1 Saul ɔɣere ɔ̃ ɔbibirɛrɛĩ Yonatan gu ɔ̃ maɖabo ɔɖuɖu sɔ maɖoe David. Ɣɛɛ Yonatan ɔɖɔɛ David gbaã 2 ne ɔso ɔsɛ̃ wũ sɔ, "Tete to ɔbie ɔri wɔ ɔ̃aɖoe-ɔ. Dzuɛ̃ so ku kɔrãkaɖe kaya; kɛlɛ aabie kakɔi si awɛrɛ. 3 Nto loaɣere tete sɔ si bokɛlɛ karɔ̃ ame ngbegɔ apia. Nto loaɖe wũ ika i fɔ iso. Iyɔ loaɣere-ɔ irabiara nɛ lonya i ne ame."

4 Yonatan ɔɖe ɔ̃ ɔse Saul ika sɛɛ i David iso ɔɣere wũ sɔ, "Igara daabara ɔ̃ ɔɖabo David iraboa. Ɔ̃ibara-ɔ iraboa kuiwɛ̃ fiɛ nnɛ ɔbara ne iɖe kusia gbodzoo itã-ɔ. 5 Ɔsu ɔ̃ ngbã ɔpia i kukpi gu ngbã ndɛ̃ ɔwi wɔ ɔɖoe Filistise Goliat. Bosate ɔtã Israel kaɖe ɔɖuɖu iɖeiso siare, anya ne fiɛ ana isoɣɔ. Be ɔso aabara ɔturi lɛ David wɔ loiɣɛrɛ, iraboa iki sɔ aaɖoe wũ siefe?"

6 Saul ɔkã Yonatan atsue fiɛ ɔkã ndamu mɛgbe sɔ, "Lokã sɔ ayi kumɛgɔ i Bosate pia ngbã ne, maibaɖoe David."

7 Ne ɔso Yonatan ɔkpere David ne ɔɣere wũ irabiara nɛ maɣɛ. Ɔkɔ wũ ɔbɔ Saul, ne David ɔwe i Saul kɔrɛ lɛ ɔwiɔ.

8 Kakpã ɔtu ɔpɛ ɔkpɛ ɔwɛ̃ ana, ne David ɔbɔrɛ ɔsɛ ɔ̃akpɛ̃ ma Filistise. Ɔkpɛ̃ ma Filistise ku ɔle teteree igbã sɔ itã matere i ɔ̃ kanya.

9 Ɣɛɛ siwarã lalaa dzɛ lobɔrɛ i Bosate kɔrɛ ɔba i Saul iso gɔ ɔsi ɔto ifele i kɔrɔ̃ i iyo. Gɔ David to ɔsa siwɛ̃ sango ne, 10 Saul ɔbie sɔ si ɔtsue wũ ifele ɔmatãra i ibere iso. Ɣɛɛ David ɔkɔlɛ ɔɣo gɔ i Saul to ɔtsue ifele ɔpia i ibere ame. Kasɛ̃ gamɔ ne David ɔna ɔri ɔrui ɔtere.

11 Saul ɔsese makpakpɛ̃dze i David iyo. Ɔɣere ma sɔ madzuɛ̃ si maɖoe wũ ku kaya. Ɣɛɛ David ɔre Mixal, ɔsɛ̃ wũ ɔɣere wũ sɔ, "Si airui atere ku kasɛ̃ gagbe i fɔ ngbã iti ne, mato maaɖoe-ɔ ku kɔrãkaɖe." 12 Ne ɔso Mixal ɔbuai David iso ɔsora wũ ɔkigu i fesere kanya fiɛ ɔrui ɔtere. 13 Ne Mixal ɔsu irapɔa* ɔsu ɔrara i karɛkɔ̃ iso ɔfu ne arapia fiɛ ɔsu katepuĩ siwɛrɛ̃ ɔsia i iti kasiakɔ̃.

14 Ɔwi wɔ i Saul ɔsese ɔ̃ makpakpɛ̃dze sɔ masɛ maamɔɛ̃ David ne, Mixal ɔɣɛ sɔ, "Ɔto ɔnyɛ."

15 Ne Saul ɔledza makpakpɛ̃dze isese sɔ masɛ maanyɔ David, ne ɔɣere ma sɔ, "Mikɔ wũ i ɔ̃ karɛkɔ̃ iso mibɔ me si loaɖoe wũ." 16 Ɣɛɛ gɔ makpakpɛ̃dze ɔbo i iyo kame ne, manyɔ ne irapɔa nrɛ i karɛkɔ̃ iso fiɛ katepuĩ siwɛrɛ̃ se i iti kasiakɔ̃.

17 Saul ɔɣere Mixal sɔ, "Be ɔso asɔsɔla me ngbɔ fiɛ atã wũ tsirise ɔrui ɔtere?"

Mixal ɔtã wũ mmuai sɔ, "Ɔɣere me sɔ, 'Si aibuai me lorui lotere ne loaɖoe-ɔ.' "

18 Ɔwi wɔ i David ɔɔrui ɔtere ne, ɔkɛlɛ Samuel kɔrɛ i Rama ɔsɛ ɔ̃aɣere wũ nwa pelepele i Saul ɔɔbara wũ. Ne ma gu Samuel ɔkɛlɛ Nayot masɛ maawe i mmɔ. 19 Masɛ maaɣere Saul sɔ, " David pia i Nayot i Rama." 20 Ne ɔso ɔsese ɔ̃ makpakpɛ̃dze sɔ masɛ mamɔɛ̃ David. Ɣɛɛ gɔ manya kanyamaɖidze ikuri to maɖikanya fiɛ Samuel ɣɛ i mmɔ lɛ ma tɔ̃ɖedze ne, Ɣaa Siwarã ɔba i Saul maturi iso fiɛ ma wũ maɖikanya. 21 Maɣere Saul i ne iso, ne ɔsese makpakpɛ̃dze ɔbua ne ma maɖikanya ana. Saul ɔsese makpakpɛ̃dze ɔkpɛ tɛare ne ma wũ maɖikanya. 22 Kawirikɔ̃ ne, ɔ̃ mɔmɔ ɔrui ɔkɛlɛ Rama ne ɔkɛlɛ itawo siare i Seku. Ne ɔkarɛ sɔ, "Lɛ i Samuel gu David pia?"

Maɣɛ sɔ, "Mapia i Nayot i Rama."

23 Ne ɔso Saul ɔkɛlɛ Nayot i Rama. Ɣɛɛ Ɣaa Siwarã ɔba i ɔ̃ iso, ne ɔsɛ ɔto ɔɖikanya gbɔgbɔɔgbɔ ɔkɛlɛ Nayot ne. 24 Ɔkɛkɛ ɔ̃ arapia, ne ɔ̃ wũ ɔɖikanya i Samuel anɔ. Ɔɖi isɔ̃ ɔrɛ ɔla ibara ngbɔ ikpɛnɛ ɔɖuɖu ku kasɛ̃ ɔɖuɖu. Nnɛgbe ɔso i maturi sɛ maɣɛ sɔ, "Saul ɔ̃ wũ ne ɔpia i kanyamaɖidze ndɛ̃?"