1 Wũ ɔbi, kã wũ iwola atɔ̃me atsue,

si akã wũ araite gu karɔ̃inɔ atɔ̃me atsue kukaakɔ,

2 sɔ abara ara ku iwola,

fiɛ adzuɛ̃ fɔ kanya ame atɔ̃me ku inɔkpa.

3 Alasɔ rãrɔdze kanya sɛ kaɣɛ atɔ̃me lɛ maɣendu mɛ nto misɔrɛ̃,

fiɛ ɔ̃ akaɖe ɔruɛ aɖo nnɔĩ;

4 ɣɛɛ kawirikɔ̃ ɔsɛ ɔwe ɔɖo lɛ kanaroro awe,

fiɛ ɔsɛ ɔwe ɔbe lɛ ibeinyɔ itekpe awe.

5 Ɔ̃ ngba sɛ miso mikɛlɛ kukpi kɔrɛ;

ne ɔ̃ inene sɛ ikɛlɛ siĩ ta ikpibiɔ ame.

6 Ɔ̃isɛ ɔbu iti ame kuiwɛ̃ i ngbã ɔri iso;

ɔ̃ siri ɔgɔgɔlɔ ɣɛɛ ɔ̃isɛ ɔtsue ngbɔ.

7 Iyɔ wũ mabi, kiniɔ ne, mikã me atsue;

midaare kama i atɔ̃me wa nto loɣere mi kɔrɛ.

8 Miki i ɔri wɔ iso miapia kama dzoroo i ɔrɔ̃go wɔgbe kɔrɛ,

midaasɛ ɔ̃ iyo kukui kɔrɛ,

9 si iiɖe ngbɔ ne, mito miasu mi kuwarɛ mitã maturi mama,

miasu mi akɔ mitã nwɔ nɖe ɔtilese.

10 Si iiɖe ngbɔ ne mafɔ to maaɖe mi karana mami,

fiɛ mi awururu, to akɛlɛ aarera ɔturi mama iyo.

11 I fɔ ngbã kawirikɔ̃ ne, ato aatɔtɔrɛ̃,

si so ɔɔtu fɔ sosina fiɛ siɔfɛ̃.

12 Ato aaɣɛ sɔ, "Lotsiri ikpadzɛ̃ lo!

Wũ ɔtu ɔsɛ iyira i karɔ̃ pupurii!

13 Losɛ̃ loinɔ wũ maratedze atɔ̃me;

loikã wũ maratedze araite atsue.

14 Itikpi ɔro ɔba me iso

ku kunuarɛ i iturikuri ɔɖuɖu nɛ losakanya ndɛ̃."

15 Nɛ ndu bɔrɛgu i fɔ mɔmɔ itawo ame,

si anɛ ndu mɛ nto miyi misia i fɔ itubiɔ ame.

16 Fɔ ndu mɛ nto miyi misia si mibiɛ mikɛlɛ sivurã iso?

Fɔ kuworei gɔ lobɔrɛ i me ame si kubore i itiri?

17 Tã aɖe fɔ ɔnɔwɛ̃ are,

aibaɖe mi gu mafɔ are kuiyikuiyi.

18 Fɔ ndu godɛã si miɖe kusɛkusɛ mitã-ɔ,

si ana isoɣɔ i fɔ siporoporoi ame ɔre iso.

19 Ɖuirɔ̃go lɛnyɔa, ɖuibitɛ ɔɖe.

Tã ɔ̃ anyɛ si apia-ɔ ɔmɛrɛ̃ i mina ame ɔwi biara,

si ɔ̃ kuɖɔɛ si kupia-ɔ isoɣɔ.

20 Wũ ɔbi, be ɔso aabie sɔ aasiai rãrɔdze?

Be ɔso aapɔrɛ rãrɔdze apia so?

21 Ɔturi siri gu nsɛgbai se kpawee i Bosate anɔmi ame,

fiɛ ɔsɛ ɔtsue ɔ̃ siri ɔɖuɖu.

22 Ɔtilese aranyanyariã ibara nsɛ amɔɛ̃ wũ lɛ kata,

fiɛ ɔ̃ akpi siwɛ̃ nsɛ sinyi wũ teteree.

23 Ɔturi wɔ nna iturikpadzɛ̃ ne, ɔkpi ɔsɛ ɔkpi,

fiɛ ɔ̃ mɔmɔ adzunisɛ̃ra gbodzoo nsɛ akã wũ ayura.