1 Eliasib wɔ nɖe sɔrɛdzekpakpa pelepele gu ɔ̃ masɔrɛdzelaa ɔta masɛ maabara karabara maledza Sɛrɛrerɔ̃ Kayogodɔ̃ itsue. Masekelera kã fiɛ ka mapia akui i wã kasɛkɔ̃, ne matsue ibere isɛ iabo Kulafa Adzarara kɔrɛ ne masekelera wã, ne masɛgu i katɔ̃ isɛ iabo ta Xananel Adzarara iso. 2 Yeriko marɛrɛ̃ ɔtsue ibere kasɛ ga nsiai, ne Zakur, Imri ɔbibirɛrɛĩ ka ɔtsue kasɛ ga losiai Yeriko marɛrɛ̃ ɔkpɛ.

3 Xasena mabibirɛrɛĩ ɔledza Ikpɛ Kayogodɔ̃ itsue. Masia kã sitsue ne mapia kã akui gu akuisokubɔrai gu kayogodɔsɛ̃sidziri i kɔ̃ kasɛkɔ̃. 4 Ɔturi wɔ ka loledza kasɛ ga nsiai nɖe Meremot, Uria ɔbibirɛrɛĩ, Xakoz ɔwabirɛrɛĩ. Ɔturi wɔ ka loledza ibere kasɛ ga nsiai Meremot ɔkpɛ nɖe Mesulam, Berekia ɔbibirɛrɛĩ, Mesezabel ɔwabirɛrɛĩ. Zadok, Baana ɔbibirɛrɛĩ ana ka loledza kasɛ ga nsiai. 5 Tekoa marɛrɛ̃ ka loledza ibere kasɛ ga losiai. Ɣɛɛ Tekoa makpakpaturi ɔsɛ̃ maipia kɔrɔ̃ i karabara ga i ma manyɔisose ɔtã ma.

6 Yoyada, Pasea ɔbibirɛrɛĩ gu Mesulam, Besodeya ɔbibirɛrɛĩ nɖe maturi ma loledza Yesana Kayogodɔ̃. Masia kã sitsue ne mapia akui gu akuisokubɔrai gu kayogodɔsɛ̃sidziri i kɔ̃ nsɛkɔ̃. 7 Mma ka loledza ibere kasɛ ga ka losiai nɖe marɛrɛ̃ ma lobɔrɛ i Gibeon gu Mizpa - Melatia, Gibeonse gu Yadon wɔ lobɔrɛ i Meronot - ngɔi mɛ lowe i Frat kuɣɛ̃kabokɔ̃ Ibuiti nyɔisose iɖeiso kayirinɔ. 8 Uziel, Xarxaya ɔbibirɛrɛĩ, wɔ nɖe sikãrɛtɛatorese ɔwɛ̃, loledza kasɛ ga nsiai Melatia mɛrɛ̃ ɔkpɛ. Ne Xanania wɔ nɖe ngarãdu mabaradze ɔwɛ̃ ka loledza ngbegɔ losiai. Maledza Yerusalem isɛ iabo Ibere Bɛbɛɛbɛa iso. 9 Refaya, Xur ɔbibirɛrɛĩ, wɔ loɖe Yerusalem ibuiti kasɛ kawɛ̃ ɔɖeisoi ka loledza ibere kasɛ ga losiai. 10 Kasɛ ga losiai ngagbe ne, Yedaya, Xarumaf ɔbibirɛrɛĩ ka loledza kasɛ ga nto kanyɔ ɔ̃ iyo isɛ. Ne Xatus, Xasabneya ɔbibirɛrɛĩ ka ɔledza kasɛ ga losiai. 11 Malkiya, Xarim ɔbibirɛrɛĩ gu Xasub, Paxat Moab ɔbibirɛrɛĩ ka ɔledza kasɛ mama gu Sikpo Adzarara. 12 Salum, Xaloxes ɔbibirɛrɛĩ wɔ loɖe Yerusalem ibuiti kasɛ tsɔra nyɔisose, ka loledza ibere kasɛ ga ka losiai. Ɔ̃ mabibirɔ̃gomi ɔbuai wũ iso i ne ibara ame.

13 Xanun gu mma nsi i Zanoa ɔledza Kagbolomi Kayogodɔ̃. Maledza kã itsue, ne mapia akui i kanya fiɛ mapia akuisokubɔrai gu kayogodɔsɛ̃sidziri i kɔ̃ nsɛkɔ̃. Maledza ibere nɛ lokarã lɛ meta alafa ana gu siru isɛ iabo Aku Kayogodɔ̃.

14 Malkiya, Rekab ɔbibirɛrɛĩ wɔ nɖe Bet Xakerem nyɔisose loledza Aku Kayogodɔ̃. Ɔledza kã itsue fiɛ ɔpia kã akui gu kã akuisokubɔrai gu kayogodɔsɛ̃sidziri i kɔ̃ nsɛkɔ̃.

15 Salum, Kol Xoze ɔbibirɛrɛĩ, Mizpa ibuiti nyoisose ɔɖe loledza Ibiɔ Kayogodɔ̃. Ɔledza kã itsue, ɔbara isã fiɛ ɔpia kã akui gu akuisokubɔrai gu kayogodɔsɛ̃sidziri i kɔ̃ nsɛkɔ̃. Ɔtsue Siloam Iba ibere nɛ mpia i igara Kawĩmi kɔrɛ isɛ iabo asɛtiĩ wa loso abɔrɛ i igara David Ɔmagɛ̃siare ame. 16 Nexemia, Abzuk ɔbibirɛrɛĩ, wɔ nɖe Bet Zur ibuiti kasɛ kawɛ̃ ɖeisose loledza ibere itsue isɛ iabo kakɔi ga mpia i David akpibiɔ kanɔsɔ̃ kɔrɛ, ka ita i mmɔ ikɛlɛ iwo nɛ makuri makpesera iba kɔrɛ, ka isɛ iabo Mma lofɔ iyere Iyo kɔrɛ.

17 Ne kama ne ma Levise ma wũ maledza ibere i Rexum, Bani ɔbibirɛrɛĩ kayirinɔ. Xasabia wɔ nɖe Keila ibuiti kasɛ kawɛ̃ nyɔisose ɔledza kasɛ ga loba i Rexum ɔkpɛ kama. Ɔbara karabara gagbe ɔtã ɔ̃ ibuiti. 18 Ɔ̃ kama ne, ma kaɖemabi ka loledza i Binui, Xenadad ɔbibirɛrɛĩ kayirinɔ. Ɔɖe Keila ibuiti kasɛ tsɔra ɖeisose. 19 Nwɔ ka loledza ibere i Binui ɔkpɛ kama, nɖe Ezer, Yesua ɔbibirɛrɛĩ wɔ nɖe Mizpa ɖeisose. Ɔledza kasɛ mama, ita i ngbegɔ nto inyɔ kakui ikɛlɛ akpirakasɛkɔ̃ isɛ iabo ibere ɔyokã. 20 Baruk, Zabai ɔbibirɛrɛĩ loledza kasɛ ga loba i Ezer ɔkpɛ kama ku ɔdzegere, ita i ibere ɔyokã isɛ iabo sɔrɛdzekpakpa pelepele Eliasib iyo kabɔrɛnya. 21 Ɔ̃ kama ne, Meremot, Uria ɔbibirɛrɛĩ, Xakoz ɔwabirɛrɛĩ, ɔledza ibere kakɔi mama ana, ita i Eliasib iyo kabɔrɛnya isɛ iabo iyo kawirikɔ̃.

22 Ɔ̃ kama ne masɔrɛdze ma i abuiti wa i ndɛ̃mɔ ɔledza kasɛ ga nsiai. 23 Benyamin gu Xasub ɔledza kasɛ ga losiai i ma iyo katɔ̃. Ne Azaria wɔ nɖe Maaseya ɔbibirɛrɛĩ, Anania ɔwabirɛrɛĩ ɔɖe loledza kasɛ ga i ɔ̃ iyo kuruɛ. 24 Binui, Xenadad ɔbibirɛrɛĩ, loledza kasɛ ga losiai. Kasɛ gagbe ɔta i Azaria iyo kɔrɛ isɛ iabo ibere ɔyokã iso. 25 Ne Palal, Uzai ɔbibirɛrɛĩ lobara karabara i kasɛ ga mpia i kanɔsɔ̃ isɛ ku kato isɛ adzarara wa mpia i igara kawekɔ̃ imatã i madzuɛ̃se kasɛkɔ̃ inyamɔ. Palal kama ne, Pedaya, Paros ɔbibirɛrɛĩ 26 gu isɔrɛyo maɖabo ma nsi i Ofel kabemi iso ka losiai maledza ibere isɛ iabo kakɔi ga mpia i Ndu Kayogodɔ̃ kanɔsɔ̃ to ikɛlɛ Adzarara siĩa i kuɣɛ̃kabɔrɛkɔ̃ isɛ.

27 Tekoa marɛrɛ̃ ka loledza kasɛ ga losiai i isɔrɛyo maɖabo kama. Marɛrɛ̃ ɔbara karabara ita i ibodɛ̃ mama iso, ita i Adzarara siare wa lobɔrɛ piriri katɔ̃ isɛ iabo Ofel ibere kɔrɛ.

28 Masɔrɛdze ɔledza ibere ita i Ipɔngɔ Kayogodɔ̃ katikpe ikɛlɛ. Ma ɔbiara ɔledza kasɛ ga mpia i ɔ̃ mɔmɔ iyo katɔ̃. 29 Ma kama ne Zadok, Imer ɔbibirɛrɛĩ ɔledza kasɛ ga nto kanyɔ ɔ̃ iyo anɔ. Ɔ̃ kama ne Semaya, Sekania ɔbibirɛrɛĩ wɔ nɖe Kuɣɛ̃kabɔrɛkɔ̃ Kayogodɔ̃ dzuɛ̃se ɔ̃ wũ ɔledza ibere kasɛ. 30 Ɔ̃ kama ne Xanania, Selemia ɔbibirɛrɛĩ ka loledza kasɛ kawɛ̃ ne Xanun wɔ nɖe Zalaf ɔbibirɛrɛĩ kuɔva ɔledza kasɛ mama. Ma kama ne Mesulam, Berekia ɔbibirɛrɛĩ ɔledza ngbegɔ mpia i kanɔsɔ̃ ku ɔ̃ kawekɔ̃ ayo. 31 Sikãrɛtɛ̃atorese ɔwɛ̃ Malkiya, ɔɖe ka loledza kasɛ ga nsiai Mesulam ɔkpɛ isɛ iabo isɔrɛyo maɖabo gu kuɣamaɖese iyo kɔrɛ, i Kakɔinyɔ Kayogodɔ̃ kanɔsɔ̃, ikɛlɛ isɛ iabo i kayoi ga mpia i ɔyokã kato. 32 Sikãrɛtɛamatorese tsɔra gu kuɣamaɖese ɔledza ibere katsɔrakɔ̃. Kasɛ gagbe ɔta i iyo nɛ i ibere ɔyokã kato kɔrɛ isɛ iabo Sɛrɛrerɔ̃ Kayogodɔ̃ iso.