1 SAMUEL 21

David Ɔrui Ɔtere I Saul Kɔrɛ

1 David ɔkɛlɛ Nob ɔmagɛ̃ ame si ɔsɛ ɔ̃anya Aximelek wɔ nɖe sɔrɛdze. Aximelek ɔti ɔkpakpa ku ɔwi wɔ ɔnya wũ, ne ɔkarɛ sɔ, "Be ɔso asɛ fɔ ɔnɔwɛ̃? Be ɔso kuwɛ̃ nagu-ɔ?"

2 David ɔtã sɔrɛdze Aximelek mmuai sɔ, "Igara lopia me katɔ̃me fiɛ ɔɣere me sɔ, 'Kuwɛ̃ daatsue kuira ɔsegu i katɔ̃me ga nto lopia-ɔ iso gu nnɛ aabara.' Ɣɛɛ wũ maturi ne, loɣere ma sɔ masarɛgu me i kakɔĩ kawɛ̃. 3 Kiniɔ ne, be nse-ɔ loana lopia i kanya? Tã me boɖoboɖo abo aru ɣee irere nɛ aba."

4 Ɣɛɛ sɔrɛdze ɔtã David mmuai sɔ, "Lona boɖoboɖo fefea kuwɛ̃. Ɣɛɛ boɖoboɖo wɔ masekelera se i ngbe, fɔ maturi aawo ɔɖe si mairɛgu ɔrɔ̃go i ayi wagbe ame."

5 Ne David ɔtã mmuai sɔ, "Gbaã ne boɔrera so kama i marɔ̃go iso lɛ bosɛ bobara ɔwi ɔrere loɣo ɔri. Makpakpɛ̃dze iso se sekelee ta karabara ga loisekele ame. Nda ngbɔ iase nɔme wɔ bowũ!" 6 Ne ɔso sɔrɛdze ɔtã wũ boɖoboɖo wɔ masekelera alasɔ boɖoboɖo kuwɛ̃ na i mmɔ iɖo boɖoboɖo wɔ masɛ i Bosate anɔ, fiɛ maɔmɔɛ̃ masu i ɔ̃ anɔ, masu nwɔ mba ɔtɔ masɛ ku iyi nɛ masu nwɔmɔ maruigu.

7 Kiniɔ ne Doeg wɔ nɖe Edomse fiɛ ɔɖe Saul masɛrɛnyɔisose ɔkpakpa ɔwe i mmɔ, masia wũ kɔrɔ̃ masɛ i mmɔ ku iyi nɛmɔ si ɔledza so ɔtã Bosate.

8 David ɔkarɛ Aximelek sɔ, "Ana ifele ɣee ipɛmi i ngbe ɣɛɛ? Loisu wũ ipɛmi ɣee ikpira kuiwɛ̃ loto, alasɔ igara katɔ̃me ga ɔpia me ɔbua kanya gbaã.*21.8 Ika nɛ David to ɔɖe ngbe pelepele ne, ɔkɔla nnɛ ɔso ɔba i sɔrɛdze kɔrɛ alasɔ igara Saul ɔturi wɔ nɖe Doeg ɔwe i mmɔ."

9 Sɔrɛdze ɔtã mmuai sɔ, "Filistise Goliat wɔ aɖoe i Ela Kagbolomi ame ipɛmi se i ngbe. Masu ɔkati mamini ne ise i ɔmearapia kama. Si ato abie ne ne, su ne, ipɛmi mama kuiwɛ̃ na i ngbe iɖo ne."

David ɔɣɛ sɔ, "Kuiwɛ̃ na lɛ ne awe, su ne tã me."

David Ɔsɛ Gat

10 Iyi nɛmɔ David ɔpia kama i i Saul kɔrɛ ɔkɛlɛ Axis Gat igara kɔrɛ. 11 Ɣɛɛ Axis maɖabo ɔɣere wũ sɔ, "Iiɖe David wɔgbe nɖe Israel karɔ̃ igara ɣɛɛ? Iiɖe ɔ̃ nɖe nwɔ iso maka kuka ku ma katɔ ame sɔ:

" 'Saul ɔɖoe ɔ̃ kakpi,

fiɛ David ɔɖoe ɔ̃ kukpi kuweo ɣɛɛ'?"

12 David ɔnɔ atɔ̃me wagbe fiɛ ɔnigã Axis, Gat igara. 13 Ne ɔso David ɔko ɔbara lɛ ɔto ɔlala i ma anɔmi ame. Ne gɔ ɔpia i ma kɔrɛ ne ɔbara ara lɛ lalase awe. Ɔla ɔ̃abara akparĩ ɔ̃ɔsia i kuyogodɔ̃ akui iso fiɛ ɔto ɔsora minyatu ɔfere i ɔkore iso.

14 Axis ɔɣere ɔ̃ maɖabo sɔ, "Nyɔ, ɔrɛrɛ wɔgbe! Iti ɔɔbo wũ aku! Be ɔso mikɔ wũ mibɔ me? 15 Malalase loɔro me iso i ngbe ɔso mikɔ nwɔgbe mibɔ si ɔba ɔ̃abara nwagbe i wũ katɔ̃? Ikote sɔ ɔrɛrɛ̃ wɔgbe aaba i wũ iyo?"