1 Wũ ɔbi, mɔɛ̃ wũ atɔ̃me la,

si aledza wũ mmaraisi apia i fɔ ame.

2 Mɔɛ̃ wũ mmaraisi la si aawe ngbã.

La wũ araite kukaakɔ lɛ fɔ inɔmibi awe.

3 Nyi wã sia i fɔ arɔĩ iso;

si atsɛrɛ wã asia i fɔ ame i ɔtu iso.

4 Ɣere iwola sɔ, "Fɔ nɖe wũ ɔnyiiko,"

si akpere karɔ̃inɔ sɔ fɔ lɛdze.

5 Ara wagbe aaɖi-ɔ abɔrɛgu i rãrɔdze kɔrɛ,

aɖi-ɔ i ɔturire wɔ loɔɖe so iso ku ɔ̃ ɔnyamɛrɛ̃ atɔ̃me kɔrɛ.

6 Ɔwi ɔwɛ̃ ne, loya i wũ iyo fesere kɔrɛ

loto lonyɔ ara lokigu i iyoi ame.

7 Lonya maporoporoi mawɛ̃ ma loiɣe kayi ame,

ne lonya kaporoporoi kawɛ̃

gɔ kana adzuni kɔraa i ma ndɛ̃.

8 Ɔsɛ i ɔvurã iso ɔso ɔto ɔkɛlɛ sidzetɔrɔ̃go iyo isɛ,

i ngbegɔ ivurãkpasa pia,

9 ku iɣɛ̃kɛlɛ, nbgɔ ame i kaɖe ɔtsɛ iro kere,

fiɛ idududu to isɛ karɔ̃.

10 Kere ne ɔrɔ̃go wɔmɔ ɔpia ara lɛ nwɔ nsɛ ɔsiai marɛrɛ̃ awe,

ɔba ɔ̃sarɛgu wũ fiɛ ɔwe kasɔla kasusu.

11 (Ɔɖe nwɔ nsɛ ɔlakulu gu nwɔ loiwarɛ ara;

ɔ̃isɛ ɔwe i iyo kuiyikuiyi.

12 Si aanyɔ ka ɔɣɛ i ɔvurã iso, kiniɔ ame ka ɔpia i itiri,

si ka akpɛ̃ so, ka ɔɣɛ i ɔɣokã biara ame, ɔto ɔlala anɔmi.)

13 Ɔpɔrɛ ɔporoporoi wɔmɔ ɔpia so ne ɔfiɔ̃ kanya ne,

ne ɔrɔ̃go ɔkidza anɔmi ɔnyɔ wũ totoroo ɔɣɛ sɔ:

14 "Nɔme ne nto lotã wũ ndamu mɛ lokã kuso;

loba isobuɛ isɔrɛ loabara i iyo.

15 Ne ɔso lobɔrɛ loba loasarɛgu-ɔ ne.

Loɔnyɔnyɔ-ɔ fiɛ kini lonya-ɔ ne!

16 Nyɔ, wũ karɛkɔ̃ ne, losɛ kã ku ara

ku akalala ku kukua wa mabɔrɛgu i Egipte karɔ̃ iso.

17 Lofere ngarãdu mɛ

masu korobo, pepere gu sinamon mabara ala i wũ karɛkɔ̃ iso.

18 Ba, bokɛlɛ boabara kuɖɔɛ bomi gbɔgbɔɔgbɔ kɔrã kaya;

tã bopia so isoɣɔ ku kuɖɔɛ kukaakɔ!

19 Wũ ɔrã na i kaa;

ɔkpa ɔri dzoroa.

20 Ɔsu sikã gbodzoo ɔpia i ɔ̃ kakotokui ame,

ɔgbaleti to ɔ̃aka ibi fiɛ ɔ̃akpese ɔba kaa."

21 Ɔrɔ̃go ɔsu atɔ̃me mɛrɛ̃mɛrɛã ɔsɔsɔla ɔporoporoi

fiɛ ɔsu kasɔla ɔnyamɛrɛ̃ akaɖe ɔmɔɛ̃ wũ.

22 Ɔsiai ɔrɔ̃go ɔluwɛ̃

lɛ nantsuĩrɛrɛ̃ wɔ maaɖoe awe,

ɔsiai wũ lɛ kasɔlɔ nto kabo i kakpasa ame,

23 gbɔgbɔɔgbɔ sirɛ̃ sɛ sitsue kã akɔ̃.

Ɔporoporoi wɔmɔ ɔse kere lɛ karodzai ga lotere kabo i kata ame awe,

fiɛ ɔ̃iɣe kɔraa sɔ ɔ̃ ngbã kawirikɔ̃ i mmɔ ne.

24 Kiniɔ ne, wũ mabi, mikã me atsue,

misɛ atsue minɔ nnɛ nto loɣɛ.

25 Midaatã sɔ mi ɔtu aafiriki ɔsia i ɔrɔ̃go wɔgbe igbã nsɛgbai iso,

midaayu ɔri mikɛlɛ ɔ̃ kukikɔ̃ iso.

26 Ɔ̃ɔtara maturi gbodzoo ɔɖe i karɔ̃;

maturi ma ɔ̃ɔwɔra ɔsi gbaã.

27 Si asɛ ɔ̃ kɔrɛ i ɔ̃ iyo ne, asɛ i ɔri siare iso ato akɛlɛ makpise aɖe.

Kɛlɛ ɔ̃ kasɛkɔ̃ ato aasɛ katɔ̃ akɛlɛ fɔ ikpibiɔ ame.