1 Alaye, mə yində nə ə pa e li tshelə e gâ pâ Ə̂rɔ̂ Əpʉ ə̂në mə mʉ̂ kə e gâ ye kɔ, ə̂në e yîndə nə gâ ye ə gbɔ də äwä nə kɔ. 2 Tə̂ äwä Ə̂rɔ̂ Əpʉ səkɔ də̂ e she lə kuzu kɔ, kədə e bata əpʉ nə mata ə̂në mə yîsə̂ nə kə e kɔ; də̂ ne, e zâ lɔsu e nə kə Ndjapä nə kʉ tə ambanə.

3 Angbʉlînə ərə ə̂në mə yîsə̂ nə kə e kə də̂ əpʉ ə̂në, əmə ndje də ə̂tə̂ əmə, mə djî gâ ye kɔ: Kristə tshû mbrə anyaka nə̂ əzə̂, mata ə̂në Fraka nə̂ Ndjapä pâ kɔ. 4 Əndje shî ətshə, tshə shê tə̂ vəta əlo nə, mata ə̂në Fraka nə̂ Ndjapä pâ kɔ, 5 â tshə wûtu gâ tə̂ Sefasə, mandânə gâ tə̂ azü-awla morofo amanə bishi. 6 Mandânə, tshə wûtu gâ tə̂ alaye ə̂në əndje rô ngbangbo mindû (500) kɔ mvrɔ, lə takpa tə̂ əndje, alabə̈ əndje nə ngbatshe daka pə tə asorô, â alabə̈ əndje tshû gâ ye. 7 Gâ mandânə, tshə wûtu gâ tə̂ Zake â mandânə, gâ tə̂ azü-awla nɔ̂.

8 Dââ, mandâ əndje nɔ̂, tshə mâ tə̂ ye kə əmə, əmə tə əzu nə. 9 Mbrə ə̂në, əmə, mə sə tə əngʉ əzü lə takpa tə̂ azü-awla nɔ̂. Mə lï lï ndə kə pa azü e əmə tə əzü-awla ne, mbrə ə̂në mə gî əyo tə̂ azü Laglizə nə̂ Ndjapä gâ ye. 10 Bale, tə̂ äwä ə̂rɔ̂tə̂ Ndjapä, mə sə tə ərə sə̂ ə̂në mə səye â ə̂rɔ̂tə̂ ye nə mbrə əmə nə sə sə tə ambanə ne. Bale, mə mbrə̂ kosəra ə rô əndje nɔ̂ gâ ye. Ə də̂ əmə də̂ kə mbrə̂ kosəra nə ne, ə̂rɔ̂tə̂ Ndjapä nə kə mbrə kosəra nə lə əmə kɔ. 11 Rəkɔ, ə də̂ kəmə əmə, wala əndje, əpʉ ə̂në ä sə kə yisə̂ nə kə azü kɔ kə sə̂ â əpʉ sə̂ də̂ e yîndə nə də lɔsu e gâ ye kɔ.

12 Kədə ä sə kə mʉ əpʉ ə pa Kristə nə shê lə takpa tə̂ akuzu gâ ye, ə mbrə atâ â alabə̈ azü lə takpa tə̂ e sə kə pa nə ə pa akuzu ə she she je ne kɔ? 13 Kədə akuzu sə sə kə she nə ne, Kristə ndje shê shê ne. 14 Bale, kədə Kristə nə kə she she ne, kə mʉ əpʉ nə̂ ä nə sə kʉ tə ambanə â kə za lɔsu e nə kə Ndjapä nə ndje sə kʉ tə ambanə. 15 Gâ pâ nə, ä sə kə sə tə azü ə̂në ä pâ əpʉ əterə də əɨrɨ Ndjapä, mbrə ə̂në ä pâ əpʉ əterə ə pa Ndjapä shê Kristə nə gâ ye. Kandää, tshə shê ətshə kəmə shê ne, kədə akuzu she she tə djatra əpʉ ne. 16 Mbrə ə̂në kədə akuzu she she ne, Kristə nə ndje shê shê ne. 17 Bale, kədə Kristə nə kə shê shê gâ ye ne, kə za lɔsu e nə kə Ndjapä nə sə tə ambanə â e daka pə lə anyaka nə̂ e. 18 Bale, azü ə̂në əndje zâ lɔsu əndje kə Kristə nə gâ ye â tshû kɔ, äwä yû tə̂ əndje gâ ye. 19 Kədə a zâ lɔsu əzə̂ gâ pâ Kristə nə kʉ mbrə sorô tshe kpəsəye, a sə tə alayïəyo ə rô ə̂dû azü nɔ̂.

20 Bale, djatra əpʉ, Kristə nə shê lə takpa tə̂ akuzu gâ ye. Tshə sə tə kumu əzü kə shê lə takpa tə̂ azü ə̂në əndje tshû gâ ye kɔ. 21 Mbrə ə̂në, äwä bale ə̂në kuzu nâ tə̂ äwä əzü bale kɔ, kə she azü nâ ndje tə̂ äwä əzü bale. 22 Bale, ə̂në azü nɔ̂ sə kə tshu nə mbrə ə̂në əndje sə tə angwa Adamə kɔ, äwä bale ndje, azü nɔ̂ sə kə sɔtə̂ sorô lə Kristə nə, 23 bale əzü bale bale kpə ə̂sə̂ ye: Kristə nə tə kumu nə, mandânə, azü nə̂ Kristə nə sə kə she nə alɔ ə̂në tshə sə kə gu nə. 24 Gâ mandânə, aərə nɔ̂ sə kə nglɔ nə, alɔ ə̂në Kristə nə sə kə za ngerə gâ lə kəna Abä də Ndjapä, mandânə ə̂në tshə lîwu awlra nɔ̂ də alayïworɔgbɔ nɔ̂ ə̂në əndje sə gâ pâ aərə nɔ̂ kɔ gâ ye. 25 Mbrə ə̂në Kristə nə lï ndə kə pa tshə sə də ngerə gâ pâ aərə nɔ̂ ʉrrr Ndjapä ko alayïkowɔ nə̂ Kristə nə nɔ̂ gâ tshekudu ə̈nü ye gâ ye kane. 26 Bale əyïkowɔ nə ə̂në tshə liwu ətshə je kɔ kə də̂ kuzu. 27 Mbrə ə̂në, Fraka nə̂ Ndjapä pâ: «Ndjapä kô aərə nɔ̂ gâ tshekudu ə̈nü ye gâ ye.»* Bale, alɔ ə̂në tshə pâ əpʉ ə pa aərə nɔ̂ sə̂ gâ tshekudu ye gâ ye kɔ, azü wusə̂ nə ə pa Ndjapä nə ə̂në tshə kô aərə nə nɔ̂ gâ tshekudu ye nə kɔ, sə sə lə nə ne. 28 Bale, alɔ ə̂në aərə nɔ̂ ə sə gâ tshekudu ye je kɔ, Əgblə nə də ə̂tə̂ ye sə kə sə gâ tshekudu Ndjapä nə ə̂në tshə kô aərə nə nɔ̂ gâ tshekudu ye nə kɔ, ndə kə pa Ndjapä sə tə ərə nɔ̂ lə azü nɔ̂.

29 Â sə sə rə ne, azü ə̂në əndje sə kə za batamo mbrə akuzu kɔ, əndje sə kə mbrə atâ a? Kədə akuzu sə sə kə she nə ngâ ne, əndje sə kə za batamo mbrə akuzu nə ndə yea? 30 Bale, əzə̂ ndje, a sə lə ama kuzu alɔnɔ̂ mbrə yea? 31 Alɔnɔ̂, mə sə lə ama kuzu, alaye, mə pa djatra əpʉ kə e, e-e ə̂në e sə tə ərə ə̂në mə sə kə da əkro əmə tə̂ nə lə kə tɔ əzə̂ popo Jezu Kristə nə, Âgbɔ̂ Əyïngerə nə̂ əzə̂ nə kɔ. 32 Kədə mə wu ərə kʉ mata azü, mə sə kə sɔtə̂ yea mandâ awlra ə̂në mə mâ də azü ə̂në əndje sə mata aəmbrʉ aagia mâ Efazə kɔ? Kədə akuzu sə sə kə she nə ne, mata ə̂në azü ə pa kɔ: «A zɨ̈ ərə ə ndjü ərə, mbrə ə̂në tshe də əmbʉ a sə kə tshu nə.»*

33 E frɔ̈ tə̂ e frɔ̈ ne: «Bə te gbɔbəngâ də aəmbrʉ azü, bə sə kə mbrə tə əmbrʉ əzü.» 34 E tëgbɔ kumu e də äwänə, ngâ, e mbrə̈ nyaka mbrə̈ ne; mbrə ə̂në alabə̈ azü lə takpa tə̂ e wusə̂ Ndjapä wu ne, mə pa əpʉ rə ndə kə pa gana nə ngɔ e.

35 Bale, ə̈bə̈ əzü sə kə yu ətshe ə pa: «Akuzu nə sə kə she atâ a? Də tshekotə̂ yea də̂ əndje sə kə afɔ?» 36 Əndɨ! Ərə ə̂në bə lu, â tshû gâ ye kane â ə ko. 37 Bale, ərə ə̂në bə lu ə də̂ ayɔ rəgo nə ə̂në ə ko je kɔ də̂ bə lu kɔ ne, amba ə̂lê rəgo, əte ble wala ə̈bə̈ ata angwa rəgo də̂ bə lû kɔ. 38 Mandânə, Ndjapä sə kə za ə̈bə̈ tshekotə̂ kə ə̂lê rəgo nə mata ə̂në tshelə ye yində nə â tshə sə kə za tshekotə̂ kə angwa rəgo bale bale ə lï də nə.

39 Tshekotə̂ aərə nɔ̂ sə sə kʉ kpə tə̂ äwä nə bale ne. Bale tshekotə̂ azü sə kpî, tshekotə̂ aagia sə kpî, tshekotə̂ ayanu sə kpî â tshekotə̂ asungû sə ndje kpî.

40 Tshekotə̂ aərə tshelafɔ də tshekotə̂ aərə tshe tə̂ ashɔ sə ndje je. Bale, əmbre tshekotə̂ aərə tshelafɔ sə kpî â əmbre tshekotə̂ aərə tshe tə̂ ashɔ sə ndje kpî. 41 Ə̂yî alɔ sə kpî, ə̂yî yipʉ sə kpî, ə̂yî aambrepe sə kpî; â ə̂yî ə̈bə̈ ambrepe sə ndje kpî tə̂ ənə̂ ə̈bə̈ ata nə.

42 Rəkɔ, kə she akuzu sə ndje rə. Əndje shî tshekotə̂ ə̂në ə ndɨ je kɔ, ə she tə tshekotə̂ ə̂në ə ndɨ ndɨ tə̂ ərə nə kɔ. 43 Əndje shî tshekotə̂ ə̂në ə sə tə ərə kene kɔ, ə she tə tshekotə̂ ə̂yî. Əndje shî tshekotə̂ ə̂në ə mɔ ngbatshe kɔ, ə she tə tshekotə̂ ə̂në ə sə də awlra ngbatshe kɔ. 44 Əndje shî tshekotə̂ ə̂në ə sə tə ənə̂ əzü kɔ, ə she tə tshekotə̂ yîrə̂. Kədə tshekotə̂ əzü kə sə je, tshekotə̂ yîrə̂ sə ndje je. 45 Âdârə ə̂në Fraka nə̂ Ndjapä pâ: «Angbʉlî əzü, Adamə dô tə̂ ye tə sorô.»* Bale, səbudu Adamə dô tə̂ ye tə yîrə̂ kə za sorô kə azü. 46 Ə də̂ ətshə nə ə̂në tshə sə tə yîrə̂ nə kɔ kə sə tə angbʉlînə ne, ətshə nə ə̂në tshə sə lə əzü tə̂ ye nə kɔ kə na ətshinə, â ətshə nə ə̂në tshə sə tə yîrə̂ nə kɔ nâ gâ mandânə. 47 Angbʉlî əzü nə ə̂në Ndjapä mbrə̂ ətshə də ashɔ kɔ sə tə əzü tshe tə̂ ashɔ. Bishi əzü nə tô ənə̂ ye mâ lafɔ â nâ kɔ. 48 Əzü tshe tə̂ ashɔ nə sə rə, â azü tshe tə̂ ashɔ nə sə ndje kʉ rə. Əzü tshelafɔ nə sə rə, â azü tshelafɔ nə sə ndje kʉ rə. 49 Â mata ə̂në a kô ətshə nə ə̂në Ndjapä mbrə̂ ətshə də ashɔ kɔ, a ko ndje ətshə nə̂ tshelafɔ nə je.

50 Alaye, əpʉ ə̂në mə sə kə pa kɔ sə rəke: tshekotə̂ ə̂në ə sə də dɔ̂ngɔ̂ də ə̈ndjï kɔ lï lï ndə kə pa ə li Əgɔngerə nə̂ Ndjapä ne, â tshekotə̂ ə̂në ə gba je kɔ lï lï ndə kə sɔtə̂ äwä kə sə tə ərə ə̂në ə ndɨ ndɨ tə̂ ərə ne kɔ ne.

51 E djï-a, mə sə kə yisə̂ ə̈bə̈ lengerə əpʉ kə e: a sə sə kə tshu nɔ̂ ne, bale əzə̂ nɔ̂, a do tə̂ əzə̂ kpî je, 52 kʉ diawû, mata ə̂në əzü ngɔ ala kɔ, tə̂ əkɨ bale tɔtɔliɔ. Mbrə ə̂në tɔtɔliɔ nə ə kɨ je â akuzu ə she də tshekotə̂ ə̂në ə ndɨ ndɨ tə̂ ərə ne kɔ je, â əzə̂, a do tə̂ əzə̂ kpî je. 53 Mbrə ə̂në ə lï ndə kə pa tshekotə̂ nə ə̂në ə ndɨ je kɔ yi tshekotə̂ ə̂në ə ndɨ ndɨ tə̂ ərə ne kɔ, â tshekotə̂ nə ə̂në ə tshu je kɔ yi tshekotə̂ ə̂në ə tshu tshu tə̂ ərə ne kɔ. 54 Alɔ ə̂në tshekotə̂ nə ə̂në ə ndɨ je kɔ kə yi tshekotə̂ nə ə̂në ə ndɨ ndɨ tə̂ ərə ne kɔ gâ ye, â tshekotə̂ nə ə̂në ə tshu je kɔ kə yi tshekotə̂ nə ə̂në ə tshu tshu tə̂ ərə nə kɔ gâ ye, bale ndəma əpʉ ə̂në əndje tâ gâ lə Fraka nə̂ Ndjapä kɔ sə kə mbrə nə, ə̂në ə pa:

«Awlra ə̂në ə rô kuzu gâ ye kɔ

lîwu kuzu nə gâ ye.*

55 Wââ kuzu, awlra nə̂ zə nə

ə̂në ə rô pâ azü prââ kɔ sə kotâ a?

Wââ kuzu, ərə koshe nə̂ zə nə sə kotâ a?»*

56 Ərə koshe nə̂ kuzu nə kə də̂ nyaka â awlra nyaka nə kə də̂ âgbɔ̂ əpʉ. 57 Bale, a zä mərshe kə Ndjapä nə ə̂në tshə mbrə̂ â əzə̂ ro pâ kuzu də awlra tə̂ äwä Jezu Kristə, Âgbɔ̂ Əyïngerə nə̂ əzə̂ kɔ.

58 Rəkɔ, alaye əmə ə̂në mə yində e ngbatshe kɔ, e kä gbʉ gbʉ gbʉ, ə̈bə̈ ərə mëme e mëme ne. E mbrə̈ kosəra nə̂ Âgbɔ̂ Əyïngerə alɔnɔ̂, ə nä də nə gâ ətshinə, ə wüsə̂ nə ə pa kosəra ə̂në e mbrə kə Âgbɔ̂ Əyïngerə nə kɔ sə sə kə sə kʉ tə ambanə ne.