrə̂ â ə gêrə kɔ. 7 Rəkɔ, ə də̂ əzü nə ə̂në tshə shî ərə nə kɔ, wala ətshə nə ə̂në tshə wûlu ə̂ngû nə gâ tə̂ nə kɔ kə sə̂ â sə tə âgbɔ̂ ərə nə ne, bale Ndjapä nə ə̂në tshə mbrə̂ â ərə nə gêrə kɔ kə sə tə âgbɔ̂ ərə nə. 8 Əzü nə ə̂në tshə shî ərə nə gâ ndə əzü ə̂në tshə wûlu ə̂ngû nə gâ tə̂ nə kɔ, əndje sə äwä bale, â Ndjapä ə piyi əzü bale bale ə lï də kosəra nə̂ ye je. 9 Mbrə ə̂në ä-ä də a-Ndjapä nə sə kə mbrə kosəra äwä bale â e sə tə kəndɨ nə̂ Ndjapä nə.

E sə ndje tə anda ə̂në Ndjapä nə mbrə̂ kɔ. 10 Lïndə ə̂rɔ̂tə̂ Ndjapä ə̂në tshə mâ kə əmə kɔ, mə kô aə̈nü anda nə tɔ gâ lafɔ gâ ye, tə ə̂rɔ̂ awombrə aanda â ə̈bə̈ ata əzü sə kə mbrə anda nə gâ pâ nə. Bale, əzü bale bale gbɔ ndə äwä kosəra kə mbrə anda nə gâ pâ ə̈nü anda nə səkɔ. 11 Mbrə ə̂në ə̈bə̈ əzü bale lï lï ndə kə pa tshə za ə̈bə̈ ata ə̈nü anda nə tɔ gâ lafɔ kpî tə ənə̂ ətshinə ə̂në əndje zâ tɔ gâ ye kɔ ne, ə̂në ə tə nə kə də̂ Jezu Kristə nə kɔ. 12 Kədə əzü mbrə anda gâ pâ ə̈nü anda səkɔ də lɔrə wala də ngbengewle ngendja, wala də aəkpʉ âgbɔ̂ ndogɔ, wala də ayɔ, wala də ebe, wala də güsü, 13 əndje sə kə yisə̂ kosəra nə̂ əzü bale bale gashu lə ala azü nɔ̂ tə̂ alɔ âgbɔ̂ ngbanga. Mbrə ə̂në tə̂ alɔ nə səkɔ, lə əwo də̂ əndje sə kə yisə̂ aərə nə gashu lə ala azü â əwo nə kə sə̂ kə yisə̂ nə ə pa kosəra nə̂ əzü bale bale tɔ gâ tə̂ ə̈bə̈ ərə wala ə tɔ tɔ gâ tə̂ ə̈bə̈ ərə bale ne. 14 Kədə ə̈bə̈ əzü mbrə kosəra gâ tə̂ anda səkɔ, â əwo ju ju kosəra nə̂ ye nə ne, Ndjapä ə piyi ye je. 15 Bale, kədə əwo kə ju kosəra nə̂ ə̈bə̈ əzü, əzü nə sə sə kə sɔtə̂ ə̈bə̈ ərə ne. Ətshə, Ndjapä sə kə she ətshə lə kuzu, bale tshə sə kə sə mata əzü ə̂në tshə tɔ̂ la əwo.

16 E wusə̂ nə wu ə pa e sə tə Anda Ndjapä nə â Yîrə̂ Ndjapä sə tə̂ lɔsu e ne a? 17 Kədə əzü kə ndɨ Anda Ndjapä nə, Ndjapä nə sə kə ndɨ ətshə. Mbrə ə̂në Anda Ndjapä nə sə kpî â anda nə kə də̂ e nə kɔ.

18 Əzü bale fɔ̈ frɔ̈ tə̂ ye də ə̂tə̂ ye ne. Kədə ə̈bə̈ əzü lə takpa tə̂ e kə wu tə̂ ye tə awowusə̂ âdâ ərə tə̂ äwä tshepashɔ səye, tshə dö tə̂ ye tə əyïyirə̈ kanika ə sə ngâ tə awowusə̂ âdâ ərə nə. 19 Mbrə ə̂në kə wusə̂ âdâ ərə tshepashɔ səye sə tə ərə yïrə̈ lə ala Ndjapä. Fraka nə̂ Ndjapä pâ ndje əpʉ ə pa: «Ndjapä ko aawowusə̂ âdâ ərə lə əpʉ afrɔ nə̂ əndje də ə̂tə̂ əndje.»* 20 Fraka nə̂ Ndjapä nə pâ kwatəndje ə pa: «Əyïlingû wusə̂ aəpʉ lɔsu aawowusə̂ âdâ ərə, tshə wusə̂ nə ə pa ə sə tə aamba aəpʉ.»* 21 Rəkɔ, əzü bale dä dä əkro ye mbrə ə̈bə̈ əzü ne, mbrə ə̂në aərə nɔ̂ sə tə ənə̂ e: 22 ə də̂ kəmə Palɔ nə wala Apolɔsə nə, wala Sefasə, wala tshepashɔ, wala sorô, wala kuzu, wala aərə tshe kpəsəye, wala aərə tshe də əmbʉ. Aərə nɔ̂ sə tə ənə̂ e, 23 bale e-e, e sə tə ənə̂ Kristə â Kristə nə sə tə ənə̂ Ndjapä.