1 Kiniɔ ne ma Filistise ɔkpɛ̃gu Israel maturi, matere i ma Filistise kanya. Israel maturi gbodzoo ɔrɔ̃ kakpã i Gilboa Kube iso. 2 Ma Filistise ɔtere masiai Saul gu ɔ̃ mabibirɛrɛĩ teteree ne maɖoe ɔ̃ mabibirɛrɛĩ Yonatan, Abinadab gu Malki-Sua. 3 Kakpã ɔwe ɔle i Saul kasɛ ɔɖuɖu iso, ne gɔ kutamapɛdze ɔbo i Saul iso ne mapira wũ gbaã.

4 Saul ɔɣere ɔ̃ akpirasarãdze sɔ, "Ɖi fɔ ipɛmi si atsue aɖoe me, si maɣɔsɔrɛse magbe iibaba maaɖoe me mabara me aɣiãra."

Ɣɛɛ ɔ̃ akpirasarãdze ɔnigã ɔso ɔ̃iɖoe wũ. Ne ɔso Saul ɔsu ɔ̃ mɔmɔ ipɛmi fiɛ ɔrɔ̃ ɔbo ne iso ɔkpi. 5 Gɔ i akpirasarãdze ɔnya sɔ Saul ɔɔkpi ne, ɔ̃ wũ ɔsɔ̃ so i ɔ̃ ipɛmi iso ɔkpigu wũ. 6 Ne ɔso Saul gu ɔ̃ mabibirɛrɛĩ itɛ ɔɖuɖu gu ɔ̃ akpirasarãdze gu ɔ̃ marɛrɛ̃ ɔɖuɖu ɔkpi ku ikpɛnɛ nɛmɔ iso.

7 Ɔwi wɔ i Israel maturi ma nsi i kagbolomi isɛ gu mma i Yordan ɔwore kama isɛ ɔnya sɔ Israel makpakpɛ̃dze ɔɔtere fiɛ Saul gu ɔ̃ mabibirɛrɛĩ ɔɔkpi ne, marui matere manyua ma simagɛ̃. Ne ma Filistise ɔba maafɔ sɛ̃ ame masɛ ne.

8 Kaɖesɛã gɔ i ma Filistise ɔsɛ sɔ maamamala mma lokpi akpakpɛ̃ra ne, manya Saul gu ɔ̃ mabibirɛrɛĩ itɛ ɔkpi marɛ i Gilboa Kube iso. 9 Matu Saul iti fiɛ masu ɔ̃ iso akpiraifɔra, ne masese makpabo makiki i ma Filistise karɔ̃ iso mapɛ itɔ̃me imomo i ma aɣɔ asɔrɛyo gu maturi ndɛ̃. 10 Masu Saul iso akpiraifɔra masɛ i Astarte kasɔrɛkɔ̃ fiɛ mapɛ ɔ̃ kuturidziri mamatãra i Bet San ibere iso.

11 Gɔ i Yabes Gilead maturi ɔnɔ nnɛ i ma Filistise ɔbara Saul ne, 12 ma makpãrɛrɛĩ ɔɖuɖu ɔsɛ ɔri kasɛ̃ ɔɖuɖu makɛlɛ Bet San. Maɖi Saul gu ɔ̃ mabibirɛrɛĩ makpise i Bet San ibere iso makɛlɛgu Yabes masɛ matsuedza ma i mmɔ. 13 Ne masu ma akui mabiara i kudziri siare kayirinɔ i Yabes ne ka manyikanya ayi akɔdzɛ.