1 Jezu kwâtə̂ye ə pâ əpʉ kə əndje tə̂ äwä əpʉ kəwû ə pa: 2 «Əgɔngerə tshelafɔ sə mata əpʉ ə̈bə̈ əyïngerə ə̂në tshə mâ sandaga kə ko tə̂ ɨrɨ nə də ə̈bə̈ yashe. 3 Tshə wlâ alayïkosəra nə̂ ye ndə kə pa əndje e azü ə̂në əndje wlâ tshe ndə əndje mbrə sandaga nə kɔ. Bale, azü nə yîndə nə yî ndə kə na nə ne. 4 Tshə kwâtə̂ye ə wlâ alabə̈ alayïkosəra nə ə pa: "E pä kə azü nə ə̂në mə ê əndje kɔ ə pa: Mə gâmba rəgo nɔ̂ mbrə sandaga nə gâ ye. Əndje wô apagra də ayarə əjerɔ nə̂ əmə gâ ye, aərə nɔ̂ sə̂ trö gâ ye. E nä gâ əmə ndə sandaga nə!" 5 Bale, azü nə ə̂në əndje ê əndje ndə sandaga nə kɔ wû kə e ətshe nə tə amba ərə lə ala əndje â rô tə̂ äwä kosəra nə̂ əndje. Ə̈bə̈ nə rô gâ lə kəndɨ nə̂ ye, ə̈bə̈ nə rô ndə kə ka aərə nə̂ ye. 6 Alabə̈ aata əndje têgbɔ alayïkosəra nə̂ əyïngerə nə ə dâ əndje â wô əndje. 7 Tshelə əyïngerə nə kô ətshə â tshə wlâ atrugu nə̂ ye â əndje nâ ə wô aawowo azü səkɔ â shô gala nə̂ əndje. 8 Bale, tshə pâ kə alayïkosəra nə̂ ye nə ə pa: "Tshekɨ sandaga kə ko tə̂ ətshe nə lî gâ ye. Bale, azü nə ə̂në mə ê əndje kɔ lî lî də nə ne. 9 Rəkɔ, e nä na ye lə amashäwä ə ë azü nɔ̂ ə̂në e sə kə sɔ̂tə̂ əndje kɔ ndə sandaga nə." 10 Alayïkosəra səkɔ nâ na ye lə aäwä ə ngbô azü nɔ̂ ə̂në əndje sɔ̂tə̂ əndje kɔ gâ tə̂ nə, aəmbrʉ azü də aə̂rɔ̂ azü â tshelə anda sandaga nə sû kpɔ də azü.

11 «Əyïngerə nə lî gâ lə anda nə ndə kə wu azü nə ə̂në əndje ê əndje kɔ. Tshə wû ə̈bə̈ koshe ə̂në tshə yî ləba sandaga nə yî ne. 12 Tshə yû ətshə ə pa: "Gbɔbəngâ, bə mâ atâ â li mâtəye â sə sə də ləba sandaga nə ne kɔ?" Koshe səkɔ â ama ye â bale ne. 13 Bale, əyïngerə nə pâ kə alayïkosəra nə ə pa: "E ï ə̈nü ye də kəna ye ə wlï ətshə gashu gâ lə əbutshe, tə̂ ətshe ə̂në əkɨ də kə zɨ tshelə əji ə sə je tə̂ nə kɔ."» 14 Jezu pâ kwatə̂ye ə pa: «Mbrə ə̂në Ndjapä ê azü ngbatshe, bale, azü ə̂në tshə kê əndje kɔ ngba ngba ne.»

15 Bale, Afariza nâ ə ngbô tə̂ əndje gâ tə̂ nə ndə kə wu äwä ə̂në əndje lï ndə kə za Jezu tə̂ äwä kə le ətshə ə le tə̂ aəpʉ ama ye də ə̂tə̂ ye kɔ. 16 Əndje wlâ atrawaya nə̂ əndje də azü tshelə aangbɔ nə̂ Erɔdə kə Jezu â əndje pâ kə ətshə ə pa: «Awoyisə̂ ərə, ä wusə̂ nə ə pa bə pa kʉtə̂ djatra əpʉ, bə yisə̂ äwä kə ma tə̂ əzü ə̂në Ndjapä yində nə, tə̂ äwä djatra əpʉ. Bə ma gana ala əzü ma ne, mbrə ə̂në bə yində azü yi mbrə ala əndje ne. 17 Pä kə ä, bə wu ənə̂ zə atâ: âgbɔ̂ əpʉ zâ äwä kə ä ndə kə pa ä piyi lapɔ kə Sezarə, âgbɔ̂ əyïngerə əgɔ Rɔmə wala ə zâ äwä nə zâ kə ä ne a?»

18 Bale, Jezu wûsə̂ əmbrʉ ərə ə̂në ə sə̂ tə̂ lɔsu əndje kɔ, kîrə əpʉ ə pa: «E-e, alayïama bishi, e yində kə le əmə ə le mbrə yekɔ? 19 E mä ə̈bə̈ ngbengewle ngendja ə̂në e sə kə piyi də lapɔ nə kɔ mə wu!» Əndje mâ ə̈bə̈ ngbengewle ngendja kə ətshə. 20 Â tshə yû əndje ə pa: «Tshitshi əde də əɨrɨ əde kə sə̂ la nə kɔ?» 21 Əndje kîrə əpʉ kə ətshə ə pa: «Ənə̂ Sezarə.» Bale, tshə pâ kə əndje ə pa: «Rəkɔ, e kö aərə ə̂në ə sə tə ənə̂ Sezarə kɔ kə Sezarə, ə kö aərə ə̂në ə sə tə ənə̂ Ndjapä kɔ kə Ndjapä.» 22 Alɔ ə̂në əndje djî əpʉ nə ə̂në tshə pâ kɔ, kumu əndje kpê pâ əndu əndje â əndje kâtə̂ ye â gû na ye.

23 Kʉ pə tə̂ alɔ nə səkɔ, Asadusa ə̂në əndje pa akuzu sə sə kə she nə ne kɔ, nâ gâ ngotə̂ Jezu ə yû ətshə də əpʉ səye ə pa: 24 «Awoyisə̂ ərə, Mayïzə pâ: "Kədə ə̈bə̈ əzü â sə sə də aneshe ne â tshu, aye nə sə kə za yashe koya nə ndə kə pa tshə zu aneshe də əɨrɨ kuzu nə."* 25 Kandää, alabə̈ alaye azü mindû amanə bishi sə̂ je lə takpa tə̂ ä. Angbʉlî əzü nə zâ yashe ə zû angwa ye zû ne ə tshû ə kâtə̂ yashe koya nə kə aye nə. 26 Kʉtə̂ ərə ə̂në ə wûtu gâ tə̂ angbʉlî əzü nə kɔ, ə wûtu gâ tə̂ bishi əzü nə, ə wûtu ndje gâ tə̂ vəta əzü nə ʉrrr ndjɔ gâ tə̂ mindû amanə bishi əzü nə. 27 Mandâ əndje nɔ̂, yashe nə tshû ndje. 28 Tə̂ alɔ kə she akuzu, yashe nə sə kə sə tə ənə̂ əde, lə takpa tə̂ əndje mindû amanə bishi kɔ? Mbrə ə̂në əndje nɔ̂ zâ ətshə tə yashe gâ ye kɔ?» 29 Jezu kîrə əpʉ kə əndje ə pa: «E tshî äwä əpʉ nə tʉ gâ ye, mbrə ə̂në e wusə̂ tshelə âdâ Fraka nə̂ Ndjapä wala awlra nə̂ Ndjapä wu ne. 30 Mbrə ə̂në tə̂ alɔ kə she akuzu, akoshe sə sə kə ko ayashe ne, wala ayashe sə sə kə ko akoshe ne, bale, əndje sə kə sə mata atrawaya nə̂ Ndjapä mâ lafɔ. 31 E dɨ̂ ənə̂ e əpʉ ə̂në Ndjapä pâ kə e gâ pâ əpʉ kə she akuzu kɔ dɨ̂ ne a? Tshə pâ: 32 "Mə də̂ Ndjapä nə̂ Abraamo, Ndjapä nə̂ Izakə, Ndjapä nə̂ Jakɔbə."»* Jezu pâ kwatə̂ye ə pa: «Ndjapä sə sə tə Ndjapä nə̂ akuzu ne, bale tshə sə tə Ndjapä nə̂ asorô.» 33 Ə̂kpû azü nə ə̂në əndje sə̂ kə dji ətshə kɔ, kumu əndje kpê pâ əndu əndje mbrə kə yisə̂ əpʉ nə̂ ye nə.

34 Alɔ ə̂në Afariza djî ə pa Jezu pâ əpʉ â Asadusa â ama əndje â ne kɔ, əndje ngbô tə̂ əndje gâ tə̂ nə. 35 Ə̈bə̈ nə bale lə ə̂grû tə̂ əndje, tə awoyisə̂ âgbɔ̂ əpʉ nə̂ Mayïzə, yîndə kə tra lɔsu Jezu ə yû ətshə də əpʉ səye ə pa: 36 «Awoyisə̂ ərə, angbʉlî əpʉ lə âgbɔ̂ əpʉ ə̂në ə rô ə̂dû nə nɔ̂ kɔ kə də̂ ənə̂ta a?» 37 Jezu kîrə əpʉ kə ətshə ə pa: «Yïndə Əyïlingû tə Ndjapä nə̂ zə, də lɔsu zə nɔ̂, də yîrə̂ zə nɔ̂, də kə wusə̂ ərə nə̂ zə nɔ̂.* 38 Angbʉlî əpʉ lə âgbɔ̂ əpʉ ə̂në ə rô ə̂dû nə nɔ̂ kə sə̂. 39 Bishi əpʉ nə lə âgbɔ̂ əpʉ nə ə̂në ə sə mata angbʉlînə səkɔ kə səye: "Yïndə ngâ zə mata ə də əbə də ə̂tə̂ zə."* 40 Âgbɔ̂ əpʉ nə̂ Mayïzə nɔ̂ də aəpʉ nə̂ aawopandəma Ndjapä kâ gâ pâ aəpʉ bishi səkɔ.»

41 Alɔ ə̂në Afariza ngbô tə̂ əndje gâ tə̂ nə gâ ye kɔ, Jezu yû əndje də əpʉ səye ə pa: 42 «E pa ənə̂ e atâ gâ pâ əpʉ nə̂ Kristə? Tshə sə tə ɨrɨ əde?» Əndje kîrə əpʉ kə ətshə ə pa: «Tshə sə tə ɨrɨ Davidə.» 43 Bale, Jezu pâ kə əndje ə pa: «Rəkɔ ə mbrə atâ â Davidə nə, ə̂në Yîrə̂ Ndjapä zâ əpʉ gâ lə ama ye kɔ, ê ətshə tə Âgbɔ̂ Əyïngerə kɔ? Mbrə ə̂në Davidə nə pâ:

44 "Əyïlingû pâ kə Âgbɔ̂ Əyïngerə nə̂ əmə ə pa:

Sə̈ gâ tʉ gâ ndə ndəkɔ əmə,

ʉrrr ndjɔ mə ko alayïkowɔ nə̂ zə gâ tshekudu ə̈nü zə gâ ye kane."*

45 «Rəkɔ, kədə Davidə nə kə ê ətshə tə Âgbɔ̂ Əyïngerə, Kristə nə ə sə tə ɨrɨ Davidə nə atâ a?»

46 Ə̈bə̈ əzü bale lə takpa tə̂ əndje lî lî ndə kə kirə ə̈bə̈ əpʉ kə Jezu ne. Bale, kʉ pə tə̂ alɔ nə səkɔ, ə̈bə̈ əzü bale mâ mâ əgo ndə kə yu ətshə də əpʉ kwatəndje ne.