1 Kɔratə 8

Əpʉ gâ pâ adɔ̂ngɔ̂ ə̂në azü tɔ̂ də əkrɔ kə aamba andjapä

1 Gâ pâ əpʉ dɔ̂ngɔ̂ aagia ə̂në azü ə to də əkrɔ kə aamba andjapä kɔ, a wusə̂ nə nɔ̂ ə pa: «Kə wusə̂ ərə wû əzə̂ nɔ̂ gâ ye», mata ə̂në e sə kə pa nə kɔ. Bale, mbrə kə wusə̂ ərə səkɔ, əzü sə kə da əkro ye, kandää, kə yi tə̂ gbɔgbɔ aangbɔ. 2 Kədə ə̈bə̈ əzü kə wu ə pa əne wusə̂ ə̈bə̈ ərə, tshə te te pa ə wusə̂ ərə nə mata ə̂në tshə lï ndə kə wusə̂ nə kɔ ne. 3 Bale, kədə ə̈bə̈ əzü kə yində Ndjapä, Ndjapä wûsə̂ ye gâ ye.

4 Rəkɔ, əzü lï ndə kə pa tshə zɨ dɔ̂ngɔ̂ ə̂në əndje tô də əkrɔ kə aamba andjapä gâ ye kɔ a? A wusə̂ nə ə pa ə̈bə̈ amba ndjapä sə sə je pâ ashɔ ne â Ndjapä sə kʉ kpiabale. 5 Kədə, də banda əpʉ, andjapä sə je mâ lafɔ, ndje pâ ashɔ, bale aərə ə̂në azü e «andjapä» də «aâgbɔ̂ alayïngerə» kɔ ngba ə ngba. 6 Bale, ənə̂ əzə̂, Ndjapä sə kʉ kpiabale, tə Abä ə̂në aərə nɔ̂ tô mâ ndə ye je kɔ â a sə də sorô mbrə ətshə. Â Âgbɔ̂ Əyïngerə sə kʉ kpiabale, ə̂në tshə də̂ Jezu Kristə nə ə̂në aərə nɔ̂ wû tsheshu tə̂ äwä ye, â a sə də sorô tə̂ äwä ye kɔ.

7 Bale, azü nɔ̂ wusə̂ əpʉ səye wu ne. Â alabə̈ azü nə daka pə tə̂ äwä mandʉ ərə ə̂në əndje mâ leme-e gâ tə̂ aamba andjapä nə kɔ, əndje daka pə kə zɨ adɔ̂ngɔ̂ ə̂në əndje tô də əkrɔ kə aamba andjapä nə gâ ye kɔ. Alɔ ə̂në əndje zɨ adɔ̂ngɔ̂ səkɔ, mâ tə̂ lɔsu əndje, əndje wu ə pa alane sə sə mvo lə ala Ndjapä ne, mbrə ə̂në əndje te te pa ə ne ne. 8 Bale, ə də̂ rəgo də̂ kə gi əzə̂ trö də Ndjapä nə ne. Kədə a zɨ zɨ ne, ə̈bə̈ ərə bale sə sə kə yu tə̂ əzə̂ ne, â kədə a zɨ, a sə sə kə sɔtə̂ ə̈bə̈ ərə bale lə nə ne.

9 Bale, ala e gbɔ̈ kanika azü ə̂në əndje daka pə kə mɔ nə kɔ, əndje te te tə̂ äwä kə mbrə ərə nə̂ e ndə tshelə e nə kɔ ne. 10 Mbrə ə̂në kədə ə̈bə̈ əzü ə̂në tshə mɔ ə mɔ kɔ kə wu əbə, əbə ə̂në bə wûsə̂ ərə gâ ye kɔ â bə sə gâ tʉ ndə kə zɨ ərə lə anda aamba andjapä, mâ tə̂ lɔsu ye, ətshə ə̂në tshə mɔ ə mɔ kɔ, tshə sə sə kə ma əgo ndə kə pa tshə zɨ dɔ̂ngɔ̂ ə̂në əndje tô də əkrɔ kə aamba andjapä gâ ye kɔ ne a? 11 Bale rəkɔ, mbrə kə wusə̂ ərə nə̂ zə nə, əzü ə̂në tshe mɔ ə mɔ kɔ sə kə djingli äwä, aye zə ə̂në Kristə nə tshû mbrə ətshə gâ ye kɔ. 12 Alɔ ə̂në e sə kə mbrə marä tə̂ nyaka rə kə alaye e â sə kə mbrə äkä tə̂ lɔsu əndje, əndje ə̂në əndje mɔ ə mɔ kɔ, e mbrə nyaka gâ tə̂ Kristə gâ ye. 13 Âdârə ə̂në, kədə ə̈bə̈ rəgo kə mbrə, â aye əmə te, mə sə sə kə zɨ dɔ̂ngɔ̂ kwatə̂mə bale ne kanika aye əmə nə te te ne.