1 Ɔwi wɔ i Samuel ɔɔbe ne, ɔɖi ɔ̃ mabirɛrɛĩ sɔ maɖe Israel kaɖe matɔ̃meɣɛdze. 2 Ɔ̃ ibiete iyere loɖe Yoel, fiɛ ɔ̃ kama ɔre iyere ɔɖe Abiya. Maɖe matɔ̃meɣɛdze i Beerseba. 3 Ɣɛɛ ɔ̃ mabibirɛrɛĩ iisu ɔ̃ nsɛgbai. Manyua ɔri sɛɛ masɛ mabie sikã i ɔri nyanyariã iso, mafɔ kawɛrɛra fiɛ maiɣɛ atɔ̃me i ɔri iso.

4 Ne ɔso Israel makpakpa ɔɖuɖu ɔsarɛ ne makɛlɛ Samuel kɔrɛ i Rama ne. 5 Maɣere wũ sɔ, "Nyɔ, ɔɔsɛ katɔ̃ i akɔ ame fiɛ fɔ mabibirɛrɛĩ iisu fɔ nsɛgbai. Kiniɔ ne, sɛ igara tã bo si ɔɖe bo iso lɛ kumɛgɔ ise i nɖebi mama pelepele ame awe."

6 Ɣɛɛ gɔ maɣere Samuel sɔ, "Sɛ igara tã bo si ɔɖe bo iso ne," nnɛgbe iiwe Samuel ɔmɛrɛ̃. Ne ɔso ɔkparamakayi ɔtã Bosate. 7 Ne Bosate ɔɣere wũ sɔ, "Kã atɔ̃me wa ɔɖuɖu maturi to maɣere-ɔ atsue; iiɖe fɔ masɛ̃, ɣɛɛ mme maɔsɛ̃ sɔ lodaaɖe sigara i ma iso. 8 Lɛ kumɛgɔ mabara me, masɛ̃ me, mato masumu maɣaa mama, ita iyi nɛ loɖi ma lobɔrɛgu i Egipte karɔ̃ iso iba iabo kiniɔ ne, kumɛɔ ame mato mabara-ɔ ne. 9 Kiniɔ ne kã ma atsue, ɣɛɛ sɛ̃ tã ma si aɖi ara karɔ̃ ate ma kukaakɔ tɔtɔ, si atã matsue nnɛ i igara wɔ loaɖe ma iso aabara."

10 Samuel ɔɣere maturi ma nto mabie sɔ ɔsɛ igara ɔtã ma, Bosate atɔ̃me ɔɖuɖu. 11 Ɔɣere ma sɔ, "Ara wa i igara wɔ loaɖe mi iso aabara i ngbe ne: Ɔto ɔ̃atã mi mabirɛrɛĩ ɔbara karabara ku ɔ̃ kubore iso gu ku i apɔngɔ iso fiɛ maɖe ɔ̃ iso madzuɛ̃se i kubore katɔ̃. 12 Mawɛ̃ ne ɔto ɔ̃atã sɔ maɖe makpakpɛ̃dze makpakpa, mawɛ̃ matã kakpi gu mawɛ̃ matã siru. Mawɛ̃ si mabara karabara i ɔ̃ kakpɛkɔ̃ ame, fiɛ maasɔrɛ̃ ɔraɖui. Mawɛ̃ aaɖe akpakpɛ̃ra gu kubore iso ara mabaradze. 13 Igara to ɔ̃afɔ mi mabirɔ̃gomi. Mawɛ̃ to maaɖe ngarãdu mabaradze, mawɛ̃ aaɖe maɖerawadze, fiɛ mawɛ̃ aaɖe boɖoboɖo mafɛ̃dze. 14 Ɔto ɔ̃afɔ mi nkpɛkɔ̃ sɛɛ gu wainnkpɛkɔ̃ gu nnɔĩ nkpɛkɔ̃ ɔsu me ɔtã ɔ̃ makpakpaturi. 15 Ɔto ɔ̃afɔ geɖebu ɔraɖui wɔ misɔrɛ̃ ikaweova gu wain ikaweova ɔsu ɔtã ɔ̃ makpakpa gu mabuaidze. 16 Ɔto ɔ̃afɔ mi maɖaborɛrɛ̃ gu maɖaborɔ̃go gu mi manantsuĩ sɛɛ gu mafirimu sɛɛ ɔtã mabara ɔ̃ mɔmɔ karabara matã wũ. 17 Ɔto ɔ̃afɔ mi mabɔi akuri ikaweova fiɛ mi mɔmɔ to miakpese ɔ̃ masande. 18 Ɔwi wɔmɔ ame ne mito miabiɛ mikpere Bosate si ɔtã mi iwarã ɔbɔrɛgu igara wɔ mi mɔmɔ miɖi iti kayirinɔ, ɣɛɛ Bosate iibakã mi atsue."

19 Ɣɛɛ maturi ɔsɛ̃ maikã Samuel atsue maɣɛ sɔ, "Ooɣo! Boto bobie igara botã so. 20 Iyɔ boto boase lɛ nɖebi mama. Ɔ̃aɖe sigara i bo iso fiɛ ɔ̃akɔ bo, ɔɖe bo katɔ̃ ɔ̃akpɛ̃ kakpã."

21 Ɔwi wɔ i Samuel ɔɔnɔ nwa ɔɖuɖu maturi ɔɣɛ ne, ɔkɛlɛ ɔsɛ ɔ̃aɣere Bosate kumɛɔ ame. 22 Bosate ɔtã Samuel mmuai sɔ, "Kã ma atsue si asɛ igara atã ma."

Ne Samuel ɔɣere Israel marɛrɛ̃ sɔ, "Ɔbiara si ɔkpese ɔkɛlɛ kaa."