1 Wũ ɔbi, daaɣara ara wa lote-ɔ,

ɣɛɛ mɔɛ̃ wũ mmaraisi la i fɔ ɔtu ame.

2 Alasɔ ato aatã sɔ fɔ agbanayi aasi ku akɔ gbodzoo

fiɛ aabɔ-ɔ isaruɛ.

3 Daatã ɔnukuareiɖe gu kuɖɔɛ si are-ɔ kama kuiyikuiyi.

Su wã pia i ɔme,

si amɔɛ̃ wã apia i iti ame.

4 Iyɔ aafɔ iyere sɛɛ fiɛ fɔ ara to aabo anɔ

i Ɣaa gu ɔturi kɔrɛ.

5 Siaiti i Bosate iso ku fɔ ɔtu ɔɖuɖu

daapiɛtɛ i fɔ mɔmɔ karɔ̃inɔ iso.

6 Fɔ kasusu si kasia i Ɣaa iso i irabiara ame,

iyɔ ne ɔto ɔ̃atã fɔ ɔri ame ɔkpa.

7 Daanyɔ so sɔ aɣe iwola.

Nigã Bosate, si asɛ̃ ikpi.

8 Nnɛgbe to iatã fɔ sosina isosarɛ

fiɛ iapia fɔ akui ɔle.

9 Su fɔ karana pia Bosate kuwarɛ

ngbɔ ame si abara fɔ ɔraɖui ɖeakatɔ̃ igbã biara ne.

10 Iyɔ mi kuwu to kuayigu ɔraɖui kubiɛ kuwiri,

fiɛ wain ɣɛtɛ to ɔ̃abiɛ ɔwiri i fɔ ndã kasɛkɔ̃.

11 Wũ ɔbi, daanyɔ Bosate iturikpadzɛ̃ pupurii

fiɛ ɔ̃ iyira daaɖaa-ɔ.

12 Alasɔ Bosate sɛ ɔkpadzɛ̃ mma ɔsɛ ɔɖɔɛ,

lɛ ɔse sɛ ɔkpadzɛ̃ ɔ̃ ɔbibirɛrɛĩ wɔ ɔ̃isɛ ɔpia kuɣɛ awe.

13 So si siɣɔ ɔturi wɔ nsɛ ɔtu iwola.

So si siɣɔ nwɔ kɔrɔ̃ lopɛgu karɔ̃inɔ,

14 alasɔ ne ame kusia lɛ kuɖo sikãfudza

fiɛ nnɛ nsɛ ibɔrɛ ne ame lɛ iɖo sikãrɛtɛa.

15 Iwola ɔfɔ kuɣa ɔɖo ikɛrɛra nɛ mba kuɣa iɖo.

Ara wa asɛ abie kuiwɛ̃ iibawo ɔkategu wũ.

16 Ɔmɔɛ̃ ngbã tagbaraa ɔto i kuɖearɔ̃,

fiɛ ɔmɔɛ̃ karana gu kuwarɛ ɔto i kubena.

17 Ɔ̃ siri iso ba ɔmɛrɛ̃,

fiɛ ɔ̃ siri ɔɖuɖu ɖe isobuɛ.

18 Kudziri gɔ nsɛ kutã ngbã kuɖe kutã mma nsɛ mapɔrɛ wũ mapia so,

so aaɣɔ mma loamɔɛ̃ wũ mala teteree.

19 Iki i iwola ame i Bosate ɔsɛra karɔ̃ sikaĩ,

iki i karɔ̃inɔ ame ɔsɛra kato i kã kasɛkɔ̃,

20 iki i ɔ̃ inɔkpa ame ndu ɔgodɛ̃ i kuwodorokɔ̃,

fiɛ adɔdɔ ɔpɛ kuɖobiobio.

21 Wũ ɔbi, mɔɛ̃ iwola wodoroa gu ara ibara ku iwola la,

daatã arui i fɔ adzuni ame.

22 Ato aaɖe ngbã atã-ɔ,

gu ikɛrɛra itã fɔ ɔme.

23 Iyɔ ato aasɛ i fɔ ɔri iso i kaɣɔ ame,

fiɛ aibatura i ira iso.

24 Si arɛ ne, aibanigã.

Si akɛlɛ arɛ ne, sirɛ aawe-ɔ ɔmɛrɛ̃.

25 Si kukpakpi ɔba ɔluwɛ̃ kere ne,

ɣee itikpi ɔba i matilese iso ne, ɔtu si ɔdaakɛ-ɔ ku ifɔ̃,

26 alasɔ Bosate nɖe nwɔ aasiaiti iso,

fiɛ ɔ̃ibatã fɔ kukpa ɔbo i kata ame.

27 Si aba ɔri aabara irere i fɔ ɔle ame ne,

daasɛ̃ isɛɛ ibara itã mma lokote.

28 Daaɣere fɔ ɔnyii sɔ,

"Kɛlɛ, si akpese aba, kɔrãkaɖe loasu lotã-ɔ" -

ɔwi wɔ ira nɛmɔ se-ɔ kiniɔ fiɛ.

29 Daabara adzuni sɔ aabara fɔ ɔnyii iraboa,

nwɔ nsi i fɔ kɔrɛ fiɛ ɔto ɔsiaiti i fɔ iso.

30 Si ɔturi iibara-ɔ iboa ne,

daakidza wũ abara kulu ku wũ.

31 Daarɛtɛra anɔmi i ɔtilese iso

ɣee daasiai ɔ̃ kurabarara kukuwɛ̃.

32 Alasɔ Bosate ɔtsiri kasɔla ɔturi

ɣɛɛ ɔsɛ ɔpia kulaa ku ɔturi sɛɛ.

33 Bosate sigbarĩ sia i ɔtilese iyo iso,

ɣɛɛ ɔsɛ ɔfere ɔturi bɔlɔlɔa kasɛkɔ̃ kusɛkusɛ.

34 Ɔsɛ ɔbara maɣiãrase ma lote so aɣiãra

ɣɛɛ ɔsɛ ɔtã mabɔsokarɔĩ abualɛra.

35 Mma mba iwola kaɖekɔ̃ nɖe kuwarɛ;

ɣɛɛ ɔsɛ ɔpia madzunisɛĩ kunuarɛ.