1 Gâ pâ əpʉ aâkrâ ə̂në Âgbɔ̂ Yîrə̂ ə ko kə azü kɔ, alaye, mə yində nə ə pa e wusə̂ əpʉ gâ pâ nə.

2 E wusə̂ nə ə pa alɔ ə̂në e dâka pə leme-e tə azü ə̂në e wûsə̂ Ndjapä wû ne kɔ, azü gbətɔ e tə̂ əmbrʉ äwä na nə gâ tə̂ aamba andjapä ə̂në əndje pa tshema əndje pa ne kɔ. 3 Âdârə ə̂në mə sə kə pa nə kə e ə pa: əzü bale lï lï ndə kə pa tshə pa əpʉ tə̂ äwä Yîrə̂ Ndjapä ə pa: «A drä Jezu!» ne, â əzü bale lï lï ndə kə pa tshə pa əpʉ ə pa: «Jezu sə tə Âgbɔ̂ Əyïngerə!», kədə Âgbɔ̂ Yîrə̂ nə kə za əpʉ nə za gâ lə ama ye ne.

4 Adongo aâkrâ nə ngba ngbatshe, bale kʉtə̂ Yîrə̂ nə bale kə sə̂ â to ərə nə kɔ. 5 Adongo akosəra nə ngba ngbatshe, bale kʉtə̂ Âgbɔ̂ Əyïngerə nə bale kə sə̂. 6 Adongo aäwä kə mbrə kosəra nə ngba ngbatshe, bale kʉtə̂ Ndjapä nə bale kə mbrə aərə nə nɔ̂ tə̂ äwä azü nɔ̂ kɔ. 7 Kandää, lə əzü bale bale, Yîrə̂ nə sə kə mbrə kosəra tə̂ äwä âkrâ, mbrə ə̂rɔ̂ ərə mbrə ə̂dû angâ nə nɔ̂. 8 Mbrə ə̂në, kə ə̈bə̈ əzü, Yîrə̂ nə zâ kə pa əpʉ tə̂ äwä kə wusə̂ âdâ ərə, kə ə̈bə̈ ata nə, kʉtə̂ Yîrə̂ nə bale zâ əpʉ kə wusə̂ ərə kə ətshə. 9 Kə ə̈bə̈ ata əzü nə kpî, kʉtə̂ Yîrə̂ nə zâ âkrâ lɔsu kə ətshə; kə ə̈bə̈ əzü nə, kʉtə̂ Yîrə̂ nə zâ âkrâ kə grɔ də arəka tə̂ azü kə ətshə. 10 Kʉtə̂ Yîrə̂ nə zâ âkrâ kə mbrə aərə ə̈lü kə ə̈bə̈ əzü, ə zâ âkrâ kə pa ndəma Ndjapä kə ə̈bə̈ ata nə. Tshə zâ âkrâ kə yerɔ kpro tshelə takpa tə̂ ərə nə̂ Âgbɔ̂ Yîrə̂ də ərə nə̂ aafrɔ ayirə̂ kə ə̈bə̈ əzü, ə zâ kə pa aama aəgɔ kpî kpî kpî kə ə̈bə̈ ata əzü nə. Tshə zâ kə ə̈bə̈ əzü nə kə pa ndəma aəpʉ də aama aəgɔ səkɔ. 11 Kʉtə̂ Yîrə̂ nə kpiabale kə mbrə aərə sə̂ nɔ̂ kɔ, ə kru tshelə aâkrâ nə kpî kpî kpî tə̂ əzü bale bale mata ə̂në tshelə ye yində nə kɔ.

12 Əndu əzü sə kʉ bale â bale, aərə tshekotə̂ əzü nə ngba ə ngba. Bale, ə̂në aərə tshekotə̂ əzü nə ngba ə ngba kɔ, aərə tshekotə̂ nə nɔ̂ sə kʉ tə əndu əzü bale. Kristə nə sə ndje rə. 13 Mbrə ə̂në əzə̂ nɔ̂, Ajuwufu, wala azü ə̂në əndje sə sə tə Ajuwufu ne kɔ, wala akanga, wala azü ə̂në əndje sə sə tə akanga ne kɔ, a zâ batamo kʉ lə Yîrə̂ bale ndə kə pa a mbrə tə əndu əzü kʉ bale â əzə̂ nɔ̂ ndjû kʉtə̂ ə̂ngû Yîrə̂ nə bale.

14 Rəkɔ, ə də̂ kʉtə̂ ə̈bə̈ ərə tshekotə̂ əzü bale də̂ ə sə tə əndu əzü nə ne, bale aərə tshekotə̂ nə ə̂në ə ngba ə ngba kɔ kə mbrə tə əndu əzü nə. 15 Kədə ə̈nü kə pa: «Ə̂në mə sə sə tə kəna ne kɔ, mə sə sə tə ə̈bə̈ ərə tshekotə̂ ne», bale tshə sə kə daka pə alɔnɔ̂ tə ə̈bə̈ ərə tshekotə̂ nə. 16 Bale, kədə ətu pa: «Ə̂në mə sə sə tə ala ne kɔ, mə sə sə tə ə̈bə̈ ərə tshekotə̂ ne», tshə sə kə daka pə alɔnɔ̂ tə ə̈bə̈ ərə tshekotə̂ nə. 17 Kədə əndu əzü nɔ̂ kə sə kʉ tə ala bale, əzü sə kə dji əpʉ atâ? Kədə əndu əzü nɔ̂ sə kʉ tə ətu, əzü sə kə dji tshefʉ ərə atâ? 18 Bale, Ndjapä zâ ərə tshekotə̂ əzü bale bale gâ ə̂sə̂ nə tə̂ əndu əzü mata ə̂në tshelə ye yində nə kɔ. 19 Kədə aərə tshekotə̂ nə nɔ̂ sə kʉ tə ə̈bə̈ ərə tshekotə̂ nə bale, əndu əzü nə sə sə kə sə je ne. 20 Rəkɔ, aərə tshekotə̂ ngba ə ngba â əndu əzü sə kʉ bale.

21 Ala lï lï ndə kə pa kə kəna ə pa: «Mə ma əgo zə ma ne!» Bale, kumu lï lï ndje ndə kə pa kə ə̈nü ə pa: «Mə ma əgo zə ma ne!» 22 Bale, mbrə aərə tshekotə̂ əzü ə̂në azü wu ənə̂ əndje ə pa ə gbɔ gbɔ ne kɔ də̂ əndu əzü nə sə tə sorô kɔ. 23 Aərə tshekotə̂ ə̂në a wu ənə̂ əzə̂ tə aamba aərə kɔ, a sə kə lʉ nə ngbatshe, â aənə̂ sə̂ ə̂në a sə sə kə pa ndə nə gashu lə ama əzə̂ ne kɔ, a sə kə ga ndə nə ro pâ nə. 24 Bale, ə̂dû aərə tshekotə̂ nə ə̂në azü wu ə wu kɔ, a ga ndə nə ga rə ne. Ndjapä gâmba əndu əzü ə lʉ aərə tshekotə̂ ə̂në azü lʉ lʉ ne kɔ ro pâ nə, 25 ndə kə pa tshelə ə̂grû tə̂ aərə tshekotə̂ əzü nə sɔ sɔ ne, bale əndje ga ndə angâ əndje lə ə̂grû tə̂ əndje. 26 Bale, kədə ə̈bə̈ ərə tshekotə̂ bale kə sə kə wu əyo, ə̂dû aərə tshekotə̂ nə nɔ̂ sə kə wu əyo gâ ndə ye. Kədə azü lʉ ə̈bə̈ ərə tshekotə̂ nə bale, ə̂dû aərə tshekotə̂ nə nɔ̂ sə də ə̂rû gâ ndə ye.

27 Kandää, e-e nɔ̂, e sə tə tshekotə̂ Kristə â əzü bale bale sə tə ərə tshekotə̂ ye nə. 28 Bale, Ndjapä kô azü gâ lə Laglizə rəke: azü-awla angbʉlînə, aawopandəma Ndjapä tə bishi nə, aawoyisə̂ ərə tə vəta nə. Mandânə, tshə kô azü ə̂në əndje sə də aâkrâ kə mbrə aərə ə̈lü kɔ. Gâ mandânə, tshə kô azü ə̂në əndje sə də âkrâ kə grɔ arəka tə̂ azü kɔ, də azü ə̂në əndje sə də âkrâ kə tɨ azü gâ lafɔ kɔ, də azü ə̂në əndje sə də âkrâ kə sə gâ pâ angâ əndje kɔ gâ ndə azü ə̂në əndje sə də âkrâ adongo aama aəgɔ kɔ. 29 Azü nə nɔ̂ kə sə tə azü-awla nə kɔ a? Azü nə nɔ̂ kə sə tə aawopandəma Ndjapä nə kɔ a? Azü nə nɔ̂ kə sə tə aawoyisə̂ ərə nə kɔ a? Azü nə nɔ̂ kə mbrə aərə ə̈lü nə kɔ a? 30 Azü nə nɔ̂ kə sə də âkrâ kə grɔ arəka tə̂ azü nə kɔ a? Azü nə nɔ̂ kə pa aama aəgɔ nə kɔ a? Azü nə nɔ̂ kə pa ndəma aama aəgɔ nə kɔ a? 31 E mä əgo ndə kə sɔtə̂ aâkrâ ə̂në ə rô ə̂dû nə nɔ̂ kɔ.

Bale, mə sə kə yisə̂ ə̈bə̈ ə̂rɔ̂ äwä kə e, ə̂në ə rô ə̂dû nə nɔ̂ gâ ye kɔ.