1 Boɖoboɖo korea kasɛi iɖe i ilo gu isobuɛ ame lɛ iɖo

iyo nɛ ame loyigu iyiɖea fiɛ kulu ɔbua iso.

2 Ɔɖabo wɔ wolai to ɔ̃aɖe i ɔbirɛrɛĩ wɔ nsɛ ɔbɔ kunuarɛ iso,

fiɛ ɔ̃ana kaɖekɔ̃ i ara ame lɛ manyiirɛrɛĩ ndɛ̃ ɔwɛ̃ awe.

3 Masɛ mawanɛkɛ̃ra sikãfudza i ne ira ame fiɛ masɛ mawanɛkɛ̃ra skãrɛtɛa i ɔferewu ame,

ɣɛɛ Bosate ne ɔsɛ ɔla ɔturi ɔtu ɔnyɔ.

4 Ɔtilese sɛ ɔkã ɔturi nyanyariã atɔ̃me atsue;

fiɛ ladze sɛ ɔsɛ kutsue sɔ ɔ̃anɔ ɔturi nyanyariã atɔ̃me.

5 Ɔturi wɔ nsɛ ɔbara mawɛrɛba aɣiãra sɛ ɔtia ma Baradze,

Ɔturi wɔ nsɛ ɔna isoɣɔ si itikpi ɔba i ɔmama iso ne, ɔ̃afɔ kutsueikpadzɛ̃.

6 Mawa i mabi ɖe ɔkpakpa sigaraikoto,

fiɛ mabi sɛ maɖe ndamu i ma maɣese iso.

7 Ikaɖe sɛɛ iisɛ ikote kadzunisɛĩ,

ngbɔ ame i mila ila iisɛ ikote ɔɖeisoi ne.

8 Kawɛrɛra itã se lɛ kumɛgɔ mapia ibelesa itã nwɔ lotã kã,

kakɔi biara ga ɔki ne isɛ ire iti.

9 Ɔturi wɔ nsɛ ɔsu ikpi ɔtsɛ ne, ɔsɛ ɔtã sɔ kuɖɔɛ ɔwe;

ɣɛɛ ɔturi wɔ loɖi atɔ̃me kuere ɔbɔ ne, ɔsɛ ɔsamera malaa ndɛ̃.

10 Si makpadzɛ̃ itɔ̃me i ara karɔ̃inɔse iso ne,

isɛ ibo wũ i iti ame iɖo si mapɛ kadzunisɛĩ ikpɛ kulafa.

11 Ɔturi nyanyariã kubie kere nɖe sɔ itaiyaiso;

maasese ɔkpakpa wɔ loisɛ ɔnyɔ nnya i ɔ̃ iso.

12 Isarɛgu iketeke nɛ mamɔɛ̃ ibi masu,

lɛ iɖo isarɛgu kadzunisɛĩ si ɔla ɔ̃abara ɔ̃ adzunisɛ̃ra.

13 Ɔturi wɔ losu iranyanyariã ɔtã kuso i isɛɛ kanya ne,

iranyanyariã iibabɔrɛ i ɔ̃ iyo kuiyikuiyi.

14 Kulu karɔ̃isɛ se lɛ kumɛgɔ ɔwore wɔ matɛ̃ ɔtsɛ iɖu,

ne ɔso nyua fiɛ iaba iakpese itɔ̃me biɛlɛa.

15 Ɔturi wɔ lotã ɔturi nyanyariã ibɛ fiɛ ɔtã nwɔ loiɣɛrɛ ipɔ ne,

Bosate ɔtsiri wã anyɔ ɔɖuɖu.

16 Mme kusia ɔso i kadzunisɛĩ to sikã,

gɔ ɔna kubie ɔtã sɔ ɔ̃atsue iwola?

17 Ɔlaa sɛ ɔɖɔɛ ɔturi ku ɔwi biara,

ɣɛɛ maɣe ɔnyiibi sɔ ɔ̃aɖi lɛdze ku ɔmɔrɛ̃wi.

18 Ɔturi wɔ nna adzuni sɛ ɔpia kanya i kuso kamaiya ame

ne ɔsɛ ɔya i ɔ̃ ɔnyii kama.

19 Ɔturi wɔ nsɛ ɔɖɔɛ kulu sɛ ɔɖɔɛ ikpi;

ɔturi wɔ lopia kayogodɔ̃ kɔlɛa i kabɔrɛnya ne, ɔsɛ ɔbie iwɔ.

20 Ɔturi wɔ mba kasɔla ɔtu iisɛ ɔna isaruɛ

fiɛ ɔturi wɔ mba kasɔla ɔnyagɛmi sɛ ɔbo i imɔrɛ̃ ame.

21 Ɔbi wɔ nɖe kadzunisɛĩ ɖe isoma ɔtã ɔ̃ ɔse

fiɛ kadzunisɛĩ ɔse na isoɣɔ kuiwɛ̃.

22 Ɔtu wɔ nsɛ ɔna isoɣɔ se kere lɛ kua sɛɛ awe,

ɣɛɛ siwarã dzɛ nto simararã so sɛ sitã akui sɛ akore wolowolo.

23 Ɔtilese sɛ ɔfɔ kawɛrɛra,

si ɔ̃afirikira itɔ̃me nɛ loya imama.

24 Ɔturi wɔ nsɛ ɔnɔ ara karɔ̃ sɛ ɔbie iwola ɔri,

ɣɛɛ kadzunisɛĩ anɔmi sia i karɔ̃ kawirikɔ̃ iso.

25 Ɔbi dzunisɛĩ ɖe isoma ɔtã ɔ̃ ɔse

fiɛ ɔsɛ ɔtã ɔ̃ ɔnyi wɔ loɣe wũ ibo gu ibɛbɛrɛ.

26 Iilɛ sɔ maakpadzɛ̃ ɔturi wɔ loiɣɛrɛ kutsue,

ɣee mapɛ makpakpaturi i ma ɔnukuare iti.

27 Ɔturi wɔ mba inɔkpa sɛ ɔkososo ku ikaɖe

fiɛ ɔturi wɔ nsɛ ɔɖesoiso ku sikpã ba ara karɔ̃inɔ.

28 Si kadzunisɛĩ ɔlokanana kɔraa ne, masɛ mabu wũ kawolai

fiɛ masɛ mabu wũ ara karɔ̃inɔse si ɔma kanya.