1 «Bale, Əgɔngerə tshelafɔ sə kə sə mata əpʉ alamvera morofo ə̂në əndje kô alamba nə̂ əndje ə nâ na ye ndə kə te koshe ə̂në tshə sə kə za yashe kɔ. 2 Mindû lə takpa tə̂ əndje sə̂ tə aəndɨ â mindû sə̂ tə aawowusə̂ ərə. 3 Aəndɨ nə kô alamba nə̂ əndje, bale, ə kô kâdâ tshelə alamba nə kô ne. 4 Bale, aawowusə̂ ərə nə kô kâdâ gâ lə aanga gâ ndə alamba nə̂ əndje nə. 5 Alɔ ə̂në əndʉ koshe nə sə pə kə dɨ ne, əlo kô əndje nɔ̂ â əndje lô na ye.

6 «Kpə ə̂grûtshe, ə̈bə̈ əzü tâ râwâ ə pa: "Koshe nə kə səye! E nä ə të ətshə!" 7 Bale, alamvera nə nɔ̂ jô lə əlo nə ə gâmba alamba nə̂ əndje nə. 8 Aəndɨ nə pâ kə aawowusə̂ ərə nə ə pa: "E sɨ̈ ə̈bə̈ kâdâ nə̂ e nə teashe kə ä, mbrə ə̂në alamba nə̂ ä nə sə kə rɨ nə." 9 Awowusə̂ ərə nə kîrə əpʉ ə pa: "Bale ne! Kâdâ nə lï lï də əzə̂ də a-e nɔ̂ ne. E nä mâ ndə awoka nə ə yɔ̈ ənə̂ e." 10 Alɔ ə̂në əndje nâ na ye ndə kə yɔ kâdâ nə kɔ, koshe nə yî kumu ye. Əndje nə ə̂në əndje sə̂ trö gâ ye kɔ, əndje lî gâ lə anda sandaga nə də akoshe nə â əndje tshû manda nə gâ tə̂ nə gâ ye. 11 Ʉrrr djoko mandânə, ə̂dû alamvera nə yî kumu əndje ə pâ: "Âgbɔ̂ əzü, âgbɔ̂ əzü, krɔ̈ manda kə ä!" 12 Bale, koshe nə kîrə əpʉ kə əndje ə pa: "Djatra əpʉ, mə pa kə e, mə wusə̂ e wu ne."» 13 Jezu pâ kwatə̂ye ə pa: «Rəkɔ, ala e në, mbrə ə̂në e wusə̂ əlo nə wala alɔ nə wu ne.»

14 «Əgɔngerə nə̂ Ndjapä sə kə sə mata əpʉ nə̂ ə̈bə̈ koshe ə̂në tshə âfɔ ndə kə na ana tə̂ ə̈bə̈ ətshe ngrʉ̂. Tshə ê alayïkosəra nə̂ ye ə kô aərə nə̂ ye ə kô kə əndje. 15 Tshə kô kə ə̈bə̈ nə ə̂lê ngendja mindû, kə ə̈bə̈ ata nə ə̂lê ngendja bishi, â zâ kə bale nə ə̂lê ngendja bale.* Tshə kô ərə nə kə əzü bale bale ə lï də awlra ə̂në tshə sə də nə kɔ, â mandânə, tshə rô də ana nə. 16 Trale mandânə, ətshə nə ə̂në tshə sɔ̂tə̂ ə̂lê ngendja nə mindû kɔ, tshə nâ na ye ə kâ də ərə â sɔ̂tə̂ aata ə̂lê ngendja mindû gâ pâ nə. 17 Äwä bale ndje, ətshə nə ə̂në tshə sɔ̂tə̂ ə̂lê ngendja nə bishi kɔ, sɔ̂tə̂ aata nə bishi gâ pâ nə. 18 Bale, ətshə nə ə̂në tshə sɔ̂tə̂ kʉtə̂ ə̂lê ngendja nə bale kɔ, tshə nâ ə djî ashɔ ə zâ ngendja nə̂ âgbɔ̂ əzü nə̂ ye nə wû gâ lə nə.

19 «Əndʉ nə dɨ̂ mandânə, âgbɔ̂ əzü nə̂ alayïkosəra səkɔ gû ə vɔ̂tə̂ kə yu əndje tə̂ äwä ərə ə̂në əndje mâ də ngendja nə kɔ. 20 Ətshə nə ə̂në tshə sɔ̂tə̂ ə̂lê ngendja nə mindû nə kɔ nâ trö ə mâ aata ə̂lê ngendja mindû gâ pâ nə ə pâ: "Âgbɔ̂ əzü, bə kô ə̂lê ngendja mindû kə əmə, mə sɔ̂tə̂ aata nə mindû gâ pâ nə, ə tə nə kə səye." 21 Âgbɔ̂ əzü nə̂ ye nə pâ kə ətshə ə pa: "Ə̂rɔ̂nə! Bə sə tə ə̂rɔ̂ əyïkosəra ə̂në kə ma tə̂ zə sə də äwänə. Bə sə tə ə̂rɔ̂ əzü lə aaya aərə, mə sə kə za əbə gâ pâ aərə ə̂në ə ngba ə ngba kɔ. Nä gâ əmə, e də âgbɔ̂ əzü nə̂ zə du ə̂rû." 22 Ətshə nə ə̂në tshə sɔ̂tə̂ ə̂lê ngendja nə bishi kɔ nâ trö ndje ə pâ: "Âgbɔ̂ əzü, bə kô ə̂lê ngendja bishi kə əmə, mə sɔ̂tə̂ aata nə bishi gâ pâ nə, ə tə nə kə səye." 23 Âgbɔ̂ əzü nə̂ ye nə pâ kə ətshə ə pa: "Ə̂rɔ̂nə! Bə sə tə ə̂rɔ̂ əyïkosəra ə̂në kə ma tə̂ zə sə də äwänə, bə sə tə ə̂rɔ̂ əzü lə aaya aərə, mə sə kə za əbə gâ pâ aərə ə̂në ə ngba ə ngba kɔ. Nä gâ əmə, e də âgbɔ̂ əzü nə̂ zə du ə̂rû." 24 Gâ mandânə, ətshə nə ə̂në tshə sɔ̂tə̂ kʉtə̂ ə̂lê ngendja nə bale kɔ nâ trö ə pâ: "Âgbɔ̂ əzü, mə wusə̂ nə ə pa bə nga tə̂ aərə nə̂ zə wââ. Bə ko angwa rəgo tə̂ ətshe ə̂në bə lû ərə lû tə̂ nə ne kɔ, bə ro rəgo tə̂ ətshe ə̂në bə gʉ̂ angwa rəgo gʉ̂ tə̂ nə ne kɔ. 25 Awa mâ əmə â mə nâ â zâ ə̂lê ngendja nə̂ zə nə wû gâ lə ashɔ. Zä ərə nə̂ zə nə, ə tə nə kə səye." 26 Âgbɔ̂ əzü nə̂ ye nə kîrə əpʉ kə ətshə ə pa: "Əmbrʉ əyïkosəra, əyïadɔ, bə wusə̂ nə ə pa mə ko angwa rəgo tə̂ ətshe ə̂në mə lû ərə lû tə̂ nə ne kɔ ə ko rəgo tə̂ ətshe ə̂në mə lû angwa rəgo lû tə̂ nə ne kɔ. 27 Bale, bə lî kəmə ndə kə za ngendja nə̂ əmə gâ ə̂sə̂ kə bata ngendja tə̂ nə. Mə â dô kəmə tə əmə rəke, mə sə kə ko kəmə də ə̈bə̈ ərə gâ pâ nə. 28 Rəkɔ, e zä ngendja nə lə kəna ye ə zä kə ətshə nə ə̂në tshə sə də nə morofo kɔ. 29 Mbrə ə̂në, əzü ə̂në tshə sə də ərə, əndje sə kə za ə̈bə̈ nə gâ pâ nə kə ətshə â tshə sə kə sə də ərə ro pâ nə. Bale, əzü ə̂në tshə sə sə də ə̈bə̈ ərə ndə ye ne, əndje sə kə za aya ərə ə̂në tshə sə də nə kɔ tə̂ ye. 30 Bale, ənə̂ əyïkosəra ə̂në tshə tɔ tɔ gâ tə̂ ə̈bə̈ ərə bale nə kɔ, e wlï ətshə gashu gâ lə əbutshe, tə̂ ətshe ə̂në azü sə kə kɨ nə â sə kə zɨ tshelə əji əndje tə̂ nə kɔ."»

31 «Alɔ ə̂në Əgblə nə̂ Əzü sə kə yi kumu ye lə ə̂yî ye, də atrawaya nə̂ Ndjapä nɔ̂, tshə sə kə sə gâ pâ mbata ngerə ə̂yî nə̂ ye. 32 Əndje sə kə ngbo amarä nɔ̂ gâ tə̂ nə gâ ətshi ye â tshə sə kə kru tshelə takpa tə̂ əndje mata ə̂në awobata andalimi sə kə kru tshelə takpa tə̂ andalimi də ayabru kɔ. 33 Tshə sə kə ko andalimi nə gâ ndə ndəkɔ ye â ko ayabru nə gâ ndə gə̂lê ye. 34 Bale, əyïngerə nə sə kə pa kə azü nə ə̂në əndje sə gâ ndə ndəkɔ ye kɔ ə pa: "E nä gâ əmə, e-e ə̂në Abä əmə tô ngwarə gâ pâ e gâ ye kɔ, ə lï gâ lə Əgɔngerə ə̂në əndje gâmba mbrə e gâ ye pə tə̂ alɔ kə ma tshepashɔ kɔ. 35 Mbrə ə̂në əgo mî əmə, e kô rəgo kə əmə; əgo ə̂ngû mî əmə, e tô ə̂ngû kə əmə; mə sə̂ tə tshângâ, e zâ əmə gâ lə anda nə̂ e; 36 mə sə̂ kpɔnderɔ, e yî ləba gâ tə̂ əmə; mə sə̂ də rəka, e nâ gâ ngotə̂ əmə; mə sə̂ lə anda kânga, e nâ ə wû əmə." 37 Bale, aə̂rɔ̂ azü nə sə kə kirə əpʉ kə ətshə ə pa: "Âgbɔ̂ Əyïngerə, gorɔ də̂ əgo mî əbə â ä wû əbə â kô rəgo nə kə əbə, wala əgo ə̂ngû mî əbə â ä tô ə̂ngû nə kə əbə? 38 Gorɔ də̂ bə sə̂ tə tshângâ nə â ä wû əbə â zâ əbə mâ ndə ä, wala kpɔnderɔ â ä yî ləba gâ tə̂ zə? 39 Gorɔ də̂ ä wû əbə də rəka tə̂ zə nə, wala mâ lə anda kânga nə â ä nâ ə wû əbə?" 40 Bale, əyïngerə nə sə kə kirə əpʉ kə əndje ə pa: "Djatra əpʉ, mə pa kə e, alɔnɔ̂ ə̂në e ma ərə səkɔ kə ə̈bə̈ əngʉ əzü səye bale lə takpa tə̂ alaye əmə, əmə də̂ e mâ ərə nə kə əmə kɔ."

41 «Mandânə, tshə sə kə pa kə azü nə ə̂në əndje sə gâ ndə gə̂lê ye nə kɔ ə pa: "E gï tə̂ e gashe ngrʉ̂ tə̂ əmə, e-e ə̂në Ndjapä drâ e gâ ye kɔ, ə nä gâ ala əwo ə̂në ə sə piii kɔ ə̂në əndje gâmba mbrə djablo də atrawaya nə̂ ye kɔ! 42 Mbrə ə̂në əgo mî əmə, e kô rəgo kô kə əmə ne, əgo ə̂ngû mî əmə, e tô ə̂ngû tô mə ndju ne. 43 Mə sə̂ tə tshângâ, e zâ əmə zâ gâ lə anda nə̂ e ne; mə sə̂ kpɔnderɔ, e yî ləba yî gâ tə̂ əmə ne; mə sə̂ də rəka ə sə̂ lə anda kânga, e nâ nâ ə wû əmə ne." 44 Bale, əndje sə kə kirə əpʉ ndje ə pa: "Âgbɔ̂ Əyïngerə, gorɔ də̂ ä wû əbə də əgo wala də əgo ə̂ngû nə, wala tə tshângâ, wala kpɔnderɔ, wala də rəka tə̂ zə, wala lə anda kânga â ä nâ nâ ə mâ ə̂rɔ̂ ərə kə əbə ne kɔ?" 45 Bale, tshə sə kə kirə əpʉ kə əndje ə pa: "Djatra əpʉ, mə pa kə e: alɔnɔ̂ ə̂në e ma ərə səkɔ ma kə ə̈bə̈ əngʉ əzü səye bale ne kɔ, əmə də̂ e mâ ərə nə mâ kə əmə ne kɔ." 46 Bale, əndje ənə̂ səkɔ sə kə na gâ ə̂sə̂ əyo ə̂në ə sə piii kɔ, â aə̂rɔ̂ azü nə sə kə na gâ ə̂sə̂ sorô ə̂në ə sə piii kɔ.»