1 Ɔwi wɔ maɣere David sɔ, "Nyɔ, ma Filistise to makpɛ̃gu Keilax maturi fiɛ mato mayu ma kamɔ i amɔtu ne," 2 David ɔkarɛ ɔnɔ i Bosate kɔrɛ sɔ, "Losɛ loakpɛ̃gu ma Filistise magbe?"

Bosate ɔtã wũ mmuai sɔ, "Kɛlɛ aata kakpã i ma Filistise iso si aɖi Keilax maturi."

3 Ɣɛɛ David marɛrɛ̃ ɔɣere wũ sɔ, "Bopia i Yuda ngbe kɔraa boto bonigã. Ito iawe bo ifɔ̃ gbaã si bokɛlɛ Keilax boakpɛ̃gu ma Filistise makpakpɛ̃dze!"

4 Ne David ɔledza Bosate ikarɛ ana, ne Bosate ɔɣere wũ sɔ, "Kɛlɛ Keilax, alasɔ nto loasu ma Filistise lopia-ɔ i nrɔɔ̃ ame." 5 Ne ɔso David gu ɔ̃ marɛrɛ̃ ɔkɛlɛ Keilax masɛ maakpɛ̃gu ma Filistise, masore ma iyomabɔi. David gu ɔ̃ marɛrɛ̃ ɔɖoe ma Filistise gbodzoo fiɛ ɔɖi Keilax maturi. 6 (Kiniɔ ne, Aximelek ɔbibirɛrɛĩ, Abiatar ɔɔsu masɔrɛdze ɔmearapia ɔbɔ ku ɔwi wɔ ɔtere ɔba David kɔrɛ i Keilax.)

7 Ɔnyiiɔ ɔɣere Saul sɔ David ka ɔkpa Keilax. Saul ɔɣɛ sɔ, "Ɣaa ɔɔsu wũ ɔpia i wũ nrɔɔ̃ ame, alasɔ David ɔɔtɛ̃ so ɔpia lɛ yorɛdze awe iki gɔ ɔbo ɔmagɛ̃ ku kuyogodɔ̃ gu isɛ̃sidziri." 8 Ne Saul ɔkpere ɔ̃ makpakpɛ̃dze ɔɖuɖu, si makɛlɛ Keilax masɛ maki malɔ mabo David gu ɔ̃ maturi iso.

9 Ɔwi wɔ i David ɔtsue sɔ Saul to ɔbara ɔriita adzuni i ɔ̃ iso ne, ɔɣere Abiatar sɔrɛdze sɔ, "Su ɔmearapia bɔ." 10 David ɔɣɛ sɔ, "O Bosate, Israel Ɣaa, fɔ ɔɖabo ɔɔnɔ sɔ Saul ɔɔbara adzuni sɔ ɔ̃aba ɔ̃awɔra Keilax ɔmagɛ̃ ala wũ ɔso. 11 Keilax kaɖemabi aaɖi me matã Saul? Saul to ɔ̃aba i ngbe lɛ lonɔ? O Bosate Israel Ɣaa, Loto-ɔ i kukpa ɣere fɔ ɔɖabo."

Ne Bosate ɔɣɛ sɔ, "Ɔto ɔ̃aba."

12 David ɔledza ikarɛ ana sɔ, "Keilax kaɖemabi aaɖi bo gu wũ marɛrɛ̃ matã Saul?"

Ne Bosate ɔtã mmuai sɔ, "Mato maaɖi-ɔ matã."

13 Ne ɔso David gu ɔ̃ marɛrɛ̃ lɛ alafa akuɔ, ɔrui i Keilax, mala maɔta i kakɔi kawɛ̃ makɛlɛ kakɔi mama. Gɔ Saul ɔnɔ sɔ David ɔɔpia kama ɔbɔrɛ i Keilax ne, Saul iisikɛlɛ mmɔ.

14 David ɔwe i fafuĩ ame kuwɛrɛkɔ̃ gu i kubemi ame i Zif fafuĩ ame. Saul ɔla ɔ̃abie wũ ku iyi biara, ɣɛɛ Ɣaa iisu David ɔpia wũ i nrɔɔ̃ ame.

15 Ɔwi wɔ i David ɔwe i Xores i Zif Fafuĩ ame ne, ɔnɔ sɔ Saul sɛ i ɔri ɔto ɔba Zif; si ɔba ɔ̃aɖoe wũ. 16 Ne Saul ɔbibirɛrɛĩ Yonatan ɔkɛlɛ David kɔrɛ i Xores ɔsɛ ɔ̃apia wũ katetere sɔ ɔwe ɔle i Ɣaa ame. 17 Ɔɣere wũ sɔ, "Daanigã, wũ ɔse Saul iibasia kɔrɔ̃ i fɔ iso. Ato aaɖe igara i Israel fiɛ mme losiai i fɔ kama. Saul, wũ ɔse mɔmɔ ana kɔraa ɣe nnɛgbe." 18 Yonatan gu David ɔbara ndamu i Bosate anɔ. Ne Yonatan ɔkɛlɛ kaa, ɣɛɛ David ɔwe i Xores.

19 Zif maturi ɔsɛ Saul kɔrɛ i Gibea masɛ maaɣɛ sɔ, "David wɛrɛ i bo kɔrɛ i Xores kuwɛrɛkɔ̃ i Xakila kabemi ame i Yesimon kala. 20 O igara, kiniɔ ne, ɔwi ɔrere aɖɔɛ ne ba, iyɔ boto boamɔɛ̃ wũ bopia-ɔ i igara nrɔɔ̃ ame." 21 Saul ɔtã mmuai sɔ, "Bosate si ɔfere mi kusɛkusɛ ala misu ira i wũ iso. 22 Mikɛlɛ mialedza ara ame inyɔ kukaakɔ. Minyɔ ne ame si mitsue ngbegɔ i David sɛ ɔɖɔɛ isɛ gu nwɔ lonya wũ i mmɔ. Masɛ maɣere me sɔ ɔbua ɔbe anɔ gbaã. 23 Mibie ngbegɔ ɔɖuɖu ɔsɛ ɔwɛrɛ si mikpese miba miatã me ne itsue kukaakɔ. Iyɔ loakɛlɛgu mi, si ɔpia i ndɛ̃mɔ, loapɛti wũ lonya wũ i Yuda nlɛ ɔɖuɖu ame."

24 Ne ɔso maɣo ɔri maɖe Saul katɔ̃ makɛlɛ Zif. Kiniɔ ne David gu ɔ̃ marɛrɛ̃ ɔwe i Maon Fafuĩ ame, i Araba i Yesimon kala. 25 Saul gu ɔ̃ maturi ɔtsɛ David inyɔnyɔ. Gɔ maɣere David ne, ɔso ɔkɛlɛ ɔsɛ ɔ̃awe i itasiare kɔrɛ i Maon Fafuĩ ame. Gɔ Saul ɔnɔ nnɛgbe ne ɔti David kama ɔkɛlɛ Maon Fafuĩ ame.

26 Saul gu ɔ̃ maturi sɛ i kube kasɛ kawɛ̃, fiɛ David gu ɔ̃ maturi ana ɔwe i kasɛ nyɔare isɛ, mato mapɛsiwa matere i Saul kɔrɛ. Gɔ ame i Saul gu ɔ̃ makpakpɛ̃dze ka mato mabore mabo maba maamɔɛ̃ David gu ɔ̃ marɛrɛ̃ ne, 27 kpabo ɔba Saul kɔrɛ ku kanya sɔ, "Ba mala! Ma Filistise ɔɔta mabo i karɔ̃ ame lo!" 28 Ne ɔso Saul ɔnyua itere isiai David, ne Saul ɔkɛlɛ ɔsɛ ɔ̃akpɛ̃gu ma Filistise. Ne ɔso mato makpere kakɔi gagbe sɔ ita nɛ kɔrɛ maɣɛ so siri.* 29 Ne David ɔrui i mmɔ ɔya ɔbɔrɛ i mmɔ ɔsɛ ɔ̃awe i En Gedi kuwɛrɛkɔ̃ ne.