1 Ɔtilese sɛ ɔrui ɔtere atoasɔ kuwɛ̃ iisɛ ɔtere ɔsia wũ,

ɣɛɛ ɔturi bɔlɔlɔa sɛ ɔwegu kagbegbe ɔtu lɛ dzata awe.

2 Si kaɖe ɔta kayasoiso ne, kã maɖeisoi sɛ masi,

ɣɛɛ ɔturi wolai fiɛ ɔba ara karɔ̃inɔ sɛ ɔtã sɔ ibiara se ne kume.

3 Ɔɖeisoi wɔ nsɛ ɔwedza mawɛrɛba inyɛ

se lɛ kado terea wɔ nsɛ ɔsore ɔraɖui ɔkɛlɛgu.

4 Maturi ma losɛ̃ mmara ne, masɛ male matilese,

ɣɛɛ mma lomɔɛ̃ mmara mato sɛ mata maya i matilese iso.

5 Maturi nyanyariã iisɛ manɔ itɔ̃me nɛ loya karɔ̃,

ɣɛɛ mma nsɛ mabie Bosate sɛ manɔ ne karɔ̃ kukaakɔ.

6 Wɛrɛba wɔ nsɛgbai nna iɣɛrɛ

lɛ ɔɖo ranase wɔ nna ɔnukuare.

7 Ɔturi wɔ nsɛ ɔmɔɛ̃ mmara ɔla ne, ɔbi wolai ɔɖe,

ɣɛɛ nwɔ nsɛ ɔpia kulaa gu maɖeɖei sɛ ɔpia ɔ̃ ɔse kunuarɛ.

8 Ɔturi wɔ nsɛ ɔmɔdza ɔ̃ karana iki i kusia kɔlɛa iso

sɛ ɔsira sɛ̃ kanya ɔsia iso ɔtã ɔturi mama wɔ loabara mawɛrɛba kayiribielea.

9 Ɔturi wɔ lotɛ̃ atsue i mmara iso ne,

Ɣaa sɛ ɔtsiri ta ɔ̃ kayiikparama.

10 Ɔturi wɔ nsɛ ɔsɔsɔla ɔturi bɔlɔlɔa ɔpia i ɔri nyanyariã iso ne,

ɔto ɔ̃abo i ɔ̃ mɔmɔ kata ame,

ɣɛɛ mma nna iɣɛrɛ to maafɔ kaɖekɔ̃ sɛɛ.

11 Ranase sɛ ɔbu so sɔ ɔɣe iwola,

ɣɛɛ wɛrɛba wɔ nsɛ ɔnɔ ara karɔ̃ aatsue si gbaã ne ranase ɣe iwola.

12 Si maturi bɔlɔlɔa to maɖeiso ne, isoɣɔ gbodzoo ɔwe;

ɣɛɛ si matilese ɔkpese maɖeisoi ne, maturi sɛ matere maawɛrɛ.

13 Ɔturi wɔ nsɛ ɔfu ɔ̃ akpi ara ne, ɔ̃isɛ ɔna isaruɛ,

ɣɛɛ ɔturi wɔ nsɛ ɔɖi ɔ̃ akpi ɔɣɛ fiɛ ɔsɛ ɔnyua wã ibara ne, maanyɔ wũ nnya.

14 So aaɣɔ ɔturi wɔ nsɛ ɔnigã Bosate ɔwi biara,

ɣɛɛ ɔturi wɔ losɛ̃ ɔ̃ ɔtu ne, ɔsɛ ɔbo i imɔrɛ̃ ame.

15 Ɔtilese wɔ nsɛ ɔɖe mawɛrɛba kaɖe iso ne,

ɔse lɛ dzata wɔ nto ɔɖi silɔ ɣee iketeke nɛ ntere sɔ iamɔɛ̃ ira awe.

16 Ɔɖeisoi wɔ nna ara karɔ̃inɔ ɖe nwɔ mba ɔtile,

ɣɛɛ nwɔ nsɛ ɔtsiri kusia iki i maturi iyu ame to ɔ̃asɛ ngbã tagbaraa.

17 Ɔturi wɔ i ituriɖoe iɣɛrɛ to iɖaa ne,

ɔto ɔ̃ala ɔ̃atetere isɛ iabo i ɔ̃ ɔkpiwi;

kuwɛ̃ si ɔdaabuai wũ ɔrui ɔtere.

18 Ɔturi wɔ nsɛ ɔbara ara sɛɛ aana kaɣɔ,

ɣɛɛ ɔturi wɔ siri logɔgɔlɔ to ɔ̃arɔ̃ ɔluwɛ̃.

19 Ɔturi wɔ nsɛ ɔkpɛ̃ ɔ̃ ɔwĩ sɛ ɔna araɖea gbodzoo,

ɣɛɛ ɔturi wɔ nsɛ ɔɣɛ kanya kanya sɔ ɔ̃akpɛ̃ ɔwĩ ɣɛɛ ɔ̃ibara kuira i ne iso ne, ɔ̃ siwɛrɛba aaya adziri.

20 Ɔturi wɔ mba ɔnukuare ne, kusɛkusɛ asia wũ iso gbaã,

ɣɛɛ ɔturi wɔ nɣɛ soiso sɔ ɔ̃ana sikã gu karana ne, maibasɛ̃ wũ kutsueikpadzɛ̃.

21 Ɔturi kama isiai i itɔ̃meiɖaɛ ame iilɛ -

ɣɛɛ araɖea kosoi wa i ɔturi aafɔ iti ɔso ne, ɔ̃aɣɛrɛ.

22 Kanyase sɛ ɔyasoiso si ɔna karana,

ɣɛɛ ɔ̃iɣe sɔ ɔɣiã ɣɛ ɔsia wũ.

23 Ɔturi wɔ nsɛ ɔnyagalagu ɔmama to ɔ̃ana nnyainyɔ ɔbua i kawirikɔ̃

ɔɖo nwɔ nsɛ ɔɣɛ kasɔla kanya ame atɔ̃me mɛrɛ̃mɛrɛã.

24 Ɔturi wɔ nsɛ ɔyu ɔ̃ ɔse ɣee ɔ̃ ɔnyi

fiɛ ɔsɛ ɔɣɛ sɔ, "Iiɖe ira lalaa" ne -

ɔnyanyarĩ kere lɛ raninase.

25 Ɖeɖei sɛ ɔbɔ kulu gu kalɔ,

ɣɛɛ ɔturi wɔ nsɛ ɔsiaiti i Bosate iso to ɔ̃ana isaruɛ.

26 Ɔturi wɔ lofɔ so ɔɖe ɖe kadzunisɛĩ,

ɣɛɛ nwɔ nsɛ ɔsɛ i iwola ame sɛ ɔwe i kaɣɔ ame.

27 Ɔturi wɔ nsɛ ɔtã mawɛrɛba ara ne, kuira iibaɣiã wũ,

ɣɛɛ nwɔ nsɛ ɔfirikira anɔ i mawɛrɛba iso ne, masɛ maagbarĩ wũ gbaã.

28 Si ɔtilese ɔkpese ɔɖeisoi ne, maturi sɛ matere maawɛrɛ;

ɣɛɛ si matilese ɔwɔ ne, maturi bɔlɔlɔa sɛ mawe.