1 Alɔ ə̂në Jezu wûtu lə Anda Ndjapä ə sə̂ kə ro nə kɔ, atrawaya nə̂ ye nâ trö də ətshə ə pâ tshə wu äwä ə̂në əndje mâ Anda Ndjapä nə tə ə̂rɔ̂nə də nə kɔ. 2 Bale, tshə pâ kə əndje ə pa: «E wû aərə səye nɔ̂ a? Djatra əpʉ, mə pa kə e, ə̈bə̈ əkpʉ bale sə sə kə sə pə koye gâ pâ ngâ nə ne, ə sə kə ngɔ nə nɔ̂ gâ tʉ.»

3 Jezu sə̂ gâ tʉ mâ pâ kaga aayɔ ɔlivə. Atrawaya nə̂ ye nâ kʉtə̂ əndje gâ ngotə̂ ye ə yû ətshə ə pa: «Pä kə ä, ərə səkɔ sə kə wutu nə gorɔ? Azü sə kə wusə̂ alɔ kə na əbə gâ ndə alɔ kə nglɔ tshepashɔ gâ tə̂ ərə yekɔ?» 4 Jezu kîrə əpʉ kə əndje ə pa: «Ala e në ka ə̈bə̈ əzü bale frɔ e frɔ ne! 5 Mbrə ə̂në azü ngbatshe sə kə na də əɨrɨ əmə â əzü bale bale sə kə pa nə ə pa: "Əmə də̂ Kristə nə!" Əndje sə kə frɔ ə̂kpû azü. 6 E sə kə dji ndə əpʉ akowɔ trö gâ ndə əpʉ akowɔ ə̂në ə sə kə na gu nə kɔ, awa mä e mä ne. Mbrə ə̂në, aərə səkɔ lï ndə kə wutu nə, bale ə də̂ alɔ kə nglɔ tshepashɔ də̂ kə sə̂ ne. 7 Ə̈bə̈ marä sə kə afɔ ndə kə tɔ kowɔ də ə̈bə̈ ata marä, ə̈bə̈ əgɔngerə sə kə afɔ ndə kə tɔ kowɔ də ə̈bə̈ ata əgɔngerə. Əgerə əgo sə kə te nə â ashɔ sə kə meme tə̂ ye tə̂ aətshe na na ye. 8 Aərə səkɔ nɔ̂ sə kə sə mata angbʉlî kə ka tshelə yashe ə̂në əgblə sə kə ka ətshə ndə kə pa tshə zu kɔ.»

9 «Bale, əndje sə kə ko e gâ lə kəna azü ndə kə pa əndje gi əyo tə̂ e ə wo e. Tshelə amarä nɔ̂ sə kə wəra tə̂ əndje tə̂ e mbrə əɨrɨ əmə. 10 Bale, tə̂ alɔ nə səkɔ, lɔsu azü ngbatshe sə kə te nə, azü sə kə ka angâ əndje â sə kə wəra tə̂ əndje tə̂ angâ əndje lə takpa tə̂ əndje. 11 Ə̂kpû aafrɔ aawopandəma Ndjapä sə kə afɔ, ə frɔ azü ngbatshe. 12 Əmbrʉ ərə sə kə rô pâ nə â kə yi tə̂ nə̂ ə̂kpû azü sə kə zɨtɨ nə. 13 Bale, əzü ə̂në tshə gbɔgbɔ tə̂ ye lə aərə səkɔ ʉrrr ndjɔ gâ tə̂ ama nə, Ndjapä sə kə she ətshə lə kuzu. 14 Əndje sə kə mʉ Ə̂rɔ̂ Əpʉ Əgɔngerə nə̂ Ndjapä səye pâ ashɔ nɔ̂ ndə kə pa amarä nɔ̂ dji əpʉ nə. Bale, mandânə, tshepashɔ sə kə nglɔ nə.»

15 «Âdârə ə̂në, e sə kə wu ətshə ə̂në əndje dji əɨrɨ ye ə pa "Əmbrʉ awondɨ ərə" kɔ, ə̂në awopandəma Ndjapä Danialə pâ ndə əpʉ ye gâ ye kɔ, tshə sə kə sə gâ tʉ gâ tə̂ ətshe ə̂në ə sə kpî mbrə Ndjapä kɔ* – awodɨ əpʉ səye, djï tshelə âdâ nə.

16 «Bale, azü ə̂në əndje sə kə sə lə ashɔ əgɔ Jude kɔ, əndje kpë gâ pâ akaga. 17 Əzü ə̂në tshə sə kə sə pâ anda*, tshə jë jërə ndə kə ko aərə ə̂në ə sə lə anda nə̂ ye kɔ ne. 18 Əzü ə̂në tshə sə kə sə lə kəndɨ, tshə dö tə̂ ye dö gu nə gâ lə manda ndə kə pa tshə za əgerə ləba nə̂ ye ne. 19 Əyo gâ pâ ayashe ə̂në əndje sə kə sə də əndu gâ ndə əndje ə̂në aneshe sə kə ɔ angɔ əndje tə̂ tshekɨ nə səkɔ. 20 E yü Ndjapä ndə kə pa alɔ kə kpe e nə wu wutu tə̂ tshekɨ əzɨ wala tə̂ ə̈bə̈ əlo saaba ne. 21 Mbrə ə̂në, âgbɔ̂ əyo sə kə sə je ə rô ə̂dû əyo nɔ̂ ə̂në ə vɔ̂tə̂ nə tə̂ alɔ ə̂në Ndjapä mâ tshepashɔ kɔ ʉrrr ndjɔ kpəsəye kɔ, â marä tə̂ əyo səkɔ sə sə kə sə je kwatəndje bale ne. 22 Bale, kədə Ndjapä kə gî gî kəmə aəlo səkɔ gâ tə̂ nə ne, ə̈bə̈ əzü bale sə sə kə tshɔ lə kuzu ne. Bale, mbrə azü ə̂në Ndjapä kê əndje gâ ye kɔ, tshə sə kə gi aəlo səkɔ gâ tə̂ nə.

23 «Bale, kədə ə̈bə̈ əzü kə pa kə e ə pa: "Kristə nə sə mâtəye" wala "Tshə sə mâ koye", e yï yïndə əpʉ nə̂ ye nə ne. 24 Mbrə ə̂në aafrɔ akristə də aafrɔ aawopandəma Ndjapä sə kə yi kumu əndje. Əndje sə kə ma aâgbɔ̂ aərə ə̈lü də aərə ə̂në ə za awa gâ lə azü je kɔ ndə kə pa əndje frɔ azü, äwä nə â sə je, əndje frɔ ndje azü ə̂në Ndjapä kê əndje gâ ye kɔ. 25 E djï! Mə pâ ndə nə kə e angbʉlînə gâ ye.»

26 «Rəkɔ, kədə əzü pa kə e ə pa: "E lïshi-a, tshə sə mâ lə ngbûndû!", e nä nä mâ je ne. Wala kədə tshə pa: "E lïshi-a, tshə zâ tə̂ ye wû koye!", e yï yïndə əpʉ nə̂ ye nə ne. 27 Mbrə ə̂në, mata kə sro yavrɨ ə̂në â srô tə̂ ətshe ə̂në alɔ sə kə wutu tə̂ nə kɔ, ə kpe ndjɔ mâ budu nə tə̂ ətshe ə̂në alɔ sə kə li na ye tə̂ nə kɔ, əlo kə gu Əgblə nə̂ Əzü sə kə sə ndje äwä bale rə. 28 Tə̂ ətshe ə̂në əko agia sə tə̂ nə kɔ də̂ amɔlɔ sə kə ngbo tə̂ əndje tə̂ nə.*

29 «Trale, mandâ aəlo aərə əyo səkɔ, tshela alɔ sə kə bu nə, yipʉ sə sə kə tɔ kwatə̂ye ne, aambrepe sə kə afɔ mâ lafɔ ə yɔ gâ tə̂ ashɔ, Ndjapä sə kə meme aawlra tshelafɔ. 30 Bale, ərə ə̂në ə sə kə yisə̂ alɔ kə yi kumu Əgblə nə̂ Əzü kɔ sə kə wutu lafɔ. Amarä nɔ̂ pâ ashɔ sə kə kɨ ə̂sə̂ əyo tə̂ əndje. Əndje sə kə wu kə gu Əgblə nə̂ Əzü lə andra lafɔ də awlra ye nɔ̂ də ə̂yî ye nɔ̂. 31 Tshə sə kə wla atrawaya nə̂ Ndjapä, əndje sə kə u əgerə ängɔ̈ ə̂në ə kɨ tə bandanə kɔ ə ngbo azü ə̂në Ndjapä kê əndje pâ ashɔ nɔ̂ gâ ye kɔ gâ tə̂ nə, ə vɔ̂tə̂ nə tə̂ ama ashɔ ʉrrr ndjɔ gâ tə̂ budu nə.»

32 «E wüsə̂ ərə kpə tə̂ əpʉ kəwû gâ pâ ayɔ figə. Alɔ ə̂në e wu amato nə tɔ tə̂ nə â atafa akako nə vɔtə̂ kə tɔ tə̂ nə, e wusə̂ nə ə pa tshekɨ ngû yavrɨ ndô trö gâ ye. 33 Äwä bale ndje, e-e, alɔ ə̂në e wu aərə səkɔ â wutu, e wüsə̂ nə ə pa Əgblə nə̂ Əzü ndô trö gâ ye, tshə sə lə manda. 34 Djatra əpʉ, mə pa kə e: azü tshe kpəsəye sə sə kə tshu nə nɔ̂ ne â aərə səkɔ nɔ̂ sə kə wutu nə. 35 Tshelafɔ də ashɔ sə kə ro nə, bale, aəpʉ ama əmə sə sə kə ro nə bale ne.»

36 «Əzü bale wusə̂ əlo nə də alɔ nə wu ne. Atrawaya nə̂ Ndjapä ə̂në əndje sə mâ lafɔ kɔ wala Ɨrɨ Ndjapä nə wusə̂ əlo nə wu bale ne, kʉtə̂ Abä tshî kə wusə̂ nə. 37 Ərə ə̂në ə wûtu leme-e tə̂ alɔ Nɔwe kɔ, ə sə kə wutu nə äwä bale tə̂ alɔ kə gu Əgblə nə̂ Əzü. 38 Leme-e, tə̂ alɔ nə səkɔ, angbʉlînə ndə kə pa əgerə yavrɨ ni, ə̂ngû su ə za tshepashɔ nɔ̂, azü sə̂ kə zɨ ərə ə sə̂ kə ndju ərə, ə sə̂ kə ko tə̂ əndje, aləvu əndje kô ndje tə̂ əndje ʉrrr gâ tə̂ əlo ə̂në Nɔwe nə lî gâ lə bato kɔ. 39 Əndje wûsə̂ nə wû bale ə pa ə̈bə̈ ərə ə ma je ne, ʉrrr â əgerə yavrɨ nî, ə̂ngû sû ə zâ tshepashɔ nɔ̂ â wô əndje nɔ̂. Ərə nə sə kə sə ndje äwä bale rə tə̂ alɔ kə gu Əgblə nə̂ Əzü. 40 Bale, akoshe bishi sə kə sə mâ lə kəndɨ, əndje sə kə za ə̈bə̈ nə bale ə tshi bale nə tʉ. 41 Ayashe bishi ə̂në əndje sə kə tɔ ərə kpə ə̂sə̂ nə bale kɔ, əndje sə kə za ə̈bə̈ nə bale ə tshi bale nə tʉ. 42 Rəkɔ, ala e në, mbrə ə̂në, e wusə̂ əlo ə̂në Âgbɔ̂ Əyïngerə nə̂ e ə gu də nə kɔ wu ne. 43 E wüsə̂ nə tə ə̂rɔ̂nə ə pa, kədə əyïnga anda kə wusə̂ alɔ ə̂në əyïangba sə kə na də nə də tsheləbu kɔ, tshə sə sə kə lo nə ə katə̂ ye ka tshə ngɔ anda nə ə li ne. 44 Âdârə ə̂në, e-e ndje, e sə̈ trö, mbrə ə̂në Əgblə nə̂ Əzü sə kə gu nə tə̂ alɔ ə̂në e wusə̂ nə wu ne kɔ.»

45 «Əde kə sə tə əyïkosəra ə̂në kə ma tə̂ ye sə də äwänə â tshə sə tə awowusə̂ ərə? Ətshə kə də̂ əzü ə̂në âgbɔ̂ əzü nə̂ ye pa tshə lishi gâ pâ azü nə̂ əne, ə ko rəgo kə əndje, əndje zɨ kədə alɔ kə zɨ rəgo nə kə lï. 46 Ənə̂ əyïkosəra səkɔ tə ə̂rɔ̂nə, alɔ ə̂në âgbɔ̂ əzü nə̂ ye nə gu ə te ətshə, tshə sə kə ma kosəra nə. 47 Djatra əpʉ, mə pa kə e: âgbɔ̂ əzü nə̂ ye nə sə kə za ətshə gâ pâ aərə nə̂ ye nɔ̂! 48 Bale, kədə əyïkosəra səkɔ kə sə tə əmbrʉ əzü â pa mâ lə ye ə pa: "Âgbɔ̂ əzü nə̂ əmə sə sə kə gu katshä ne", 49 â vɔtə̂ kə da angâ nə də̂ alayïkosəra nə â sə kə zɨ rəgo â sə kə ndju ə̂pî də angâ nə də̂ aawondju ərə. 50 Âgbɔ̂ əzü nə̂ əyïkosəra səkɔ sə kə gu nə tə̂ əlo ə̂në əyïkosəra nə ka ka mbrə ətshə ne kɔ ndje tə̂ alɔ ə̂në tshə wusə̂ nə wu ne kɔ. 51 Əyïnga anda nə sə kə gi əyo tə̂ ye tə bandanə â ma ərə ə̂në əndje ma tə̂ alayïama bishi kɔ gâ tə̂ ye. Kôto də əkɨ də kə zɨ tshelə əji ə sə je.»