1 Si asi i ɔpɔrɔ̃ katɔ̃ sɔ aaɖegu ɔɖeisoi ara ne,

nyɔ nnɛ nse i fɔ katɔ̃ kukaakɔ.

2 Si aɖe ɖeɖei ne,

iyɔ ɖesoiso teteree.

3 Daawe ɔrakolo i ɔ̃ aɖera mɛrɛ̃mɛrɛã iso,

alasɔ aɖera wa masɛ masɔsɔla ɔturi aɖe.

4 Daaɖaa so sɔ aakpese ranase;

tsue iwola si aɖi ne i adzuni ame.

5 Su anɔmi si anyɔ karana, kere ka kakpa,

alasɔ kato kaare abue

fiɛ kaafɛrɛrɛ kakɛlɛ ɔwiri ame lɛ finikpo awe.

6 Daaɖe ɔyiriɖoi aɖera,

daawe ɔrakolo i ɔ̃ aɖera mɛrɛ̃mɛrɛã iso;

7 alasɔ ɔɖe ɔturi ɔwɛ̃ igbã

nwɔ nto ɔbu iti ame i kuso iso ɔwi biara.

Ɔsɛ ɔɣere-ɔ sɔ, "Ɖe ara, si anɛ ara,"

ɣɛɛ atɔ̃me wagbe iibɔrɛ i ɔ̃ ɔtu ame.

8 Ato aara aɖera kɛkɛĩ wa ɔɔɖe

fiɛ fɔ ile atɔ̃me wa aɣɛ to aɖe siefe.

9 Daaɖe kadzunsɛĩ ika,

ɔto ɔ̃anyɔ iwola nɛ mpia i fɔ atɔ̃me ame pupurii.

10 Daarui kume kuere kuere,

ɣee amɔɛ̃ makpisemabi nkpɛkɔ̃ afɔ i ma kɔrɛ.

11 Daabara ngbɔ alasɔ ma Fɔdze ba ɔle;

ɔto ɔ̃afɔ ma kanya i itɔ̃me iso ɔta ɔya-ɔ iso.

12 Su fɔ ɔtu sia i araite atɔ̃me iso,

si akã inɔkpa atɔ̃me atsue.

13 Daasɛ̃ sɔ aito akpadzɛ̃ fɔ ɔbi kutsue.

Si aɖeɖe wũ ɔdziri ne, ɔ̃ibakpi.

14 Kpadzɛ̃ ɔbi kutsue ku ɔdziri

si aɖi ɔ̃ ngbã abɔrɛgu i kukpi ame.

15 Wũ ɔbi, si fɔ ɔtu ɔtsue iwola ne,

iyɔ wũ ɔtu to ɔ̃ana isoɣɔ;

16 so to siaɣɔ wũ ɔkala

si aɣɛ nnɛ loya.

17 Daarɛtɛra anɔmi i makpibaradze iso,

ɣɛɛ we Bosate kunigã ame teteree ɔwi ɔɖuɖu.

18 Si abara ngbɔ gbaã ne, ɔriinyɔ pia i kɔrãkaɖe ame itã-ɔ,

fiɛ fɔ ɔriinyɔ iibaɖe siefe.

19 Wũ ɔbi, nɔ, si atsue iwola,

si asu fɔ ɔtu asia i ɔri sɛɛ iso.

20 Daapia kulaa ku ndã gbodzoo manɛdze

ɣee daapia kulaa ku mina siare mawedze,

21 alasɔ tarɛ̃dze gu ɖeɖei sɛ makpese mawɛrɛba;

fiɛ mirɛ siare irɛ sɛ mitã mawe i ara kɛkɛa ame.

22 Kã fɔ ɔse wɔ loɣe-ɔ atɔ̃me atsue,

ana ne daanyɔ fɔ ɔnyi pupurii i ɔ̃ sikpakpaso ame.

23 Ɣa ɔnukuare, daaɖi wũ arɔĩ.

Na iwola, iturikpadzɛ̃ gu ara karɔ̃inɔ.

24 Ɔturi bɔlɔlɔa ɔse sɛ ɔna isoɣɔ gbaã;

ɔrɛrɛ̃ wɔ loɣe ɔbi wolai sɛ ɔna isoɣɔ i ɔ̃ iso.

25 Tã fɔ ɔse gu fɔ ɔnyi si mana isoɣɔ;

si ɔnyi wɔ loɣe-ɔ si ɔna isoɣɔ!

26 Wũ ɔbi, su fɔ ɔtu tã me,

si anyɔ wũ nsɛgbai asɛ ikpo,

27 alasɔ sidzetɔrɔ̃go ɖe iwo wodoroa,

fiɛ ɔre wɔ loɔsu so rãrɔdze ɖe itubiɔ mɔmɔriã.

28 Ɔsɛ ɔwɛrɛ ɔsia lɛ yukukpe awe,

fiɛ ɔsɛ ɔbara sɔ mma loisɛ maɖe ɔnukuare sɛ masi i marɛrɛ̃ ndɛ̃.

29 Nna mba isoma? Nna nsɛ ɔna ibo gu ibɛbɛrɛ?

Nna nsɛ ɔbara kulu? Nna nsɛ ɔlɔ ɔsɔ?

Nna iso nsɛ ibɛbɛ siefe? Nna anɔmi nsɛ arɛtɛ abara dɔɔ̃?

30 Mma nsɛ makamu i ndã kayirinɔ,

mma nsɛ maɖɔɛ ndã mɛ malupu inɛ inyɔ ne.

31 Daanyɔ ndã gɔ mirɛtɛ,

gɔ mito mifu i ikɔi ame,

fiɛ si anɛ ne misɛ mife pɔkɔsɔɔ!

32 Katsɔrakɔ̃ ne misɛ miɖo lɛ aɣɛ awe,

fiɛ misɛ miɖi kabiɛtɛ lɛ kabeku awe.

33 Fɔ anɔmi to aanya afɔ̃ra

fiɛ aato aanya akpɔkpɔtɔra i fɔ adzuni ame.

34 Ato aase lɛ ɔturi wɔ nto ɔrɛ sirɛ i ɔpo wɔ loise kpoo iso.

Aase lɛ ɔturi wɔ nsi i nduisoibuɛ ame fiɛ ito ife i ngbe gu i mmɔ.

35 Ato aaɣɛ sɔ, "Mawuĩ me ira, ɣɛɛ iraboa iibara me!

Mapɛ me ɣɛɛ iibo me!

Iɖe ɔwi wɔ loarɛgɛ̃

si loabie ndã mama lonɛ?"