1 Samuel atɔ̃me wa ɔpɛ imomo ɔsɛ kakɔi biara i Israel maturi ndɛ̃.

Kiniɔ ne, Israel mabi ɔta kakpã i ma Filistise iso. Israel mabi ɔbara kasɛkɔ̃ i Ebenezer kɔrɛ fiɛ ma Filistise ɔbara ma ɔkpɛ i Afek. 2 Ma Filistise ɔtagu ma makpakpɛ̃dze masarɛgu Israel mabi, kakpã ɔbɛ gbaã. Ne ma Filistise ɔɖe Israel mabi iso fiɛ maɖoe lɛ maturi kukpi kuna i kakpãkpɛkɔ̃. 3 Ɔwi wɔ i makpakpɛ̃dze ɔkpese makɛlɛ kasɛkɔ̃ ne, Israel makpakpa ɔkarɛ ma sɔ, "Be ɔso i Bosate ɔtã ma Filistise ɔɖe bo iso nɔme? Mitã bosɛ boasu Bosate Ndamu Aɖaka i Silo bobɔ. Si aasɛgu bo fiɛ aaɖi bo i matsirise nrɔɔ̃ ame.

4 Ne ɔso makpakpɛ̃dze ɔsese maturi Silo, ne masɛ maasu Bosate Ɔlesate Ndamu aɖaka, nwɔ nsi i makerubi ndɛ̃ mabɔ. Eli mabibirɛrɛĩ inyɔ, Xofni gu Pinexas, ana ɔwe i mmɔ ku Ɣaa ndamu aɖaka.

5 Ɔwi wɔ i ndamu aɖaka ɔba aabo i kasɛkɔ̃ ne, Israel mabi ɔɖuɖu ɔlakulu ku isoɣɔ teteree sɔ karɔ̃ ɔti. 6 Gɔ ma Filistise ɔnɔ kulu ne makarɛ sɔ, "Be ɔso kulu teteree gɔgbe to i ma Hebrise kasɛkɔ̃?"

Gɔ maba maatsue sɔ Bosate ndamu aɖaka masu mabɔ i kasɛkɔ̃ ne, 7 ifɔ̃ ɔmɔɛ̃ ma Filistise gbaã. Maɣɛ sɔ, "Kuɣɔ ɔ ɔɔba kuabo i kasɛkɔ̃ ame. Boɔre nrɔɔ̃! Nnɛgbe igbã iiba inya. 8 Ndzo mitã bo! Nna loaɖi bo ɔbɔrɛgu i aɣɔ wa mba ɔle nrɔɔ̃ ame? Aɣɔ wagbe lobɔ sinyɛpɛ̃ agbãagbã i ma Egiptese iso i fafuĩ ame ne. 9 Ma Filistise, miwe katetere! Mibara lɛ marɛrɛ̃, si iiɖe ngbɔ ne miakpese ma Hebrise masande lɛ kumɛgɔ ma wũ maɔɖe bo masande manya awe. Mita lɛ marɛrɛ̃ awe, si mikpɛ̃ kakpã!"

10 Ne ɔso ma Filistise ɔkpɛ̃ kakpã ne maɖe Israel mabi iso, ma ɔrɛrɛ̃ biara ɔtere ɔkɛlɛ ɔ̃ ikpayo ame. Maturi gbodzoo ɔrɔ̃ kakpã. Maɖoe Israel makpakpɛ̃dze ma nsɛ masɛ i ngba iso kukpi sitɛ. 11 Mamɔɛ̃ Ɣaa ndamu aɖaka mafɔ fiɛ maɖoe Eli mabibirɛrɛĩ inyɔ, Xofni gu Pinexas ana.

12 Iyi nɛmɔ ame ne, ɔrɛrɛ̃ ɔwɛ̃ wɔ lobɔrɛ i Benyamin kamele ame, ɔtere ise ɔbɔrɛ i kakpã ame ɔkɛlɛ Silo. Awu ɔkɛkɛ i ɔ̃ iso fiɛ ɔsebu ɔwe i ɔ̃ iti ame. 13 Gɔ ɔrɛrɛ̃ ɔba ɔ̃abo ne, mmɔ i Eli ka ɔ̃ɔkpase ɔsi i iyara iso i ɔri kuruɛ ɔla ɔ̃anyɔ ɔri iso alasɔ Ɣaa ndamu aɖaka ɔtã sɔ ɔ̃ ɔtu iito ɔsɛ i karɔ̃. Gɔ nwɔmɔ ɔbo i ɔmagɛ̃ ame fiɛ ɔɣɛ nnɛ loba ne, maturi ɔbiɛ teteree i ɔmagɛ̃ ɔɖuɖu ame.

14 Eli ɔnɔ kulu ne ɔkarɛ sɔ, "Be loba kulu to kumɛɔ?

Ɔrɛrɛ̃ ɔpɛsiwa ɔkɛlɛ Eli kɔrɛ. 15 Ɔwi wɔmɔ ame ne, Eli ɔɔfɔ akɔ kasiwɛ̃-fafarana fiɛ anɔmi ɔɔbiɛ wũ, ne ɔso ɔ̃isito ɔnya ara. 16 Ɔrɛrɛ̃ ɔɣere Eli sɔ, "Ɔtere lorui lotere i kakpã kanya, lotere loba loabo ku nɔme." Eli ɔkarɛ wũ sɔ, "Wũ ɔbi, be loba?"

17 Ɔrɛrɛ̃ wɔ lobɔ itɔ̃me ɔtã mmuai sɔ, "Israel mabi ɔrui matere i ma Filistise kanya, makpakpɛ̃dze ikuri ɔyu mabo gɔ maturi gbodzoo ɔkpi. Ana ne fɔ mabibirɛrɛĩ inyɔ, Xofni gu Pinexas ana ɔkpi, fiɛ ma Filistise ɔmɔɛ̃ ndamu aɖaka mafɔ maruigu."

18 Gɔ ɔrɛrɛ̃ ɔkpere Ɣaa ndamu aɖaka fiɛ Eli ɔnɔ kere, ɔrɔ̃ simasima i iyara iso i kayogodɔ̃ kanya. Simɔ ɔkarã i karɔ̃ sifɛ̃ ne ɔkpi alasɔ ɔ̃ɔkpa katɔ̃ fiɛ ɔwe ɔrɔrã ana. Ɔkɔ Israel kaɖe akɔ sina.

19 Ɔwi wɔgbe ame ne, Eli ɔbire, Pinexas ɔre, wɔ lola kayiri ne, ka ɔɔbe gɔ ɔbiɣewi ɔro ɔɔɣo. Ne gɔ ɔnɔ atɔ̃me sɔ mamɔɛ̃ Ɣaa ndamu aɖaka mafɔ, ɔ̃ ɔrãse gu ɔ̃ ɔrã ɔɔkpi ne, kayiri ɔtsɛ wũ iɖoɖo ɔluwɛ̃, ne ɔɣe ɔbi ɣɛɛ kuɣe ibo ɔɖo wũ. 20 Gɔ ɔto ɔkpi ne, marɔ̃go ma nto maɣera wũ ɔɣere wũ sɔ, "Daanigã; ɔbirɛrɛĩ aɣe." Ɣɛɛ ɔ̃itã mmuai ɣee ɔ̃ibara kuira.

21 Ɔtã ɔbirɛrɛĩ iyere sɔ Ikabod, ɔɣɛ sɔ, "Ɣaa ikpawaĩ ɔɔrui i Israel kɔrɛ" - alasɔ mamɔɛ̃ Ɣaa ndamu aɖaka mafɔ fiɛ ɔ̃ ɔrãse gu ɔ̃ ɔrã ana ɔkpi. 22 Ɔɣɛ sɔ, "Ɣaa ikpawaĩ ɔɔrui i Israel kɔrɛ, alasɔ mamɔɛ̃ Ɣaa ndamu aɖaka mafɔ."