1 Ɣɛɛ David ɔɣere so sɔ, "Ayi wagbe ame ne Saul to ɔ̃aɖoe me. Ira sɛɛ nɛ loɖo loawo ɔbara nɖe sɔ loatere lokɛlɛ ma Filistise karɔ̃ iso. Iyɔ Saul ka ɔto ɔ̃anyua me inyɔnyɔ i kakɔi karere i Israel karɔ̃ iso, iyɔ nto loabɔrɛ i ɔ̃ nrɔɔ̃ ame." 2 Ne ɔso David gu maturi alafa akuɔ ɔrui makɛlɛ Gat igara Axis wɔ nɖe Maox ɔbibirɛrɛĩ kɔrɛ. 3 David gu ɔ̃ marɛrɛ̃ ɔwe i Gat ku Axis. Ɔrɛrɛ̃ biara ɔwegu ɔ̃ iyomaturi, fiɛ David mare inyɔ Axinoam wɔ lobɔrɛ i Yezrel gu Abigail wɔ lobɔrɛ i Karmel, Nabal wɔ loɔkpi ɔre ɔwegu wũ. 4 Ɔwi wɔ Saul ɔnɔ sɔ David ɔɔtere ɔkɛlɛ Gat ne, Saul iisinyɔnyɔ wũ.

5 Ne David ɔɣere Axis sɔ, "Si wũ ara ɔbo-ɔ anɔ ne, tã me kasɛkɔ̃ i fɔ ɔmagɛ̃ ɔwɛ̃ ame i fɔ karɔ̃ iso. Be ɔso fɔ ɔɖabo aasɛgu-ɔ i igara ɔmagɛ̃ ame?"

6 Ne ɔso Axis ɔtã wũ Ziklag ɔmagɛ̃ ku iyi nɛmɔ fiɛ ɔkpese Yuda magara ɔre ita ɔwi wɔmɔ iso. 7 David ɔwe i ma Filistise karɔ̃ iso ikɔ iwɛ̃ gu awa ana.

8 David gu ɔ̃ marɛrɛ̃ ɔsɛ maata mabo Gesurise, ma Girzise gu ma Amalekse. (Ta kokowi ne, maturi magbe ka masi i karɔ̃ ga nfere kakpa Sur gu Egipte iso.) 9 Si David ɔta kakpã i marere iso ne ɔ̃isɛ ɔtã marɛrɛ̃ ɣee marɔ̃go ɔwe ngbã. Ɣɛɛ ɔsɛ ɔsu masɛrɛrerɔ̃ gu manantsuĩ, mafirimu gu kupuapɔngɔ gu arapia. Iyɔ ɔ̃akpese ɔba Axis kɔrɛ.

10 Si Axis ɔkarɛ wũ sɔ, "Lɛ akɛlɛ nɔme asɛ aata abo?" David sɛ ɔtã mmuai sɔ, "Losɛ Negev i Yuda isɛ ɣee Negev i Yerameel karɔ̃ ame ɣee Negev i ma Kenise karɔ̃ ame." 11 Ɔ̃isɛ ɔnyua ɔrɛrɛ̃ ɣee ɔrɔ̃go kuwɛ̃ sɔ ɔwe ngbã si ɔ̃akɔ wũ ɔbɔ Gat. Ala ɔbu sɔ, "Sianyɔ mato maatã itsue i bo iso sɔ, 'Nnɛgbe i David ɔbara ne.' " Ngbɔ loɖe ɔ̃ kubarara ayi kumɛgɔ ɔwe i ma Filistise karɔ̃ ame. 12 Axis ɔfɔ David ɔɖe ne ɔɣere so sɔ, "Ɔ̃ maturi Israel mabi ɔtsiri wũ, gɔ ka ɔto ɔ̃aɖe wũ ɔɖabo ɔwi ɖaa."