1 Alɔ ə̂në Jezu pâ əpʉ nə̂ ye nɔ̂ gâ ye kɔ, tshə pâ kə atrawaya nə̂ ye ə pa: 2 «E wusə̂ nə ə pa, sandaga Pakə sə kə sə lə aəlo bishi â əndje sə kə ka Əgblə nə̂ Əzü ndə kə pa azü wo ətshə gâ ala masheyɔ.»

3 Bale, aâgbɔ̂ azü nə̂ aawotokrɔ də aâgbɔ̂ azü nə̂ Ajuwufu ngbô tə̂ əndje gâ tə̂ nə lə bəngʉ nə̂ âgbɔ̂ awotokrɔ ə̂në əɨrɨ ye kə də̂ Kayifə kɔ. 4 Əndje zâ ama äwä bale ndə kə pa əndje tegbɔ Jezu tə̂ äwä afrɔ ə wo ətshə. 5 Bale, əndje pâ: «A zä zä ətshə tə̂ əlo sandaga nə ne, kanika azü a afɔ də awlra ne.»

6 Alɔ ə̂në Jezu sə̂ mâ Betani, mâ lə anda nə̂ Shemɔ, ə̂në tshə sə̂ leme-e tə əyïbroma kɔ, 7 ə̈bə̈ yashe nâ gâ ngotə̂ ye də ə̈bə̈ yombo ə̂në ndogɔ nə gbɔ̂ wââ kɔ. Əndje mâ anga yombo nə də ə̈bə̈ əkpʉ ə̂në əɨrɨ nə kə də̂ aləbatrə kɔ. Alɔ ə̂në Jezu sə̂ kə zɨ rəgo nə kɔ, yashe nə sɨ̂ yombo nə gâ lə kumu ye. 8 Alɔ ə̂në atrawaya nə wû ərə sə̂ rəkɔ, tshelə əndje kô əndje â əndje pâ: «Tshə ndɨ̂ yombo səye rə ndə yekɔ? 9 Əndje lî kəmə ndə kə pa əndje ka yombo səkɔ də əgerə ndogɔ ə ko ngendja nə kə alayïəyo.» 10 Jezu wûsə̂ əpʉ səkɔ ə pâ kə əndje ə pa: «Mbrə yekɔ də̂ e ka kumu yashe səye kɔ? Ərə ə̂në tshə mâ kə əmə kɔ, ə sə tə ə̂rɔ̂ ərə. 11 Mbrə ə̂në alayïəyo sə kə sə lə takpa tə̂ e alɔnɔ̂. Bale, əmə, mə sə sə kə sə lə takpa tə̂ e alɔnɔ̂ ne. 12 Tshə sɨ̂ yombo səye gâ tə̂ əmə angbʉlînə ndə kə pa əndje shi əmə. 13 Djatra əpʉ, mə pa kə e, tə̂ ətshe nɔ̂ ə̂në əndje sə kə yisə̂ Ə̂rɔ̂ Əpʉ səye pâ ashɔ nɔ̂, əndje sə kə pa ndje ndəma ərə ə̂në yashe səye mâ kɔ ndə kə pa ə̂sə̂ ye djerə azü djerə ne.»

14 Bale, ə̈bə̈ əzü-awla bale lə takpa tə̂ əndje morofo amanə bishi nə ə̂në əɨrɨ ye kə də̂ Judasə Isəkariɔtə kɔ, nâ ə wû aâgbɔ̂ azü nə̂ aawotokrɔ 15 ə pâ: «Kədə mə ka Jezu kə e, ərə yekɔ də̂ e sə kə za kə əmə?» Əndje dɨ̂ ə̂lê ngendja zazü bale də morofo â kô kə ətshə. 16 Ə vɔ̂tə̂ nə tə̂ alɔ nə səkɔ, Judasə nə sə̂ kə pra ə̈bə̈ ə̂rɔ̂ äwä ndə kə ka Jezu nə kə əndje.

17 Tə̂ angbʉlî əlo sandaga mapa ə̂në əndje mâ mâ də əyï nə ne kɔ, atrawaya nə nâ ə wû Jezu ə pâ kə ətshə ə pa: «Bə yində nə ə pa ä gamba rəgo Pakə nə kə əbə mâta a?» 18 Tshə kîrə əpʉ ə pa: «E nä mâ lə gala, mâ ndə ə̈bə̈ koshe rəke, e pä kə ətshə ə pa: "Awoyisə̂ ərə pâ: Əlo əmə ndô trö gâ ye*; əmə də atrawaya nə̂ əmə sə kə ma sandaga Pakə mâ ndə zə."» 19 Atrawaya nə mâ ərə nə ə̂në Jezu zâ ama kə əndje ndə kə pa əndje ma nə kɔ, â əndje gâmba rəgo Pakə nə.

20 Ə̂në alɔ dɨ̂ gâ ye kɔ, Jezu də azü-awla nə̂ ye morofo amanə bishi nə sə̂ gâ tʉ ndə kə zɨ rəgo. 21 Alɔ ə̂në əndje sə̂ kə zɨ rəgo nə kɔ, tshə pâ: «Djatra əpʉ, mə pa kə e: ə̈bə̈ əzü bale lə takpa tə̂ e sə kə ka əmə.» 22 Əkɔ sə̂ tə̂ lɔsu əndje tə bandanə, â əzü bale bale vɔ̂tə̂ kə pa kə ətshə ə pa: «Âgbɔ̂ Əyïngerə, əmə a?» 23 Tshə kîrə əpʉ kə əndje ə pa: «Əzü ə̂në ä də ətshə yî kəna ä äwä bale gâ lə sambe rəgo nə kɔ, ətshə kə ka əmə kɔ. 24 Əgblə nə̂ Əzü sə kə tshu nə mata ə̂në Fraka nə̂ Ndjapä pâ ndə əpʉ nə gâ pâ ye kɔ. Bale, əyo gâ pâ əzü nə ə̂në tshə sə kə ka ətshə kɔ! Ə sə tə ə̂rɔ̂nə mbrə əzü nə səkɔ ndə kə pa əndje zû kəmə ətshə zû ne.» 25 Judasə nə ə̂në tshə ka ətshə je kɔ zâ əpʉ ə pa: «Awoyisə̂ ərə, əmə a?» Jezu kîrə əpʉ kə ətshə ə pa: «Əbə, bə pâ gâ ye.»

26 Alɔ ə̂në əndje sə̂ kə zɨ rəgo nə kɔ, Jezu zâ mapa â mandânə ə̂në tshə ê ə̂rɔ̂ əpʉ gâ pâ nə gâ ye kɔ, tshə ngɔ̂ tshelə nə ə kô kə atrawaya nə̂ ye nə ə pâ: «E kö ə zɨ̈, ə sə tə tshekotə̂ əmə.» 27 Mandânə, tshə zâ kopo duva ə zâ mərshe kə Ndjapä, ə zâ kə əndje ə pa: «E-e nɔ̂, e ndjü, 28 mbrə ə̂në ə sə tə ə̈ndjï əmə, ə̈ndjï mbʉkʉ nə̂ Ndjapä ə̂në ə tû mbrə ə̂kpû azü, ndə kə gba tshelə anyaka nə̂ əndje kɔ. 29 Mə pa kə e, mə sə sə kə ndju kwatə̂mə ə̂ngû ə̂lê ayɔ vinyə səye mandânə səye ne, ʉrrr ndjɔ gâ tə̂ əlo ə̂në a də a-e sə kə ndju tafa duva lə Əgɔngerə nə̂ Abä əmə.»

30 Mandânə ə̂në əndje vî aətshi lə fraka Aətshi gâ ye kɔ, əndje nâ mâ pâ kaga aayɔ ɔlivə. 31 Bale, Jezu pâ kə atrawaya nə̂ ye ə pa: «Kʉ də tsheləbu səye, e sə kə tshi əmə tʉ nɔ̂ mbrə ərə ə̂në ə sə kə wutu gâ tə̂ əmə kɔ, mbrə ə̂në Fraka nə̂ Ndjapä pâ:

"Mə sə kə wo awobata aagia nə

â andalimi nə sə kə ndjɔ tshelə əndje."*

32 Bale, mandâ kə she əmə, mə sə kə ka mbrə e mâ lə ashɔ əgɔ Galile-e.»

33 Piarə zâ əpʉ ə pâ kə ətshə ə pa: «Alɔ ə̂në azü nɔ̂ tshi əbə tʉ, mə sə sə kə tshi əbə tʉ bale ne.» 34 Bale, Jezu pâ kə ətshə ə pa: «Djatra əpʉ, mə pa kə əbə, kʉ də tsheləbu səye, angbʉlînə ndə kə pa kɔngatə kɨ, äwä vəta bə sə kə vʉsə̂ nə ə pa bə wusə̂ əmə wu ne.» 35 Piarə nə kîrə əpʉ kə ətshə ə pa: «Â lï ndə kə pa a də aəmə tshu, mə sə sə kə vʉsə̂ əpʉ nə̂ zə bale ne.» Atrawaya nə nɔ̂ pâ kʉ rə.

36 Bale, Jezu də atrawaya nə̂ ye nə yî kumu əndje tə̂ ətshe ə̂në əndje dji əɨrɨ nə ə pa Jetəsemane kɔ, â tshə pâ kə əndje ə pa: «E sə̈ gâ tʉ kotəye, mə sə kə na mâ koye ndə kə yu Ndjapä.»

37 Mandânə, tshə kô a-Piarə də aləvu Zebede bishi gâ ndə ye. Əyo vɔ̂tə̂ kə za ətshə â awa mâ ətshə rô pâ nə. 38 Bale, tshə pâ kə əndje ə pa: «Mə sə də əyo tə̂ lɔsu əmə wââ a pa də mə sə kə tshu ə tshu. E sə̈ pə kotəye, a də a-e sə̈ də ə̈kü ala əzə̂.» 39 Mandânə, tshə rô ngrʉ̂ teashe ə tê ə zâ kumu ye su ashɔ ə yû Ndjapä ə pâ əpʉ səye ə pa: «Abä əmə, kədə äwä nə â sə je, gï kopo əyo səye gashe tə̂ əmə. Bale, lə aərə nɔ̂, ə də̂ ərə ə̂në mə yində nə kɔ də̂ ka bə ma ne, bale, ərə ə̂në bə yində nə kɔ ka ə ma.»

40 Mandânə, tshə gû gâ tə̂ atrawaya nə ə wû əndje, əndje lô na ye gâ ye. Tshə pâ kə Piarə nə ə pa: «E lï lï ndə kə pa a də a-e sə də ə̈kü ala əzə̂ â sə kəmə kʉ mbrə ə̈nü alɔ bale ne a? 41 E lö lö ne, e yü Ndjapä kanika ə te te lə afrɔ ərə ne. Yîrə̂ əzü sə də əgo ndə kə ma ə̂rɔ̂ ərə, bale, əndu əzü nə sə sə də awlra ne.»

42 Tshə kwâtə̂ye ə rô ngrʉ̂ tə̂ äwä bishi nə ə yû Ndjapä ə pa: «Abä əmə, kədə äwä nə â sə sə je ndə kə pa kopo əyo səye gi tə̂ ye gi gashe tə̂ əmə ne, ka mə ndju, mä ərə ə̂në tshelə zə yində nə kɔ.»

43 Tshə gû kwatə̂ye ə wû əndje, əndje lô na ye kwatəndje gâ ye, mbrə ə̂në əlo rô pâ əndje gâ ye.

44 Tshə kâtə̂ əndje tʉ, ə nâ ngrʉ̂ kwatə̂ye ə yû Ndjapä tə̂ äwä vəta nə ə pâ kʉtə̂ aəpʉ səkɔ. 45 Mandânə, tshə gû gâ tə̂ atrawaya nə̂ ye nə ə pâ kə əndje ə pa: «E sə pə kə lo əlo nə a? E sə pə kə wu tə̂ e a? Ə̂në a lə ye, alɔ nə ndô trö gâ ye. E wü-a! Əndje kâ Əgblə nə̂ Əzü gâ lə kəna alayïnyaka gâ ye. 46 E äfɔ, a rö! E wü-a! Əzü ə̂në tshə sə kə ka əmə kɔ ndô trö gâ ye.»

47 Jezu sə̂ pə kə pa əpʉ â Judasə, ə̈bə̈ əzü-awla bale lə takpa tə̂ əndje morofo amanə bishi nə, yî kumu ye də ə̂kpû azü ə̂në əndje kô aə̈ngrʉ̈ akamba də aayɔ gâ lə kəna əndje kɔ. Aâgbɔ̂ azü nə̂ aawotokrɔ də aâgbɔ̂ azü kə wlâ əndje kɔ. 48 Judasə nə, ətshə nə ə̂në tshə kâ Jezu nə kɔ, yîsə̂ ə̈bə̈ ərə ə̂në tshə sə kə ma nə kɔ kə ə̂kpû azü nə ə pâ: «Əzü ə̂në mə sə kə ɔ ama ye kɔ, ətshə kə sə̂! E tëgbɔ ətshə.» 49 Trale, Judasə nə nâ gâ ngotə̂ Jezu ə pâ kə ətshə ə pa: «Wanda, Awoyisə̂ ərə!» Mandânə, tshə ɔ̂ ama ye. 50 Jezu pâ kə ətshə ə pa: «Gbɔbəngâ, ərə ə̂në bə nâ ndə kə ma nə kɔ, mä.»

Bale, azü nə nâ trö ə têgbɔ ətshə ə zâ ətshə. 51 Ə̈bə̈ əzü bale lə takpa tə̂ əndje ə̂në əndje sə̂ gâ ngotə̂ Jezu nə kɔ, gbə̂tɔ ə̈ngrʉ̈ kamba nə̂ ye lə akwa nə ə dê əyïkosəra nə̂ âgbɔ̂ awotokrɔ â dê ətu ye kprû wli gâ tʉ. 52 Bale, Jezu pâ kə ətshə ə pa: «Kïrə də ə̈ngrʉ̈ kamba nə̂ zə nə gâ mandânə, mbrə ə̂në əzü ə̂në tshə wo əzü də ə̈ngrʉ̈ kamba, tshə sə kə tshu kuzu ə̈ngrʉ̈ kamba. 53 Bə wu ənə̂ zə ə pa mə lï lï ndə kə yu Abä əmə ndə kə pa tshə wla atrawaya nə̂ Ndjapä ə̂në əndje ngba tə bandanə kɔ kə əmə katshä katshä səye, ndə kə pa əndje ma awlra mbrə əmə ne a? 54 Bale, mə â ma rə, rəkɔ, ndəma Əpʉ Ndjapä, ə̂në ə pâ ərə nə lï ndə kə ma kʉ rə kɔ, sə kə wutu atâ a?»

55 Kʉ pə kôto, Jezu pâ kə ə̂kpû azü nə ə pa: «E nâ də aə̈ngrʉ̈ akamba də aayɔ ndə kə za əmə a pa də e na ndə kə za əyïangba. Alɔnɔ̂, mə sə̂ gâ tʉ lə Anda Ndjapä ndə kə yisə̂ əpʉ, bale, e zâ əmə zâ ne! 56 Bale, aərə sə̂ nɔ̂ mâ ndə kə pa əpʉ ə̂në aawopandəma Ndjapä pâ lə Fraka kɔ, ndəma nə ma.» Bale, atrawaya nə nɔ̂ tshî ətshə tʉ ə kpê.

57 Bale, azü nə ə̂në əndje têgbɔ Jezu nə kɔ, gû də ətshə mâ ndə Kayifə, âgbɔ̂ awotokrɔ, tə̂ ətshe ə̂në aawoyisə̂ âgbɔ̂ əpʉ nə̂ Mayïzə də aâgbɔ̂ azü ngbô tə̂ əndje gâ tə̂ nə kɔ. 58 Piarə nə sə̂ kə za äwä Jezu nə ə sə̂ ngrʉ̂ ʉrrr ndjɔ mâ lə bəngʉ nə̂ âgbɔ̂ awotokrɔ nə je. Tshə lî ə sə̂ gâ tʉ gâ ngotə̂ atrugu ndə kə wu äwä ə̂në ərə nə sə kə nglɔ də nə kɔ.

59 Aâgbɔ̂ azü nə̂ aawotokrɔ nə də aangbɔ ngbanga nə̂ Ajuwufu nə nɔ̂ sə̂ kə pra ə̈bə̈ əpʉ əterə ndə kə pa əndje za gâ lə kumu Jezu nə kanika ə wo ətshə. 60 Bale, əndje sɔ̂tə̂ nə sɔ̂ ne. Alabə̈ azü nâ ə pâ aəpʉ əterə gâ lə kumu ye. Djoko mandânə, alabə̈ əndje bishi nâ ə kâ 61 ə pâ: «Koshe səye pâ: "Mə lï ndə kə ngɔ Anda Ndjapä gâ tʉ â ma əndʉ nə lə aəlo vəta."» 62 Âgbɔ̂ awotokrɔ nə âfɔ ə pâ kə Jezu ə pa: «Bə sə sə də ə̈bə̈ əpʉ bale ndə kə pa nə ne a? Əpʉ yekɔ də̂ azü səye ə pa gâ lə kumu zə kɔ?» 63 Jezu sə̂ kʉ ngboo. Bale, âgbɔ̂ awotokrɔ nə pâ kə ətshə ə pa: «Mə yu əbə, də əɨrɨ Ndjapä ə̂në tshə sə tə sorô kɔ, ndə kə pa bə pa kə ä kədə bə sə tə Kristə* nə, Ɨrɨ Ndjapä nə.» 64 Jezu kîrə əpʉ kə ətshə ə pa: «Əbə, bə pâ gâ ye. Gâ pâ nə, mə pa kə e, mandânə səye, e sə kə wu Əgblə nə̂ Əzü ə̂në tshə sə kə sə gâ tʉ gâ ndə ndəkɔ Ndjapä tə Əyïworɔgbɔ nɔ̂ kɔ, tshə sə kə to mâ lafɔ ə gu lə andra.»

65 Bale, âgbɔ̂ awotokrɔ nə sûru tshelə aləba nə̂ ye ə pâ: «Tshə gû Ndjapä gâ ye. A sə də əgo ndə kə pa a yu ə̈bə̈ əzü də ə̈bə̈ əpʉ kwatə̂zə̂ a? E djî ə̂gû ə̂në tshə gû Ndjapä də nə kɔ gâ ye. 66 E wu ənə̂ e atâ a?» Əndje kîrə əpʉ ə pa: «Tshə lï də kuzu.»

67 Bale, əndje kû ngrusu gâ ətshi ye, ə dû ətshə də kəna əndje â alabə̈ nə dâ ngâlâ ye 68 ə pâ: «Kristə, tə awopandəma Ndjapä, pä kə ä, əde kə dâ əbə kɔ?»

69 Kandää, Piarə nə sə̂ gâ tʉ mashu gâ lə bəngʉ nə. Ə̈bə̈ əyïkosəra, tə yashe, nə̂ âgbɔ̂ awotokrɔ nə nâ trö də ətshə ə pâ: «Əbə ndje, bə sə tə̂-e gâ ngotə̂ Jezu, əzü əgɔ Galile nə.» 70 Bale, Piarə nə blê lə ala azü nɔ̂ ə pâ: «Mə wusə̂ əpʉ ə̂në bə yində kə pa nə kɔ wu ne.»

71 Mandânə, tshə sə̂ kə na gu nə gâ tə̂ manda tshelə bəngʉ nə, ə̈bə̈ ata əyïkosəra nə tə yashe wû ətshə ə pâ kə azü nə ə̂në əndje sə̂ je kɔ ə pa: «Ətshə koye sə̂ gâ ngotə̂ Jezu, əzü əgɔ Nazaratə nə.» 72 Piarə nə kwâtə̂ye ə blê ə drâ tə̂ ye ə pâ: «Mə wusə̂ koshe səye wu ne.»

73 Teashe mandânə, azü nə ə̂në əndje sə̂ je kɔ gî tə̂ əndje trö də Piarə nə ə pâ: «Ngâ, əbə ndje, bə sə tə ə̈bə̈ azü səkɔ, mbrə ə̂në kə pa əpʉ nə̂ zə yisə̂ nə gashu.» 74 Bale, Piarə nə vɔ̂tə̂ kə dra tə̂ ye ə pâ: «Kədə mə pa əterə, Ndjapä wä ngbanga gâ lə kumu əmə! Mə wusə̂ koshe səye wu ne.» Trale, kɔngatə kɨ̂. 75 Bale, ə̂sə̂ əpʉ sə̂ ə̂në Jezu pâ kə Piarə nə kɔ tê gâ lə ye, ə̂në ə pâ: «Angbʉlînə ndə kə pa kɔngatə kɨ, bə sə kə vʉsə̂ əpʉ əmə äwä vəta.» Piarə nə wûtu gashu ə kɨ̂ tə bandanə.