1 Tə̂ alɔ nə səkɔ, Erɔdə Atipasə, komandâ əgɔ Galile, djî ndə əpʉ Jezu. 2 Tshə pâ kə alayïkosəra nə̂ ye ə pa: «Zââ Batistə kə sə̂! Tshə shê lə takpa tə̂ akuzu gâ ye. Âdârə ə̂në tshə sə də awlra ndə kə ma aərə ə̈lü kɔ kə sə̂.»

3 Mbrə ə̂në Erɔdə zâ ama â əndje têgbɔ Zââ ə î ətshə də ə̂wû kowɔ â wlî ətshə gâ lə anda kânga gâ ye, lə kumu Erɔdiadə, əwɔ aye nə də Flipə. 4 Mbrə ə̂në Zââ nə pâ kə Erɔdə nə ə pa: «Ə sə sə də äwänə ndə kə pa bə za Erɔdiadə tə əwɔ zə ne.» 5 Erɔdə yîndə kə wo Zââ, bale, tshə mâ awa ə̂kpû azü nə, mbrə ə̂në əndje wûsə̂ nə ə pa Zââ sə̂ tə awopandəma Ndjapä.

6 Kandää, tə̂ əlo sandaga kə zu Erɔdə nə, əgblə yashe nə̂ Erɔdiadə sə kə vi tə̂ ye ətshi azü ə̂në əndje ê əndje ndə sandaga nə kɔ â fʉ̂ tə̂ Erɔdə nə. 7 Â tshə drâ tə̂ ye ə pa əne sə kə ko aərə nɔ̂ ə̂në əgblə yashe nə yu tshuku nə kɔ kə ətshə. 8 Əyï əgblə nə pâ əpʉ kə ətshə â tshə pâ kə Erɔdə nə ə pa: «Zä kumu Zââ Batistə kə əmə kotəye gâ lə kpângblâ sambe.»

9 Əyïngerə nə sə̂ də əyo tə̂ lɔsu ye. Bale, mbrə ə̂në tshə drâ tə̂ ye gâ ye lə ala azü nə nɔ̂ ə̂në tshə ê əndje ndə sandaga nə kɔ, tshə zâ ama ndə kə pa əndje za kumu Zââ Batistə nə kə əgblə yashe nə. 10 Tshə wlâ ə̈bə̈ əzü ndə kə pa tshə na mâ lə anda kânga nə je ə de kumu Zââ Batistə nə. 11 Tshə gû də kumu ye nə lə kpângblâ sambe ə zâ kə əgblə yashe nə â tshə zâ kə əyï nə. 12 Atrawaya nə̂ Zââ nə nâ ə zâ əko ye ə shî. Mandânə, əndje nâ ə pâ ndə əpʉ ərə ə̂në ə mâ kɔ kə Jezu.

13 Ə̂në Jezu djî ndə əpʉ səkɔ, tshə âfɔ kôto ə ô gâ lə ə̈bə̈ əgerə âgbâ ə rô ngrʉ̂ mâ lə ngbûndû. Bale, ə̂kpû azü nə wûsə̂ nə; əndje âfɔ lə aəgɔ bale bale â zâ äwä ye də ə̈nü əndje. 14 Alɔ ə̂në tshə jêrə lə əgerə âgbâ nə, tshə wû ə̈bə̈ əgerə ə̂kpû azü. Əyo əndje mâ ətshə â tshə grɔ̂ arəka tə̂ alayïrəka nə.

15 Ə̂në alɔ vɔ̂tə̂ kə dɨ nə gâ ye kɔ, atrawaya nə nâ trö də ətshə ə pâ: «A sə gâ lə ngbûndû a səye, alɔ dɨ̂ gâ ye. Grɔ̈ ə̂kpû azü nə ndə kə pa əndje gu na ye gâ lə aaya aəgɔ ndə kə pa əndje yɔ rəgo ə zɨ.» 16 Bale, Jezu kîrə əpʉ kə əndje ə pa: «Əndje tshɔ tshɔ ndə kə gu na ye ne. E kö rəgo də ə̂tə̂ e kə əndje.» 17 Bale, əndje pâ kə ətshə ə pa: «Ä sə kʉ də mapa mindû də agiangû bishi koye.» 18 Jezu pâ kə əndje ə pa: «E nä də nə kə əmə.»

19 Tshə zâ ama kə ə̂kpû azü nə ndə kə pa əndje sə gâ tʉ gâ pâ güsü. Tshə kô amapa nə mindû nə də agiangû nə bishi nə, ə lîshi gâ lafɔ ə ê ə̂rɔ̂ əpʉ gâ pâ nə. Mandânə, tshə ngɔ̂ tshelə amapa nə ə kô kə atrawaya nə ndə kə pa əndje kru tshelə nə tə̂ ə̂kpû azü nə. 20 Azü nə nɔ̂ zɨ̂ rəgo nə â tshelə əndje sû. Atrawaya nə rɔ̂ ə̂dû rəgo nə ə sû kakli morofo amanə bishi. 21 Azü nə ə̂në əndje zɨ̂ rəgo nə kɔ, akoshe sə̂ mata sake mindû (5 000), əndje dɨ̂ ayashe də aneshe dɨ̂ ne.Jezu kô rəgo kə ə̂kpû azü

22 Trale mandânə, Jezu zâ ama kə atrawaya nə̂ ye nə ndə kə pa əndje o gâ lə əgerə âgbâ ə gbo ə̂ngû nə djoko ətshî je angbʉlînə ndə kə pa tshə grɔ ə̂kpû azü nə gâ ye kane. 23 Alɔ ə̂në tshə grɔ̂ əndje gâ ye kɔ, tshə ô gâ pâ kaga kʉtə̂ ye ndə kə yu Ndjapä. Bale, ə̂në alɔ dɨ̂ gâ ye kɔ, tshə sə̂ kʉtə̂ ye kôto. 24 Əgerə âgbâ nə wûtu mâ ə̂grû ə̂ngû nə gâ ye â kplaka ə̂ngû nə vɔ̂tə̂ kə meme əgerə âgbâ nə də âgbɔ̂. Mbrə ə̂në əyi nə yî gbɔ əndje. 25 Alɔ ə̂në ətshe ndô trö ndə kə kra nə gâ ye kɔ, Jezu sə̂ kə na ana pâ ala ə̂ngû nə gu nə gâ tə̂ əndje. 26 Alɔ ə̂në atrawaya nə wû ətshə ə̂në tshə sə̂ kə na pâ ala ə̂ngû nə kɔ, kumu əndje kpê pâ əndu əndje â əndje pâ: «Ngandrə kə sə̂!» Awa zâ əndje â əndje vɔ̂tə̂ kə ta râwâ. 27 Trale, Jezu pâ kə əndje ə pa: «Lɔsu e zɨ̈tɨ, əmə kə sə̂! Awa mä e mä ne!»

28 Piarə pâ kə ətshə ə pa: «Âgbɔ̂ Əyïngerə, kədə əbə kə sə̂, zä ama ndə kə pa mə na pâ ala ə̂ngû nə gu nə gâ tə̂ zə.» 29 Jezu pâ kə ətshə ə pa: «Nä gâ əmə!» Piarə nə wûtu lə əgerə âgbâ nə ə vɔ̂tə̂ kə na pâ ala ə̂ngû nə gu nə gâ tə̂ Jezu nə. 30 Bale, ə̂në Piarə nə wû əyi ə̂në ə sə̂ kə yi də âgbɔ̂ kɔ, awa mâ ətshə â tshə vɔ̂tə̂ kə li ə̂ngû nə. Tshə tâ râwâ ə pa: «Âgbɔ̂ Əyïngerə, shë əmə lə kuzu!» 31 Trale, Jezu yî kəna ye ə têgbɔ ətshə ə pâ kə ətshə ə pa: «Əbə, əyï aya lɔsu, bə sə də əpʉ ashera tə̂ lɔsu zə mbrə yekɔ?» 32 Alɔ ə̂në əndje bishi nɔ̂ ô gâ lə əgerə âgbâ nə gâ ye kɔ, əyi nə kâtə̂ nə. 33 Bale, atrawaya nə ə̂në əndje sə̂ gâ lə əgerə âgbâ nə kɔ tê gâ tshekudu Jezu nə ə pâ: «Bə sə ngâ tə Ɨrɨ Ndjapä!»

34 Mandânə ə̂në əndje gbô ə̂ngû nə gâ ye kɔ, əndje yî kumu əndje mâ lə ashɔ əgɔ Jenezaratə. 35 Azü əgɔ nə yêrɔ Jezu â pâ ndə ye kə azü tə̂ ətshe na na ye lə əgɔ nə nɔ̂. Azü nə nâ də alayïrəka nɔ̂ kə ətshə. 36 Əndje kɨ̂ ə̂sə̂ əyo tə̂ əndje kə ətshə ə pa tshə katə̂ alayïrəka nə, əndje goro kʉtə̂ ama ləba nə̂ ye. Azü nə nɔ̂ ə̂në əndje gôro ama ləba nə̂ ye nə kɔ, arəka nə̂ əndje nə nglɔ̂.