1 Sanbalat, Tobia, Gesem Arabse gu bo matsirise tsɔra ɔnɔ sɔ loɔledza ibere itsue fiɛ kabiɛkɔ̃ kukawɛ̃ siina i ne ame. Atoasɔ ipɛ ɔwi wɔmɔ ne, loipia akui i kuyogodɔ̃ kanya. 2 Ne Sanbalat gu Gesem ɔsese me kanya sɔ, "Ba, si bosarɛ i Ono katɛfɛkɔ̃ i kamagɛĩ kawɛ̃ ame."

Ɣɛɛ mato mabara adzuni gɔ maabara me iraboa. 3 Ne ɔso losese ma makpabo ku mmuai mɛgbe sɔ, "Nto lobara karabara nyaa kawɛ̃ gɔ loibawo ɔso ɔba. Be ɔso loanyua karabara losɛ katuĩ, kere lota loso loba i mi kɔrɛ i mmɔ?" 4 Masese me ɔturi ku kanya ngbɔ ikpɛ ina sɔɔ̃, ne mme wũ lotã ma mmuai mɛmɔ ame ne.

5 Kere ne Sanbalat ɔledza ɔ̃ ɔɖabo isese me, ku kanya gamɔ ame. Nnɛgbe loɖe ɔkpɛ ruva ɔto ɔsese me ɔturi ne. Ɔto ɔko wɔ maisɛ̃ kanya i ɔ̃ kɔrɔ̃ ame. 6 Matsɛrɛ atɔ̃me wagbe mapia i ɔko ame sɔ,

"Itsue pia i ɔwiri ame i nɖebi ndɛ̃ - gu Gesem ana ɔɣere me sɔ ɔnukuare iɖe - sɔ mi gu ma Yudase ɔɔsɛ iti nyanyariã ame sɔ miabara itaiyaiso, ne ɔso fiɛ mito mitsue ibere ne. Isu ibua ne, i atsue wagbe kanya ne ka ato aba aakpese ma Yudase igara. 7 Maɣɛ sɔ ɔɔɖikanyamaɖidze ana asɛ gɔ mala maɔpɛ imomo i fɔ iso i Yerusalem sɔ, 'Yuda ka ɔba igara!' Kiniɔ ne, itsue nɛgbe to iare isɛ iabo i igara kɔrɛ, ne ɔso ba si bosakanya bosɛ iti ame i itɔ̃me iso."

8 Losese wũ mmuai mɛgbe sɔ, "Kuira iito ikɛlɛ i katɔ̃ lɛ ato aɣɛ. Fɔ mɔmɔ kere nto awe ne i fɔ iti ame."

9 Ma ɔɖuɖu to mabie sɔ mapia bo ifɔ̃, mato mabu sɔ, "Ma nrɔɔ̃ aafɛ̃ i karabara iso iyɔ kaibawiri."

Ɣɛɛ lokparamakayi sɔ, "Kiniɔ ne pia wũ nrɔɔ̃ ɔle."

10 Iyi iwɛ̃ lopasa losɛ Semaya, Delaya ɔbibirɛrɛĩ, Mexetabel ɔwabirɛrɛĩ wɔ masɛ̃ mapia i ɔ̃ iyo kɔrɛ. Ɔɣɛ sɔ, "Tã bo gu-ɔ si bosɛ boasarɛ i Ɣaa isɔrɛyo kame, si bosɛ̃ isɔrɛyo akui. Fɔ matsirise to maba maaɖue-ɔ ku kasɛ̃."

11 Ɣɛɛ lotã wũ mmuai sɔ, "Mme, ɔrɛrɛĩ mɔmɔ lɛgbe aarui ɔtere? Ɣee ɔturi lɛ mme, si lotere losɛ loawɛrɛ i isɔrɛyo ame si loɖi wũ ngbã? Oɣoo, loibasɛ!" 12 Lotsue sɔ iiɖe Ɣaa ɔɖe losese wũ, ɣɛɛ ɔɖikanya ɔta ɔya me iso alasɔ Tobia gu Sanbalat mɛrɛ̃ ɔtã wũ sikã si ɔbara kumɛɔ. 13 Masu wũ ɔpaa si ɔpia me ifɔ̃ si lobara ikpi i ne ibara ame. Iyɔ mato maasu itɔ̃me nɛgbe manina me iyere mala maɔsɛ me i karɔ̃.

14 O wũ Ɣaa, nyigi Tobia gu Sanbalat ala nnɛ mabara ɔso. Si anyigi kanyaɖidzerɔ̃go Noadia gu kanyamaɖidze tsɔra, mma lola maɔbie sɔ mapia me ifɔ̃.

15 Ne ɔso mawiri ibere itsue karabara ku ma Hebrise kuwa Elul iyi sinyɔiruva iso. Karabara ɔɖuɖu ɔfɔ ayi siru-anyɔ. 16 Gɔ i bo matsirise ɔɖuɖu ɔnɔ sɔ boɔwiri ibere karabara ne, nɖebi ɔɖuɖu mɛ loki milɔ bo ɔnigã fiɛ maisifɔ so maɖe, alasɔ matsue sɔ bo Ɣaa lobuai bo iso ɔso karabara ɔwiri.

17 I ɔwi wɔmɔ ɔɖuɖu ame ne, ma Yudase makpakpaturi ɔla maɔtsɛrɛ siko maɔsese Tobia, fiɛ ɔ̃ ɔla ɔ̃ɔtã ma sɛ̃ mmuai. 18 Maturi gbodzoo ɔwe i ndamu kayirinɔ ku Tobia i Yuda. Ala ɔ̃ mase ɔɖe Sekania, Ara ɔbibirɛrɛĩ, fiɛ Tobia ɔbibirɛrɛĩ Yexoxanan ana ɔyiri Mesulam ɔbibirɔ̃gomi, Mesulam ɔɖe Berekia ɔbibirɛrɛĩ. 19 Maturi to maɖeika i ɔ̃ karabara sɛɛ iso i wũ kɔrɛ. Si irere nɛ lopia kanya loɣɛ ne ngbɔ ame mato maɣere wũ ne. Tobia ɔla ɔ̃ɔsese me siko ɔwi gbodzoo ɔsu ɔto ɔpia me ifɔ̃.