1 Ɔrɛrɛ̃ ɔwɛ̃ wɔ marɔ Elkana ɔbɔrɛ i Ramatayim Zufise ɔɖe. Ɔbɔrɛ i Efrayim kabemi karɔ̃ iso. Ɔɖe Yeroxam ɔbibirɛrɛĩ. Yeroxam ɔse ɔɖe Elixu, fiɛ Elixu ɔse ɔɖe Toxu wɔ loɖe Zuf ɔbibirɛrɛĩ wɔ lobɔrɛ i Efrayim kalɛ ame. 2 Elkana ɔyiri marɔ̃go inyɔ. Ɔwɛ̃ iyere ɔɖe Xana, fiɛ ɔnyɔare iyere ɔɖe Penina. Penina ɔɣe mabi ɣɛɛ Xana ne ɔ̃iɣe ɔbi kuwɛ̃.

3 Ikɔ biara ame ne, Elkana ɔla ɔ̃abɔrɛ i ɔ̃ ɔmagɛ̃ ame ɔkɛlɛ Silo ɔsɛ ɔ̃asumu ɔsɔrɛ ara ɔtã Bosate Ɔlesate. Silo ngbe i Eli mabirɛrɛĩ inyɔ, Xofni gu Pinexas, ɔɖe Bosate masɔrɛdze ne. 4 Iyi irere nɛ iso i Elkana ɔsɔrɛ ara ne, ɔsɛ ɔtã ɔ̃ ɔre Penina sina akpe, ɔtã ɔ̃ mabibirɛrɛĩ gu mabibirɔ̃gomi ɔbiara bɔi wɔ ɔsɔrɛ sina. 5 Ɣɛɛ Xana ne, ɔtã wũ akpe anyɔ alasɔ ɔɖɔɛ wũ gbaã atoasɔ Bosate iitã wũ ɔɣe mabi. 6 Ɔ̃ ɔrerɛ, Penina, ɔla ɔ̃abie wũ kanya ame are ɔsu ɔpia wũ sikpã ala kumɛgɔ i Bosate iitã ɔɣe ɔbi ɔso. 7 Nnɛgbe ɔsɔgu i katɔ̃ ikɔ biara ame. Ɔwi ɔrere wɔ maɔsɛ mmɔ fiɛ Xana ɔsɛ Bosate iyo ne, ɔ̃ ɔrerɛ ɔla ɔ̃abara wũ aɣiãra ɔpia wũ sikpã gbɔgbɔɔgbɔ kaku ka ɔ̃abiɛ fiɛ ɔ̃ibaɖe aɖera ala ne iti. 8 Ɔ̃ ɔrã Elkana ɔkarɛ wũ sɔ, "Xana, be ɔso ato abiɛ kaku? Be ɔso aito aɖe aɖera? Be ɔso ato amararã so i ɔtu ame? Gbaã ne, loawo ɔbara ɔtã-ɔ loɖo mabirɛrɛĩ iweo!"

9 Ɔwi ɔwɛ̃ ne gɔ maɔɖe ara manɛ ara maro i Silo i Bosate iyo ne, Xana ɔta ɔya. Ɔwi wɔgbe ame ne, Eli, sɔrɛdze ne, ɔbɔdzo ɔsɛ i iyara iso i Bosate Isɔrɛyo kayogodɔ̃. 10 Ibo gu ibɛbɛrɛ nɛ i Xana ame iti ne, ɔkparamakayi ɔtã Bosate ɔla kaku ibiɛ gbaã. 11 Ne ɔkã ndamu ɔɣɛ sɔ, "O Bosate Ɔlesate, si aanyɔ fɔ ɔɖaborɔ̃go inyɛwe kere fiɛ aanyigi me, fiɛ aibaɣara fɔ ɔɖaborɔ̃go ɣɛɛ ata wũ ɔbirɛrɛĩ ne, iyɔ loasu wũ losɛ ise lotã-ɔ i ɔ̃ agbanayi ɔɖuɖu ame. Siwɛrɛ̃ ikparɛ̃ra kuiwɛ̃ iibapɛgu ɔ̃ iti iso kuiyikuiyi."

12 Gɔ i Xana ɔla ɔ̃akparamakayi ɔ̃ɔtã Bosate ne, Eli ɔla ɔ̃anyɔ ɔ̃ kanya. 13 Xana ɔla ɔ̃akparamakayi i ɔ̃ ɔtu ame. Ne Eli ɔbu sɔ ndã nto mimɔɛ̃ wũ alasɔ ɔ̃ kanya to kabubusi ɣɛɛ silɔ iibɔrɛ manɔ. 14 Ne ɔso ɔkarɛ Xana sɔ, "Ku me ɔwi i ndã aakpa-ɔ? Nyua itãnɛ."

15 Ɣɛɛ Xana ɔtã wũ mmuai sɔ, "Ooɣo lo, wũ sate, ɔrɔ̃go wɔ nto ɔmararã so gbaã loɖe. Iiɖe wain ɣee ndã kpokporoa kumiwɛ̃ lola loɔnɛ; wũ ɔtu ame amɔrɛã nto loɖi loɣere Bosate. 16 Daabu fɔ ɔɖaborɔ̃go, ɔrɔ̃go nyanyariã; alasɔ wũ isoma gu ibo, ibɛbɛrɛ siare kayi nto lokparama i ngbe."

17 Kere ne, Eli ɔtã wũ mmuai sɔ, "Kɛlɛ i isobuɛ ame. Israel Ɣaa si ɔtã-ɔ nnɛ akarɛ wũ."

18 Ne Xana ɔtã mmuai sɔ, "Fɔ ɔɖaborɔ̃go ara si abo-ɔ anɔ kere." Ne kama ne ɔɣo ɔri, ɔkɛlɛ ɔsɛ ɔ̃aɖe aɖera. Ɔ̃ anɔ ɔfiriki fiɛ ɔ̃isito ɔmararã so.

19 Kaya tutuutu ne, Elkana gu ɔ̃ iyomaturi ɔta masɛ maasumu Bosate. Ne kama ka makpese makɛlɛ ma aɖe Rama ne. Elkana ɔsɛgu ɔ̃ ɔre Xana, ne Bosate ɔnɔ ɔ̃ kayiikparama ne. 20 Ne ɔso Xana ɔla kayiri i ɔwi wɔmɔ ame fiɛ ɔɣe ɔbirɛrɛĩ. Ɔtã wũ iyere sɔ Samuel ɔɖi ne karɔ̃ ɔɣɛ sɔ, "Alasɔ lokarɛ wũ lobɔrɛgu i Bosate kɔrɛ."

21 Gɔ ɔwi ɔɣo ana ne, Elkana gu ɔ̃ iyomaturi ɔɖuɖu ɔsɛ Silo ngbegɔ masɛ masɔrɛ ikɔ biara isɔrɛ nɛ masɛ mabara fiɛ ɔ̃atã Bosate ndamu kuso. 22 Xana iisɛ, ɔɣere ɔ̃ ɔrã sɔ, "Si loɔɖi ɔbi inyɛ ne, loakɔ wũ lokɛlɛgu Bosate iyo, fiɛ ka ɔ̃awe i mmɔ pelepele."

23 Ɔ̃ ɔrã Elkana ɔtã wũ mmuai sɔ, "Bara nnɛ anya sɔ ilɛ-ɔ. We i ngbe gbɔgbɔɔgbɔ aɖi wũ inyɛ. Bosate si ɔtã ɔ̃ kaɣɛkasɛ si kaba i ne ame." Ne ɔso Xana ka ɔwe i kaa ɔnyɔ ɔbi iso isɛ iabo ɔwi wɔ ɔnyua imeme.

24 Gɔ ɔbi ɔɔre inyɛ ne, ɔkɔ ɔbirɛrɛĩ ɔkɛlɛgu Silo. Atoasɔ ɔkoso ne, ɔsu akɔ atɛ nantsuĩrɛrɛ̃, ɔraũ kilo iweo* gu wain bɔikoakpo ɔwɛ̃ ɔto. Ɔkɔ Samuel wɔ loɖe ɔbiɛtɛ ɔkɛlɛgu Bosate iyo i Silo.

25 Gɔ maɔɖoe nantsuĩrɛrɛ̃ ne makɔ ɔbirɛrɛĩ makɛlɛgu Eli. 26 Xana ɔɣere Eli sɔ, "Wũ sate, lokã sɔ, mme nɖe ɔrɔ̃go wɔ loba ɔ̃aya i fɔ kɔrɛ i ngbe, lola loɔkparamakayi loɔtã Bosate ne. 27 Ɔbi wɔgbe lokparamakayi lokarɛ Bosate ne. Ɔtã me nnɛ lokarɛ wũ. 28 Ne ɔso nto losu wũ lotã Bosate. Ɔ̃ɔkpese Bosate ɔre i ɔ̃ agbanayi ɔɖuɖu ame." Ne Elkana gu ɔ̃ iyomaturi ɔsumu Bosate i mmɔ ne.