1 Iyi nɛmɔ iso ne maka Mose Mmara Ɔko matã kaɖe teteree gɔ manɔ. Ne manya sɔ matsɛrɛ i kakɔi kawɛ̃ sɔ maadatã ma Amonse ɣee ma Moabse kuwɛ̃ ɔri sɔ ɔba i Ɣaa iturikuri ame kuiyikuiyi. 2 Ala ne, maiba maasarɛgu Israel mabi ku araɖea gu ndu i ma irisɛ ame. Ɣɛɛ ne masɛ maawanyi Balaam sɔ si ɔgbarĩ Israel mabi. (Ɣɛɛ bo Ɣaa ɔfirikira sigbarĩ sikpese kusɛkusɛ.) 3 Gɔ i Israel mabi ɔnɔ mmaraisi mɛgbe ne maɖi mafɔ sikparɛ ma pelepele mpia i ma ndɛ̃ masɛ ise.

4 Tɔtɔ ne, masu ara kakɔlakɔ̃ ayo wa i bo Ɣaa iyo inyɔiso mapia i sɔrɛdze Eliasib kayirinɔ. Gɔ i Eliasib ɔturi loɖe Tobia ne, 5 ɔɖi iyo nɛ lomɔ ɔtã Tobia. Iyo nɛgbe ame saa ne, mala maɔsɛ geɖebu asɔrɛ gu kuakɔrɔ̃kɔrɔã, isɔrɛyo arɔi gu akɔi gu geɖebu araɖea, wain ɣɛtɛ, nnɔĩ akaweova wa nɖe ma Levise, akamakadze, kayogodɔ̃madzuɛ̃se gu ara wa masɛ mato matã masɔrɛdze.

6 Ɣɛɛ gɔ i ara wagbe to akɛlɛ i katɔ̃ ne, loiwe i Yerusalem. Loɔkpese lokɛlɛ Babilon igara Artaxsasta kɔrɛ ku ɔ̃ sigara ɔɖewi ikɔ sitɛnyɔare ame. Ɔwi kama ne lokarɛ wũ ɔri 7 ne lokpese loba Yerusalem ne. Ɔwi wɔgbe ame loba loanya iranyanyariã nɛ i Eliasib ɔbara, i kumɛgɔ ɔtã Tobia iyo i Ɣaa iyo kasɔrɛkɔ̃ ame. 8 Iiwe me ɔmɛrɛ̃ ɖuɖuuɖu ne loɖi Tobia iyo ara ɔɖuɖu lobɔrɛgu i iyokame lopɛyu i inyamɔ ne. 9 Lotã silɔ sɔ masekelera kuyoi, ne ka losu Ɣaa iyo ara gu geɖebu asɔrɛ gu kuakɔrɔ̃kɔrɔã losɛ i ne ame.

10 Loba loanɔ sɔ aratoa wa nɖe ma Levise ɔkpɛ ne maisu matã ma. Ne iti ma Levise ɔɖuɖu gu akamakadze ma nsɛ mabara kasumu karabara ɔɔkpese makɛlɛ ma mɔmɔ nkpɛkɔ̃ ame. 11 Ne ɔso lonyagalagu makpakpa ne lokarɛ ma sɔ, "Be ɔso minyua Ɣaa iyo misɛ?" Kere ne lokpere ma Levise gu akamakadze losakanya fiɛ lotã ma mawe i ma nsɛkɔ̃.

12 Ne Yuda maturi ɔɖuɖu ɔsu ma geɖebu ɔraɖui, wain gu nnɔĩ akaweova mabɔ i arakukɔlakɔ̃ ne. 13 Loɖi sɔrɛdze Selemia, ɔkotsɛrɛdze Zadok gu Levise wɔ marɔ sɔ Pedaya, ne losu arakukɔlakɔ̃ ayo inyɔiso lopia i ma nrɔɔ̃ ame. Loɖi Zakur ɔbibirɛrɛĩ Xanan, ɔɖe Matania ɔwabirɛrɛĩ, si ɔla ɔ̃abuai ma. Loɖi mmagbe alasɔ maturi sɛ manyɔ ma sɔ maba ɔnukuare. Losɛra ma sɔ mala maɔɣɛ ara wa maturi ɔto maɔtã ma manyii.

14 O wũ Ɣaa, nyigi me i nnɛgbe ame, daakpa anɔmi afu i ira nɛ lobara ku ɔnukuare lotã Ɣaa iyo gu kasumu i ne ame.

15 Ɔwi wɔmɔ ame i Yuda ne, lonya maturi to mawa ndã ku iwarãyi iso, mawɛ̃ to masu kamɔ masorera mafiripɔngɔ isu ibua wain, wain abi, aboi, gu ato agbãagbã. Ne mato masu ara wagbe ɔɖuɖu mabɔ i Yerusalem ku Iwarãyi iso. Ne ɔso losi ma mmara i araɖea irɔdɛ̃ ku iyi nɛmɔ iso. 16 Ma Tirose ma lowe i Yerusalem sɛ masu akpɛ gu ara mama mabɔ maarɔdɛ̃ matã ma Yudase ku iwarãyi i Yerusalem. 17 Lonyagalagu Yuda makpakpaturi fiɛ loɣere ma sɔ, "Mme ɔtile ira iɖe mito mibara i ngbe - mito mipukutura iwarãyi? 18 Iiɖe ara wagbe i mi mawa ɔbara ɔso i Ɣaa ɔtã kukpakpi ɔɖuɖu gɔgbe ɔba i bo iso gu ɔmagɛ̃siare wɔgbe iso ɣɛɛ? Kiniɔ ne ka mito mirɛgɛ̃ra sikpã mibua sɔ siba i Israel iso iki Iwarãyi ipukutura iso."

19 Gɔ i kuɣɛ̃ ɔɔna kuto kubo iyo ku kutsuɛ fiɛ iwarãyi ne, losi mmara sɔ masɛ̃ Yerusalem kuyogodɔ̃ si madaabusi kɔ̃ gbɔgbɔɔgbɔ Iwarãyi aafe. Lotã wũ mɔmɔ marɛrɛ̃ mawɛ̃ ɔya i kuyogodɔ̃ kanya gɔ maibatã kuwɛ̃ ɔri sɔ ɔbogu ato kuawɛ̃ i ɔmagɛ̃ ame ku Iwarãyi iso. 20 Kuɣamaɖese gu ara agbãagbã marɔdɛ̃se sɛ makamu marɛ i Yerusalem kama ɔkpɛ ɔwɛ̃ ɣee inyɔ. 21 Ɣɛɛ losi ma mmara loɣere ma sɔ, "Be ɔso miba miakamu i ibere kama mirɛ? Si miledza ne ibara ne loamɔɛ̃ mi." Ita i ɔwi wɔmɔ iso ne maisiba ku Iwarãyi iso. 22 Kere ne loɣere ma Levise sɔ masekelera so si masɛ maadzuɛ̃ kuyogodɔ̃, si itã sɔ maabara Iwarãyi sekelee.

O wũ Ɣaa, nyigi si abara isɛɛ atã me i nnɛgbe ɔso ana, si anyɔ me nnya i fɔ kuɖɔɛ siare kanya.

23 Ɣɛɛ lonya loɖiite i ɔwi wɔmɔ ame ana sɔ Yuda marɛrɛ̃ mawɛ̃ ɔɔyiri marɔ̃go mabɔrɛgu Asdod, Amon gu Moab. 24 Ma mabi kasɛ sɛ maɣɛ Asdod siɖe ɣee kaɖe karere maturi siɖe, ɣɛɛ maisɛ mawo Yuda siɖe ɔɣɛ. 25 Losi ma mmara, logbarĩ ma. Lopɛ ma mawɛ̃ fiɛ lorui ma siwɛrɛ̃. Lotã makã ndamu i Ɣaa iyere ame ne loɣere ma sɔ, "Midaasu mi mabibirɔ̃gomi mitã ma mabibirɛrɛĩ ɣee midaayiri ma mabibirɔ̃gomi mitã mi mabibirɛrɛĩ ɣee midaayiri ma mi mɔmɔ. 26 Iiɖe marɔ̃go magbe igbã iyiri ɔso i Israel igara Solomon ɔbara ikpi ɣɛɛ? Igara kuwɛ̃ iifɔ iyere i nɖebi gbodzoo ame lɛ Solomon. Ɣaa ɔɖɔɛ wũ fiɛ ɔtã ɔɖe sigara i Israel ɔɖuɖu iso, ɣɛɛ ɔ̃ kɔraa ne, mafɔrɔ̃go ɔkɔ wũ mapia i ikpi ame. 27 Ito iakote sɔ boanɔ kiniɔ sɔ mi wũ ka mito mibara ɔtile siare ɔɖuɖu wɔgbe? Ito ialɛ sɔ miito miɖe ɔnukuare mitã Ɣaa iki i mafɔrɔ̃go iyiri ame ana?"

28 Yoyada ɔbibirɛrɛĩ ɔwɛ̃ wɔ nɖe Sɔrɛdzekpakpa Pelepele Eliasib ɔwabirɛrɛĩ, ɔyiri Sanbalat Xoronse ɔbibirɔ̃gomi. Ne losa wũ loɖi i wũ kɔrɛ.

29 O wũ Ɣaa, fɔ anɔ si asia i ma iso ala kumɛgɔ mapukutura sisɔrɛdzeiɖe gu ndamu mɛ mpia i mi gu masɔrɛdze gu ma Levise ndɛ̃.

30 Ne ɔso losekelera masɔrɛdze gu ma Levise loɖi i irabiara nɛ loɖe mafɔ gu ma kubarara ame. Ne lotã ma ɔbiara ɔ̃ mɔmɔ karabara ne. 31 Lonyɔ sɔ mato ndɔrɛ̃ fiɛ matã ɔraɖui ɖeakatɔ̃ ku ɔwi wɔ masɛ iso.

O wũ Ɣaa nyigi me si wũ ara si abo-ɔ anɔ.