1 Ɔwi wɔmɔ ame ne ma Filistise ɔsira ma makpakpɛ̃dze kanya si makpɛ̃gu Israel kaɖe. Axis ɔɣere David sɔ, "Nto lonyɔ ɔri sɔ mi gu fɔ makpakpɛ̃dze aabua me iso bosɛ kakpã ame."

2 David ɔɣɛ sɔ, "Ilɛ, iyɔ fɔ mɔmɔ ato aanya nnɛ i fɔ ɔɖabo aawo ɔbara."

Axis ɔtã mmuai sɔ, "Ibua ilɛ gbaã, nto loakpesera-ɔ wũ mɔmɔ dzuɛ̃se ayi kumɛgɔ lopia ngbã."

3 Ɔwi wɔgbe ame ne, Samuel ɔɔkpi fiɛ Israel kaɖe ɔɖuɖu ɔɔbiɛ wũ mabiara wũ i ɔ̃ aɖe Rama. Saul ɔɔsa mawase gu mma nsɛ makpere makpise ɔɖi i karɔ̃ ame.

4 Ma Filistise ɔsikanya maba maabara kasɛkɔ̃ i Sunem, gɔ i Saul ɔsa Israel makpakpɛ̃dze ɔɖuɖu kanya mabara kasɛkɔ̃ i Gilboa. 5 Gɔ Saul ɔnya ma Filistise makpakpɛ̃dze ne, ɔnigã fiɛ ɔtu ɔpɛ wũ gbaã. 6 Saul ɔkarɛ Bosate nnɛ sɔ ɔbara, ɣɛɛ Bosate iitã mmuai i kurɛ ame oo, Ɣaa kanyaɖidze iso oo ɣee Urim iso. 7 Ne Saul ɔɣere ɔ̃ madzuɛ̃se sɔ, "Mibie ɔrɔ̃go wɔ nsɛ ɔkpere makpise, si losɛ loakarɛ ira lonɔ i ɔ̃ kɔrɛ."

"Matã mmuai sɔ, "Ɔwɛ̃ pia i Endor."

8 Ne ɔso Saul ɔkɔla so, ɔpia arapia mama, ne ma gu marɛrɛ̃ inyɔ ɔsɛ ɔrɔ̃go kɔrɛ ku kasɛ̃ ne. Ɔɣere ɔrɔ̃go sɔ, "Kpere siwarã si atara nwɔ iyere lokpere atã me."

9 Ɣɛɛ ɔrɔ̃go ɔɣere wũ sɔ, "Gbaã ne miɣe nnɛ i Saul ɔbara. Ɔ̃ɔsa mawase gu mma nsɛ makpere makpise ɔɖi i karɔ̃ ame. Be ɔso miba migbere me si loakpi?"

10 Saul ɔkã i Bosate iyere ame ɔɣere wũ sɔ, "Lokã Bosate wɔ mpia ngbã, maibakpadzɛ̃-ɔ kutsue kukuwɛ̃ si abara nnɛgbe."

11 Ne ɔrɔ̃go ɔkarɛ sɔ, "Nna sɔ lokpere lotara lotã-ɔ?"

Ne ɔtã mmuai sɔ, "Kpere Samuel tara tã me."

12 Gɔ ɔrɔ̃go ɔnya Samuel ne, ɔfã teteree ɔɣere Saul sɔ, "Fɔ Saul aɖe! Be ɔso asɔsɔla me?"

13 Ne igara Saul ɔɣere wũ sɔ, "Daanigã. Be iɖe ato anya?"

Ne ɔrɔ̃go ɔɣɛ sɔ, "Nto lonya siwarã to sita sibɔrɛ i karɔ̃ ame."

14 Ne ɔkarɛ sɔ, "Nda ngbɔ sise?"

Ɔɣɛ sɔ, "Siɖe ɔrɛrɛ̃kpakpa wɔ mpia awu tagbaraa ɔto ɔbɔrɛ ɔba."

Ne Saul ɔtsue sɔ Samuel ɔɖe, ne ɔbɔitikarɔ̃ ɔkɔlɛ ɔfu i karɔ̃ ne.

15 Samuel ɔkarɛ Saul sɔ, "Be ɔso aba aɖaa me ato atara me?"

Ne Saul ɔtã mmuai sɔ, "Lopia i imɔrɛ̃ siare ame. Ma Filistise to makpɛ̃gu me, fiɛ Ɣaa ɔɔsɛ̃ me. Ɔ̃isisɛ ɔtã me mmuai kumiwɛ̃ iki i arɛ ame ɣee kanyamaɖidze iso. Ne ɔso lokpere-ɔ sɔ si aɣere me nnɛ loabara ne."

16 Ne Samuel ɔɣɛ sɔ, "Be ɔso aakarɛ me, kiniɔ gɔ i Bosate ɔɔsɛ̃-ɔ fiɛ ɔ̃ɔkpese fɔ tsirise? 17 Bosate ɔɔbara nnɛ ɔɣɛ ɔsɛ ɔkigu i wũ iso. Bosate ɔɔkpɛti sigarakaɖekɔ̃ ɔɖi fɔ nrɔɔ̃ ame fiɛ ɔ̃ɔsu ɔtã fɔ ɔnyii ɔwɛ̃ - David. 18 Bosate ɔbara ngbɔ alasɔ aiwarɛ wũ fiɛ aiɖi ɔ̃ sikpã siare kayi i ma Amalekse iso, ne ɔso i Bosate ɔtã ato anya nwagbe nɔme ne. 19 Bosate to ɔ̃aɖi mi gu Israel makpakpɛ̃dze nrɔɔ̃ ɔtã ma Filistise, kɔrãkaɖe ne fɔ mɔmɔ gu fɔ mabibirɛrɛĩ to miaba i wũ kɔrɛ i ngbe. Bosate to ɔ̃atã ma Filistise ɔɖe Israel makpakpɛ̃dze iso."

20 Ɔluwɛ̃ Saul ɔrɔ̃ ɔrɛ dzɔlɔlɔ kukarãme ɔɖuɖu i karɔ̃, ifɔ̃ ɔyi i ɔ̃ ame ala Samuel atɔ̃me wa ɔnɔ ɔso. Ɔle ɔɔro wũ iso alasɔ ɔ̃iɖe kuira ku ikpɛnɛ ɔɖuɖu gu kasɛ̃ gamɔ.

21 Ɔwi wɔ i ɔrɔ̃go ɔba Saul kɔrɛ fiɛ ɔnya sɔ ɔto ɔmararã so gbaã ne, ɔɣɛ sɔ, "Nyɔ, fɔ ɔɖaborɔ̃go ɔɔwarɛ-ɔ; fiɛ lomɔrɛ̃dza wũ ngbã lobara nnɛ aɣere me sɔ lobara. 22 Kiniɔ ne, kã fɔ ɔɖabo atsue si lotã-ɔ aɖera si aɖe si aana ɔle fiɛ aɣo ɔri akɛlɛ."

23 Saul ɔsɛ̃ ne ɔɣɛ sɔ, "Loibaɖe ara."

Ɣɛɛ ɔ̃ maturi ɔbua i ɔrɔ̃go iso masɛ̃ mapia wũ, ne ka ɔkã ma atsue. Ɔta i karɔ̃ ne ɔsɛ i karɛkɔ̃ iso.

24 Ɔrɔ̃go ɔwe nantsuĩ poroporoi wɔ lowe iɖa i ɔkpã ame i iyo, ne ɔɖoe wũ ɔluwɛ̃ ne. Ɔsu ɔraũ, ɔkpɔkɔtɔ fiɛ ɔfɛ̃ boɖoboɖo wɔ maipia inyagɛ̃kua i kame. 25 Ne ɔsu ne ɔtu ɔpɔrɔ̃ ɔtã Saul gu ɔ̃ rrmarɛrɛ̃ fiɛ maɖe. Ne ka marui kasɛ̃ kasɛ̃ gamɔ ame ne. r