1 Samuel ɔɣere Israel kaɖe ɔɖuɖu sɔ, "Lokã irabiara nɛ miɣere me atsue, ne loɔsɛ igara lotã mi ne. 2 Kiniɔ ne ka miba igara wɔ nɖe mi tɔ̃ɖedze. Ɣɛɛ mme ne, loɔbe posoposo lofudza, wũ mabibirɛrɛĩ ɔɔmɔ mapia i mi kɔrɛ. Ita i wũ siporoporoi ame ne, loɔɖe mi tɔ̃ɖedze iba iapɛ nɔme. 3 Loɣɛ i ngbe. Miɣere me i Bosate anɔ gu ɔ̃ igara wɔ ɔsɔla nnɔĩ kutsue ame si losu ɔrere nantsuĩ, ɔrere ɔfirimu loɖe ɔrere amumu, ɔrere wɔ lowedza inyɛ, ɔrere wɔ kɔrɛ lofɔ kawɛrɛra loɖe lopɛ itɔ̃me lofirikira. Si lobara nwagbe irere ne, loatã ne kuso."

4 Matã mmuai sɔ, "Aiɖe bo amumu ɣee awedza bo inyɛ, aifɔ kawɛrɛra abɔrɛgu i kuwɛ̃ kɔrɛ."

5 Samuel ɔɣere ma sɔ, "Nɔme ne Bosate gu nwɔ ɔsɔla nnɔĩ ɖe aɖansiɛ, sɔ loiɣɛrɛ."

Maɣɛ sɔ, "Ɔɖe aɖansiɛ."

6 Ne Samuel ɔsɔgu i katɔ̃ ɔɣere maturi sɔ, "Bosate ɔɖe loɖi Mose gu Aron fiɛ ɔkɔ mi mawa ɔbɔrɛgu i Egipte karɔ̃ iso. 7 Kiniɔ ne, miya i ngbegɔ miɣɛ, alasɔ nto loba loakidza mi ku ira nɛ mibara i Bosate anɔ lonyigira mi Bosate ara bɔlɔlɔa wa ɔbara ɔtã mi gu mi mawa.

8 "Gɔ Yakob ɔɔbo i Egipte karɔ̃ iso kama ne, mabiɛ makpere Bosate sɔ ɔbuai ma, ne Bosate ɔsese Mose gu Aron. Ma lokɔ mi mawa mabɔrɛgu i Egipte fiɛ masɛra ma i karɔ̃ gagbe iso ne.

9 "Ɣɛɛ maturi ɔɣara Bosate ma Ɣaa; ne ɔso ɔtã Sisera, nwɔ loɖe Xazor makpakpɛ̃dze ikuri ɔkpakpa, ma Filistise gu ma Moabse igara, ɔkpɛ̃gu fiɛ maɖe mi mawa iso ne. 10 Mabiɛ makpere Bosate ne maɣɛ sɔ, 'Bobara ikpi; bosɛ̃ Bosate ne bosumu Baal gu Astarte aɣɔ. Ɣɛɛ kiniɔ ne ɖi bo i bo matsirise nrɔɔ̃ ame, si boasumu-ɔ.' 11 Ne Bosate ɔsese Yeru-Baal,* Bedan, Yefta gu me, Samuel ne Bosate ɔtã boba boaɖi mi bobɔrɛgu i mi matsirise nrɔɔ̃ ame i kasɛ biara iso, ne ɔso misɛ i kaɣɔ ame.

12 "Ɣɛɛ gɔ minya sɔ ma Amonse igara Naxas to ɔba ɔ̃akpɛ̃gu mi ne, miɣere me sɔ, 'Ooɣo, boto bobie igara si ɔɖe bo iso'- atoasɔ Bosate mi Ɣaa ɔɖe mi igara. 13 Kiniɔ ne nya igara wɔ miɖi i ngbe, nwɔ mikarɛ ala; minyɔ, Bosate ɔɔsɛra igara ɔtã mi. 14 Si minigã Bosate fiɛ misumu wũ miwarɛ wũ fiɛ miita miya i ɔ̃ mmara iso, si mi gu mi igara wɔ nto ɔɖe mi iso ɔsiai Bosate mi Ɣaa ne - iyɔ ilɛ! 15 Ɣɛɛ si miiwarɛ Bosate, fiɛ si mita miya i ɔ̃ mmara iso ne, ɔto ɔ̃akpadzɛ̃ mi kutsue, lɛ kumɛgɔ ɔkpadzɛ̃ mi mawa awe.

16 "Kiniɔ ne, miya i ngbegɔ miɣɛ si minyɔ ira siare nɛ i Bosate to ɔba ɔ̃abara i mi anɔmi ame! 17 Kukpɛ ka iɖe kiniɔ. Nto loakpere Bosate sɔ ɔsese kado gu kadoiɖu. Iyɔ ne mito mianya iranyanyariã nɛ mibara i Bosate anɔ miɖiite gɔ mikarɛ sɔ ɔsɛ igara ɔtã mi."

18 Ne Samuel ɔkpere Bosate, ne Bosate ɔsese kado gu kadoiɖu ku ikpɛnɛ nɛmɔ ame ne. Ne ɔso maturi ɔɖuɖu ɔnigã Bosate gu Samuel gbaã.

19 Maturi ɔɖuɖu ɔɣere Samuel sɔ, "Kparamakayi tã Bosate fɔ Ɣaa i fɔ maɖabo iti si boibakpi, alasɔ gɔ bokarɛ igara ne, boɔsu iranyanyariã bobua i bo akpi mama ɔɖuɖu iso."

20 Samuel ɔtã mmuai sɔ, "Midaanigã, miɔbara iranyanyariã ɔɖuɖu nɛgbe; ɣɛɛ midaasɛ̃ Bosate, bowũ misumu wũ ku mi ɔtu ɔɖuɖu. 21 Midaasɛ̃ Bosate misɛ miasumu aɣɔ siefe. Aibawo isɛɛ kuiwɛ̃ ɔbara atã mi ɣee aɖi mi, alasɔ aɖe ara siefe. 22 Bosate iibasɛ̃ ɔ̃ maturi, ala ɔ̃ iyere siare ɔso, ana ne iɖe Bosate isoɣɔ sɔ ɔbara mi ɔ̃ mɔmɔ maturi. 23 Mme ɣɛɛ ne, kuiyikuiyi, loɔsiaita lotã so sɔ loibabara ikpi i Bosate iso lonyua kayiikparama i mi iti. Lokɛlɛgu i katɔ̃ lote mi ara i ɔri wɔ nɖe ɔsɛɛ fiɛ ɔya iso. 24 Ɣɛɛ ikote sɔ mianyɔ sɔ gbaã ne, mianigã Bosate si misumu wũ ku ɔnukuare ku mi ɔtu ɔɖuɖu. Midaaɣara ara siare wa ɔ̃ɔbara ɔtã mi. 25 Ɣɛɛ si mikɛlɛgu i katɔ̃ mibara aranyanyariã ne, mi gu mi igara inyɔ ɔɖuɖu ne ɔ̃awɔra mi.