1 Ɔwi ɔwɛ̃ i Nisan* kuwa i Artaxsasta sigara ɔɖewi ikɔ sinyɔva ame ne, gɔ mabɔ ndã ne, mme losu fiɛ losɔrɛ̃ me lotã igara. Loikpo so i ɔ̃ anɔmi ame lonya fiɛ. 2 Ne ɔso igara ɔkarɛ me sɔ, "Be lotã anyɔ kpaã i anɔ gɔ aito anyɛ? Nnɛgbe iiɖe kuira, ɣɛɛ ato amararã so i ɔtu ame."

Lonigã gbaã, 3 ɣɛɛ loɣere igara sɔ, "Igara si ɔsɛ ngbã ɔwi daaro! Ɔmagɛ̃ wɔ ame mabiara wũ mawa ɔɔkpese ikpakpi, fiɛ ɔtɔ ana ɔtsuedza ɔmagɛ̃ kuyogodɔ̃. Be ɔso fiɛ loibakpo so ku anɔ?"

4 Igara ɔkarɛ me sɔ, "Be ato abie sɔ lobara lotã-ɔ?"

Kere ne lokparamakayi lotã kato Ɣaa, 5 ne lotã igara mmuai sɔ, "Si iɖe igara kuɖɔɛ fiɛ fɔ ɔɖabo ara ɔbo-ɔ anɔ ne, iyɔ tã ɔsese me i ɔmagɛ̃siare ame i Yuda, si losɛ loaledza ngbegɔ mabiara wũ mawa, iɖaɛ."

6 Gɔ i igararɔ̃go si i igara kɔrɛ ne ɔkarɛ me sɔ, "Ayi arɛ̃ aasu asɛ ɔri? Si asɛ ne, iɖe ɔwi wɔ ame aakpese aba?" Iɖe igara kuɖɔɛ sɔ ɔ̃asese me ne losɛ ɔwi ne.

7 Loɣere wũ ana sɔ, "Si iɖe igara kuɖɔɛ ne, tã matsɛrɛ siko mapia me i kɔrɔ̃ si lokɛlɛgu Frat kuɣɛ̃kabokɔ̃ Ibuiti ame manyoisose, si maatã me ɔri loki i ma karɔ̃ ame lokɛlɛ Yuda. 8 Lokarɛ ɔko wɔ loala lokɛlɛgu Asaf, igara ipo nyɔisose ana, si ɔ̃atã me adziri losu lowe kuyogodɔ̃ sitsue, lotã ɔlekasɛkɔ̃ ga mpia i isɔrɛyo kɔrɛ gu ɔmagɛ̃siare abere gu iyo nɛ ame loawe." Igara ɔtɔrã ɔsia i nwa lokarɛ iso, alasɔ wũ Ɣaa abualɛ kɔrɔ̃ ɔsia me iso ɔso. 9 Ne ɔso loso ɔri lokɛlɛ Frat kuɣɛ̃kabokɔ̃ Ibuiti manyoisose kɔrɛ, losu igara siko lotã ma. Igara ɔɔsese me makpakpɛ̃dze makpakpa mawɛ̃ gu pɔngɔmakpakpɛ̃dze mawɛ̃ makɛlɛgu me ana.

10 Ɔwi wɔ i Sanbalat, Xoronse gu ɔ̃ buaidze Tobia wɔ nɖe Amon ɔkpakpa ɔnɔ nnɛgbe ne, ikpɛ̃ ma sikpã sɔ ɔturi ɔɔba ɔto ɔ̃abara isɛɛ ɔtã Israel mabi.

11 Lorui lokɛlɛ Yerusalem, gɔ lowe i mmɔ ayi atɛ kama ne, 12 iyi tɛare ku kasɛ̃ ame ne loɣo ɔri ku marɛrɛ̃ mawɛ̃. Loiɣere kuwɛ̃ ira nɛ i wũ Ɣaa ɔsu ɔsia i wũ ɔtu iso sɔ lobara lotã Yerusalem. Mabɔi kumawɛ̃ iiwe iɖo nwɔ iso loto losɛ.

13 Kasɛ̃ gamɔ ne loki i Kagbolomi Kayogodɔ̃ kanya losɛ loabo i Iboroi Ibiɔ kɔrɛ, losɛ katɔ̃ losɛ loabo i Aku Kayogodɔ̃ kɔrɛ. Gɔ lokiki ne, lonyɔ Yerusalem abere wa mabiɛ mafere i karɔ̃ gu kuyogodɔ̃ gɔ i ɔtɔ ɔtsuedza losɛ ikpo. 14 Kere ne losɛ lokɛlɛ katɔ̃ lobo i Ibiɔ Kayogodɔ̃ gu i Igara Iba kɔrɛ, ɣɛɛ kukakɔi siina i abereku ndɛ̃ gɔ wũ bɔi aawo ɔki. 15 Ne ɔso loya loki kagbolomi ame ku kasɛ̃, lola loɔnyɔ ibere kukaakɔ. Katsɔrakɔ̃ ne, lopɛ lofiriki lokpese losɛ loaki i Kagbolomi Kayogodɔ̃ kanya fiɛ lobo i ɔmagɛ̃siare ame. 16 Makpakpa iiɣe ngbegɔ lokɛlɛ ɣee nnɛ losɛ nto lobara, alasɔ ipɛ ɔwi wɔmɔ ne, loiɣere ma Yudase ɣee masɔrɛdze ɣee makpakpaturi ɣee maturi mama ma loabara karabara ndɛ̃ kuwɛ̃ kuira tɔtɔ.

17 Kere ne ka loɣere ma sɔ, "Minyɔ kumɛgɔ bopia i kukpakpi ame, gɔ Yerusalem ɔɔkpese ikpakpi fiɛ ɔtɔ ɔɔtsuedza ɔ̃ kuyogodɔ̃. Miba, si boledza Yerusalem abere itsue si boisibawe i kunuarɛ siare ame." 18 Loɣere ma kumɛgɔ i Ɣaa abualɛra piagu me, gu nnɛ i igara ɔ̃ɔɣere me ana.

Matã mmuai sɔ, "Mitã botsɛ ibere iledza itsue." Ne ɔso masɛ karabara sɛɛ gagbe karɔ̃.

19 Ɣɛɛ gɔ Sanbalat Xoronse, gu Tobia wɔ nɖe Amon ɔkpakpa gu Arabse wɔ marɔ sɔ Gesem ɔnɔ itɔ̃me nɛgbe ne, mabara bo aɣiãra fiɛ mama bo. Makarɛ bo sɔ, "Be iɖe mito mibara?" Ɔta mito mita miya i igara iso?"

20 Lotã ma mmuai sɔ, "Kato Ɣaa to ɔ̃atã bo isaruɛ. Bo ɔ̃ maɖabo aata boledza ibere itsue. Ɣɛɛ mi ne, mina kuira nɛ miate i Yerusalem ame kiniɔ sɔ iɖe mi ire fiɛ kuira na maasu manyigi mi lɛ mi kaɖekɔ̃ i ne ame."