1 SAMUEL 29

Axis Ɔkpesera David Ɔsese Ziklag

1 Ma Filistise ɔsira ma makpakpɛ̃dze ɔɖuɖu kanya i Afek, ne Israel maturi ɔbara kasɛkɔ̃ i ndu godɛã kɔrɛ i Yezrel. 2 Gɔ ame i ma Filistise maɖeisoi gu ma makpakpɛ̃dze ɔsɛ mabɔrɛ i ma akuri ame, mawɛ̃ kulafa fiɛ mawɛ̃ kakpi ne, David gu ɔ̃ marɛrɛ̃ ɔsɛ masiai i Igara Axis i kama isɛ. 3 Ma Filistise makpakpɛ̃dze makpakpa ɔnya ma ne makarɛ sɔ, "Be i ma Hebrise to mabara i ngbe?"

Axis ɔtã mmuai sɔ, "David wɔ loɖe Israel Igara Saul ɔkpakpa ɔɖe. Ka ɔpia i wũ kɔrɛ koko lɛ ikɔ gu kama, fiɛ ita i iyi nɛ ɔrui i Saul kɔrɛ iba iabo nɔme ne, loinyagu wũ iɣɛrɛ kuiwɛ̃."

4 Ɣɛɛ ma Filistise makpakpɛ̃dze makpakpa ɔnagu Axis sikpã gbaã ne maɣɛ sɔ, "Kpesera ɔrɛrɛ̃, si ɔkɛlɛ ɔmagɛ̃ wɔ atã wũ ame. Iikote sɔ ɔ̃akɛlɛgu bo i kakpã ame, si iiɖe ngbɔ ne ɔto ɔ̃apɛ ɔfiriki ɔkpɛ̃ bo i kakpã ame. Ɔto ɔ̃aledza ɔ̃ sate anɔ ibo iɖo si ɔtutu bo maturi ati. 5 Iiɖe David wɔgbe iso mato matɔ, maɖi ɔnɔ sɔ,

" ' Saul ɔɔɖoe ɔ̃ kukpi kukpi,

fiɛ David ɔ̃ kukpi kuweo kukpi kuweo'?"

6 Ne ɔso Axis ɔkpere David ne ɔɣere wũ sɔ, "Lokã Bosate sɔ, ɔɔɖe ɔnukuare, tee iawe me ɔmɛrɛ̃ sɔ aawe i wũ makpakpɛ̃dze ame. Ita i ɔwi wɔ aba i wũ kɔrɛ ipɛ nɔme ne, loinyagu-ɔ iɣɛrɛ kuiwɛ̃, ɣɛɛ maɖeisoi iitɔrã masia i fɔ iso. 7 Kpese si akɛlɛ i isobuɛ ame; daabara kuira nɛ loibawe ma Filistise maɖeisoi ɔmɛrɛ̃." 8 David ɔkarɛ Axis sɔ, "Be lobara? Mme iɣɛrɛ anya i fɔ ɔɖabo iso ita iyi nɛ loba iba iapɛ nɔme? Be ɔso loibasɛ loakpɛ̃ wũ sate igara matsirise?"

9 Axis ɔtã David mmuai sɔ, "Loɣe sɔ abo me anɔ lɛ Ɣaa kpabo awe; ɣɛɛ ma Filistise maɖeisoi ɔɣɛ sɔ, 'Iikote sɔ ɔ̃asɛgu bo kakpã ame.' 10 Ne ɔso ta mala ku fɔ sate maɖabo ma lobagu-ɔ si mirui ku kaya si kaɖe ɔna kasɛ̃."

11 Ne ɔso David gu ɔ̃ maturi ɔta mala ku kaya makpese makɛlɛ ma Filistise karɔ̃ ame. Ne ma Filistise ɔkɛlɛ Yezrel ne.