1 Alɔ ə̂në ə̈bə̈ əzü lə takpa tə̂ e sə də əpʉ də ə̈bə̈ ngâ nə, mbrə yekɔ də̂ tshə na də əpʉ nə gâ tshekudu azü ə̂në əndje wusə̂ Ndjapä wu ne kɔ? Â na na də nə gâ ətshi azü nə̂ Ndjapä ne kɔ? 2 E wusə̂ nə wu ə pa azü nə̂ Ndjapä kə wa ngbanga gâ pâ azü tshepashɔ səye je ne a? Bale, kədə e kə wa ngbanga gâ pâ azü tshepashɔ səye je, e lï lï ndə kə pa e wa ngbanga aya aəpʉ ne a? 3 E wusə̂ nə wu ə pa əzə̂ wa ngbanga gâ pâ atrawaya nə̂ Ndjapä je ne a? Â sə mə rə, ə mbrə atâ â əzə̂ wa ngbanga aəpʉ nə̂ azü tshe kpəsəye wa ne? 4 Bale, alɔ ə̂në e sə də ngbanga gâ pâ marä tə̂ aəpʉ rə, mbrə yekɔ də̂ e ko də̂ azü ə̂në əndje sə sə tə ə̈bə̈ ərə lə ala Laglizə ne kɔ ndə kə pa əndje kanika əndje wa tshelə ngbanga nə̂ e nə? 5 Mə pa rə kâ gana nə ngɔ e. Rəkɔ, lə takpa tə̂ e, ə̈bə̈ əzü ə̂në tshə sə tə awowusə̂ âdâ ərə, ə̂në tshə lï ndə kə pa tshə wa tshelə ngbanga lə takpa tə̂ alaye nə kɔ sə sə je ne a? 6 Bale, ə̈bə̈ aye əzü na də aye nə də ngbanga gâ ətshi azü ə̂në əndje wusə̂ Ndjapä wu ne kɔ!

7 Ngâ, e tê gâ ye ə̂në e sə də aəpʉ ngbanga lə takpa tə̂ e kɔ. Alɔ ə̂në azü mbrə əmbrʉ ərə kə e, mbrə yekɔ də̂ e yində nə yi ə ru tshelə e ne kɔ? Mbrə yekɔ də̂ e katə̂ azü nə ka əndje ko aərə nə̂ e tə̂ e ne kɔ? 8 Bale, e-e, kə mbrə əmbrʉ ərə kə azü â ko aərə tə̂ angâ e kɔ, â alaye e də̂ e mbrə rə kə əndje kɔ a! 9 E wusə̂ nə wu ə pa azü ə̂në əndje mbrə aəmbrʉ aərə kə angâ əndje kɔ sə sə kə li Əgɔngerə nə̂ Ndjapä ne a? E frɔ̈ tə e frɔ̈ ne: alayïə̂trû, wala aawovrɔ aamba andjapä, wala awosho də alawɔ azü də aläkɔ̈ azü wala akoshe ə̂në əndje sho də angâ əndje də akoshe kɔ, 10 wala alayïangba, wala aawoyində aərə tshepashɔ ngbatshe, wala aawondju ərə, wala alayïəpʉ, wala aawoko aərə nə̂ azü də awlra, ə̂sə̂ əndje sə sə kə sə lə Əgɔngerə nə̂ Ndjapä ne. 11 Alabə̈ azü lə takpa tə̂ e sə̂ leme-e rə. Bale, Ndjapä yûtu nyaka nə̂ e gâ ye. Tshə kô e kpî mbrə ətshə gâ ye, ə mbrə̂ e tə aə̂rɔ̂ azü lə ala ye gâ ye də əɨrɨ Âgbɔ̂ Əyïngerə Jezu Kristə, ndje tə̂ äwä Âgbɔ̂ Yîrə̂ nə̂ Ndjapä nə̂ əzə̂.

12 Alabə̈ azü sə kə pa nə ə pa: «Əndje zâ äwä kə əmə ndə kə pa mə mbrə ərə nɔ̂.» Banda əpʉ, bale, ərə nɔ̂ sə sə tə ə̂rɔ̂nə mbrə əzü ne. «Əndje zâ äwä kə əmə ndə kə pa mə mbrə ərə nɔ̂.» Banda əpʉ mə pa kə e, mə sə sə kə katə̂ äwä kə ə̈bə̈ ərə ndə kə pa mə sə tə kanga nə bale ne. 13 Alabə̈ e nə sə kə pa əpʉ ndje ə pa: «Rəgo sə mbrə tshelə â tshelə sə mbrə rəgo.» Banda əpʉ, bale mə pa kə e, Ndjapä ə ndɨ rəgo nə də tshelə nə nɔ̂ je. Bale, tshekotə̂ əzü sə sə mbrə əpʉ ə̂trû ne. Tshekotə̂ əzü sə mbrə Âgbɔ̂ Əyïngerə, â Âgbɔ̂ Əyïngerə nə sə mbrə tshekotə̂ əzü. 14 Bale, Ndjapä ə̂në tshə shê Âgbɔ̂ Əyïngerə nə gâ ye kɔ, tshə she əzə̂ ndje tə̂ äwä awlra nə̂ ye je.

15 E wusə̂ nə wu ə pa tshekotə̂ e sə tə aərə tshekotə̂ Kristə nə ne a? Rəkɔ, mə sə kə ko aərə tshekotə̂ Kristə nə ndə kə pa mə do tə aərə tshekotə̂ əmbrʉ yashe a? Bale ne. 16 E wusə̂ nə wu ə pa koshe ə̂në tshə sho də əmbrʉ yashe, əndje də ətshə sə tə tshekotə̂ kʉ bale ne a? Mbrə ə̂në Fraka nə̂ Ndjapä pâ əpʉ ə pa: «Əndje bishi sə kə do tə̂ əndje kʉ tə əzü kpiabale.»* 17 Bale, əzü ə̂në tshə tɔ popo Âgbɔ̂ Əyïngerə nə, əndje də ətshə sə kʉ bale lə yîrə̂.

18 E kpë ngrʉ̂ tə̂ əpʉ ə̂trû. Ə̂dû nyaka ə̂në əzü ə mbrə kɔ, ə sə gashu tə̂ akwa ye. Bale, əzü ə̂në tshə za tə̂ ye gâ tə̂ əpʉ ə̂trû nə, tshə mbrə nyaka gâ tə̂ akwa ye də ə̂tə̂ ye. 19 Wala e wusə̂ nə wu ə pa tshekotə̂ e sə tə anda Âgbɔ̂ Yîrə̂ ə̂në tshə sə lə e kɔ, ə̂në Ndjapä zâ ətshə kə e kɔ ne a? E sə sə tə ərə nə̂ e də ə̂tə̂ e ne. 20 Mbrə ə̂në Ndjapä yɔ̂ e də əgerə ndogɔ gâ ye. Rəkɔ, e mbë Ndjapä də əndu e nɔ̂.