1 Bale, Âgbɔ̂ Yîrə̂ nâ də Jezu mâ lə ngbûndû ndə kə pa djablo tra lɔsu ye. 2 Mandânə ə̂në tshə rû tshelə ye tə̂ rəgo pəle ora lə aəlo zazü bishi kɔ, əgo mî ətshə. 3 Djablo, awofrɔ azü nâ trö də ətshə ə pâ kə ətshə ə pa: «Kədə bə sə tə Ɨrɨ Ndjapä, zä ama kə abadja səye ndə kə pa əndje do tə̂ əndje tə rəgo.» 4 Jezu kîrə əpʉ ə pa: «Əpʉ Ndjapä pâ: "Ə də̂ kʉ mbrə rəgo də̂ əzü ə sə tə sorô ne, bale, əzü sə tə sorô tə̂ äwä aəpʉ ama Ndjapä nɔ̂."»*

5 Mandânə, djablo nə nâ də Jezu mâ Jeruzalamə, gala ə̂në ə sə kpî mbrə Ndjapä kɔ, ə zâ ətshə tɔ mâ tə̂ kumu Anda Ndjapä, 6 ə pâ kə ətshə ə pa: «Kədə bə sə tə Ɨrɨ Ndjapä, äfɔ kotəye ə të mâ tə̂ ashɔ-e, mbrə ə̂në Fraka nə̂ Ndjapä pâ:

"Ndjapä sə kə za ama kə atrawaya nə̂ ye də əpʉ zə,

əndje sə kə za əbə gâ lə kəna əndje

kanika bə za ə̈nü zə za da badja ne."»*

7 Jezu pâ kə ətshə ə pa: «Fraka nə̂ Ndjapä pâ ndje ə pa: "Trä lɔsu Əyïlingû tə Ndjapä nə̂ zə trä ne."»*

8 Djablo kwatə̂ye ə ô də ətshə mâ tə̂ kumu ə̈bə̈ ə̈ngrʉ̈ kaga, ə yîsə̂ aəgɔ tshepashɔ nɔ̂ də aərə tshelə nə kə ətshə 9 ə pâ kə ətshə ə pa: «Kədə bə gbəte gâ tshekudu əmə â vrɔ əmə, mə sə kə ko aərə sə̂ nɔ̂ kə əbə.» 10 Jezu pâ kə ətshə ə pa: «Gï tə̂ zə gashe tə̂ əmə, Sataa*! Mbrə ə̂në Fraka nə̂ Ndjapä pâ: "Vrɔ̈ Əyïlingû tə Ndjapä nə̂ zə ə mbrə̈ kʉ kə ətshə bale."»* 11 Bale, djablo kâtə̂ Jezu nə â atrawaya nə̂ Ndjapä nâ gâ ngotə̂ ye ə mâ kə ətshə.

12 Alɔ ə̂në Jezu djî ə pa əndje kânga Zââ gâ ye kɔ, tshə gbə̂tɔ tə̂ ye ə sə̂ mâ lə ashɔ əgɔ Galile. 13 Tshə kâtə̂ əgɔ Nazaratə ə nâ ə sə̂ mâ Kaprənayɔmə ə̂në ə sə̂ tə̂ ama dala ə̂ngû əgɔ Galile, lə ashɔ əgɔ Zabulɔ də əgɔ Nefətali kɔ. 14 Tshə mbrə̂ rə ndə kə pa ndəma əpʉ ə̂në awopandəma Ndjapä Ezayi pâ kɔ mbrə. Tshə pâ:

15 «Azü ashɔ əgɔ Zabulɔ də azü ashɔ əgɔ Nefətali,

ashɔ əgɔ ə̂në ə sə trö də ə̂ngû əngbrʉ kɔ, djoko ətshi Jurda kɔ,

də ashɔ əgɔ Galile nə̂ azü ə̂në əndje wusə̂ Ndjapä wu ne kɔ!

16 Azü əgɔ ə̂në əndje sə lə əbutshe kɔ,

əndje wû ə̈bə̈ əgerə ə̂yîəwo.

Ətshe krâ

gâ pâ azü ə̂në əndje sə lə əbutshe

mâ lə əgɔ nə̂ akuzu kɔ gâ ye.»*

17 Kʉ pə tə̂ alɔ nə səkɔ, Jezu vɔ̂tə̂ kə yisə̂ Ə̂rɔ̂ Əpʉ. Tshə pâ: «E tshï äwä angbrɔ kə ma aərə nə̂ e tʉ mbrə ə̂në Əgɔngerə tshelafɔ ndô trö gâ ye!»

18 Ə̂në Jezu sə kə na tə̂ ama dala ə̂ngû əgɔ Galile kɔ, tshə wû alaye azü bishi, Shemɔ ə̂në əndje e ətshə ə pa Piarə də aye nə də Andre. Əndje sə kə wli gbânda la ə̂ngû nə mbrə ə̂në əndje sə tə aawopra agiangû. 19 Tshə pâ kə əndje ə pa: «E zä äwä əmə, mə sə kə mbrə e tə aawopra azü.» 20 Kʉ pə kôto səkɔ, əndje tshî agbânda nə̂ əndje nə tʉ ə zâ äwä ye.

21 Jezu kwatə̂ye ə rô ngrʉ̂ teashe ə wû alabə̈ aata alaye azü bishi, Zake də Zââ ə̂në əndje sə tə aləvu Zebede kɔ. Əndje sə̂ gâ lə ə̈bə̈ əgerə âgbâ də abä əndje də Zebede nə, əndje sə kə gamba agbânda nə̂ əndje. Tshə ê əndje. 22 Kʉ pə kôto səkɔ, əndje kâtə̂ əgerə âgbâ nə̂ əndje gâ ndə abä əndje nə tʉ ə zâ äwä ye.

23 Jezu nâ lə əgɔ Galile nɔ̂, ə yîsə̂ əpʉ lə aanda aangbɔ. Tshə mʉ̂ Ə̂rɔ̂ Əpʉ gâ pâ Əgɔngerə tshelafɔ ə grɔ̂ arəka nɔ̂ tə̂ azü əgɔ nə. Tshə mâ â aərə tshekotə̂ azü nɔ̂ ə̂në ə ndɨ̂ gâ ye kɔ, ə gâmba tə̂ əndje gâ mandânə. 24 Əpʉ Jezu zâ ətshe lə əgɔ Siri nɔ̂. Əndje nâ də azü ə̂në adongo arəka sə tə̂ əndje wala ə ka əndje ə ka kɔ, də azü ə̂në əndje sə də aafrɔ yîrə̂ lə əndje, də alayïäkɔ̈ gâ ndə azü ə̂në alabə̈ aərə tshekotə̂ əndje ndɨ̂ gâ ye kɔ nɔ̂ kə ətshə â tshə grɔ̂ arəka nə tə̂ əndje. 25 Ə̈bə̈ əgerə ə̂kpû azü zâ äwä ye. Azü nə âfɔ lə ashɔ əgɔ Galile, lə Əgɔ-agala morofo, alabə̈ əndje âfɔ mâ Jeruzalamə, lə ashɔ əgɔ Jude də əgɔ ə̂në ə sə djoko ətshi ə̂ngû Jurda â nâ kɔ.