Arca da aliança
A Arca da Aliança era o símbolo mais sagrado de Israel — representava a presença de Deus no meio do seu povo. Sobre ela brilhava a glória do Senhor entre os querubins.
Ma Filistise ɔtagu ma makpakpɛ̃dze masarɛgu Israel mabi, kakpã ɔbɛ gbaã. Ne ma Filistise ɔɖe Israel mabi iso fiɛ maɖoe lɛ maturi kukpi kuna i kakpãkpɛkɔ̃. Ɔwi wɔ i makpakpɛ̃dze ɔkpese makɛlɛ kasɛkɔ̃ ne, Israel makpakpa ɔkarɛ ma sɔ, "Be ɔso i Bosate ɔtã ma Filistise ɔɖe bo iso nɔme? Mitã bosɛ boasu Bosate Ndamu Aɖaka i Silo bobɔ. Si aasɛgu bo fiɛ aaɖi bo i matsirise nrɔɔ̃ ame.
Ne ɔso makpakpɛ̃dze ɔsese maturi Silo, ne masɛ maasu Bosate Ɔlesate Ndamu aɖaka, nwɔ nsi i makerubi ndɛ̃ mabɔ. Eli mabibirɛrɛĩ inyɔ, Xofni gu Pinexas, ana ɔwe i mmɔ ku Ɣaa ndamu aɖaka.
Ɔwi wɔ i ndamu aɖaka ɔba aabo i kasɛkɔ̃ ne, Israel mabi ɔɖuɖu ɔlakulu ku isoɣɔ teteree sɔ karɔ̃ ɔti. Gɔ ma Filistise ɔnɔ kulu ne makarɛ sɔ, "Be ɔso kulu teteree gɔgbe to i ma Hebrise kasɛkɔ̃?"
Gɔ maba maatsue sɔ Bosate ndamu aɖaka masu mabɔ i kasɛkɔ̃ ne, ifɔ̃ ɔmɔɛ̃ ma Filistise gbaã. Maɣɛ sɔ, "Kuɣɔ ɔ ɔɔba kuabo i kasɛkɔ̃ ame. Boɔre nrɔɔ̃! Nnɛgbe igbã iiba inya. Ndzo mitã bo! Nna loaɖi bo ɔbɔrɛgu i aɣɔ wa mba ɔle nrɔɔ̃ ame? Aɣɔ wagbe lobɔ sinyɛpɛ̃ agbãagbã i ma Egiptese iso i fafuĩ ame ne. Ma Filistise, miwe katetere! Mibara lɛ marɛrɛ̃, si iiɖe ngbɔ ne miakpese ma Hebrise masande lɛ kumɛgɔ ma wũ maɔɖe bo masande manya awe. Mita lɛ marɛrɛ̃ awe, si mikpɛ̃ kakpã!"
Ne ɔso ma Filistise ɔkpɛ̃ kakpã ne maɖe Israel mabi iso, ma ɔrɛrɛ̃ biara ɔtere ɔkɛlɛ ɔ̃ ikpayo ame. Maturi gbodzoo ɔrɔ̃ kakpã. Maɖoe Israel makpakpɛ̃dze ma nsɛ masɛ i ngba iso kukpi sitɛ. Mamɔɛ̃ Ɣaa ndamu aɖaka mafɔ fiɛ maɖoe Eli mabibirɛrɛĩ inyɔ, Xofni gu Pinexas ana.
Bosate ɔkpadzɛ̃ Asdod gu ɔ̃ awo ame maturi kutsue teteree. Ɔkpadzɛ̃ iwɔ ɔbɔ ma iso ne ɔtã ara ɔmumu maturi ma i mmɔ pelepele. Gɔ Asdod maturi ɔnya ara wa nto aba ne, maɣɛ sɔ, "Iikote sɔ Israel ɣaa aɖaka aase i bo kɔrɛ alasɔ ɔto ɔkpadzɛ̃ bo gu bo kuɣɔ Dagon kutsue." Ne ɔso makpere ma Filistise maɖeisoi ɔɖuɖu makarɛ ma sɔ, "Be boabaragu Israel ɣaa aɖaka?"
Matã mmuai sɔ, "Mitã masu wã makɛlɛgu Gat ɔmagɛ̃siare." Ne ɔso masu Israel Ɣaa aɖaka makɛlɛgu Gat.
Ɣɛɛ gɔ masu wã i mmɔ makɛlɛgu kama ne, Bosate ɔkpadzɛ̃ ɔmagɛ̃siare wɔmɔ kutsue ana, fiɛ itã ifɔ̃ siare ɔmɔɛ̃ ma. Ɔkpadzɛ̃ ɔturi biara kutsue i ɔmagɛ̃siare ame, makpakpa i makoso pelepele ku ara imumu. Ne ɔso masu Ɣaa ndamu aɖaka makɛlɛgu Ekron.
Gɔ Ɣaa aɖaka to abo i Ekron ɔmagɛ̃siare ame ne, Ekron maturi ɔlakulu mabiɛ maɣɛ sɔ, "Maɔsu Israel ɣaa aɖaka mabɔ bo sɔ aaba aɖoe bo gu bo maturi." Ne ɔso makpere ma Filistise maɖeisoi ɔɖuɖu ne maɣɛ sɔ, "Misu Israel ɣaa aɖaka miruigu, mitã akpese akɛlɛ wã mɔmɔ kasɛkɔ̃ si iiɖe ngbɔ ato aaɖoe bo gu bo maturi." Alasɔ kukpi ifɔ̃ ɔmɔɛ̃ ɔmagɛ̃siare maturi ɔɖuɖu i Ɣaa kɔrɔ̃ teteree i ma iso ɔso.
Ɔwi wɔ i Bosate ndamu aɖaka ɔɔwe i ma Filistise karɔ̃ iso awa akɔdzɛ ne, ma Filistise ɔkpere ma masɔrɛdze gu mawase makarɛ ma sɔ, "Nda ngbɔ boabara Bosate ndamu aɖaka? Miɣere bo kumɛgɔ boabara fiɛ boakpesegu wã bokɛlɛgu wã kasɛkɔ̃."
Matã mmuai sɔ, "Si mito mikpesegu Israel ɣaa aɖaka mikɛlɛgu ne, midaasese wã kere. Ikote sɔ miasese wũ iɣɛrɛkuso isɔrɛ. Iyɔ ne miana isosarɛ fiɛ miatsue miɖiite sɔ, ne ɔso i Bosate iitara ɔ̃ kɔrɔ̃ i mi iso."
Ne ɔso mabara ngbɔ. Masu manantsuĩnyimɔ inyɔ, makɔra ma i kabore iso, ne mamɔɛ̃ ma abi mapia i ɔkpã ame ne. Masu Bosate ndamu aɖaka masɛ i kabore ame, ne masu kaɖakai ga ame i kulelei gu aramua wa matoregu sikãrɛtɛa ana pia masɛ i wã kuruɛ ne. Manantsuĩnyimɔ ɔɣo ɔri siĩ makɛlɛ Bet-Semes isɛ, masɛ i ɔri iso fiɛ mato mabiɛ i ɔri ɔɖuɖu iso, maisɛnɛkɛ̃ makɛlɛ kuɖearɔ̃ ɣee kubena iso. Ma Filistise maɖeisoi ɔsiai ma isɛ iabo ta Bet-Semes kume iso.
Kiniɔ ne i ɔwi wɔmɔ ame ne, Bet-Semes maturi ɔwe i kagbolomi ame mala maɔrui kamɔ. Matara anɔ kere, ne manya ndamu aɖaka ne. Gɔ manya wã ne mana isoɣɔ gbaã. Kabore ɔsɛ kaba kaatuĩ i itasiare iwɛ̃ kɔrɛ i Bet-Semese Yosua ɔwĩ ame. Maturi ɔkɛkɛ kabore mabara ala ndɔrɛ̃, ne maɖoe manantsuĩnyimɔ masu mafɛ̃ ara matã Bosate lɛ araifɛ̃ isɔrɛ. Ma Levise ɔɔmɔɛ̃ Bosate ndamu aɖaka gu kaɖakai lobua iso, nga ame i sikãrɛtɛa aratorea pia, masu masɛ i itasiare iso. Iyi nɛmɔ ne ma Bet-Semese ɔsɔrɛ araifɛ̃ asɔrɛ gu asɔrɛ matã Bosate.
Ne ɔso Kiriat-Yearim marɛrɛ̃ ɔba maasu Bosate ndamu aɖaka. Masu wã makɛlɛgu Abinadab iyo i kabemi iso. Ne masekelera ɔ̃ ɔbi Eleazar si ɔnyɔ Bosate ndamu aɖaka iso.
Ndamu aɖaka ɔwe i Kiriat-Yearim akɔ gbodzoo, ɔwi ɔɖuɖu ɔɖe akɔ sinyɔ. I akɔ wagbe ame ne, Israel mabi ɔɖuɖu ɔla maɔbiɛ maɔkpere Bosate.
Kiniɔ ne maɣere Igara David sɔ, "Bosate ɔɔfere Obed-Edom iyo gu irabiara nɛ ɔba kusɛkusɛ ala Ɣaa ndamu aɖaka ɔso." Ne ɔso David ɔkɛlɛ ɔsɛ ɔ̃asu Ɣaa ndamu aɖaka ɔbɔrɛgu i Obed-Edom iyo ɔbɔ David Ɔmagɛ̃siare ame ku isoɣɔ. Gɔ mma nsore Bosate ndamu aɖaka ɔɔɖi ngba mikuɔ ne, David ɔsɔrɛ nantsuĩrɛrɛ̃ gu inantsuĩbi nɛ mba iɖa ɔtã Bosate. David mɔmɔ ɔpia ɖɔti ɖɔbɔrɔa ɔmearapia fiɛ ɔto ɔtɔ i Bosate anɔ gu ɔ̃ ɔle ɔɖuɖu, fiɛ David gu Israel ɔɖuɖu ɔsu Bosate ndamu aɖaka mabɔ ku kulu gu kudadã ifɛ̃.