1 Iyere sɛɛ ibie lɛ iɖo karana gbodzoo;

maturi si manyɔ-ɔ ku kuwarɛ lɛ iɖo sikãrɛtɛa ɣee sikãfudza.

2 Ranase gu wɛrɛba ɔkate i nnɛgbe ame:

Bosate ɔɖe lobara ma ɔɖuɖu.

3 Ɔturi wolai sɛ ɔnya itikpi ɔɖe katɔ̃ fiɛ ɔsɛ ɔkɔla so i katarikɔ̃;

ɣɛɛ kadzunisɛĩ sɛ ɔsu so ɔpia i kame, fiɛ ɔsɛ ɔwe inyɛ i ne iti.

4 Karɔ̃ibɔso gu Bosate kunigã,

sɛ atã karana gu kuwarɛ gu ngbã tagbaraa.

5 Miyu gu kuta se i ɔturi nyanyariã ɔri iso,

ɣɛɛ nwɔ nsɛ ɔdzuɛ̃ so sɛ ɔrera so kama i wã kɔrɛ.

6 Kpadzɛ̃ ɔbi i ɔri wɔ ikote sɔ ɔ̃aki iso,

iyɔ si ɔmɔ ne, ɔ̃ibasɛnɛkɛ̃ i ɔ̃ iso.

7 Maranase sɛ maɖe mawɛrɛba iso,

fiɛ ɔturi wɔ lonyɛ ira i ɔturi kɔrɛ ne, ɔsande ɔsɛ ɔɖe ɔtã nyɛtãse.

8 Ɔturi wɔ lopɛ ɔtile aasɔrɛ̃ imɔrɛ̃ siare,

iyɔ ɔ̃ sikpã kutsueikpadzɛ̃ ɔdziri aatuĩ.

9 Maafere ɔturi wɔ mba kayiribielea kusɛkusɛ,

alasɔ ɔsɛ ɔɣɛ ɔ̃ araɖea ku mawɛrɛba.

10 Sa aɣiãrase ɖi, iyɔ kulu to kuatuĩ,

kalɔ gu sitia ana aatuĩ.

11 Ɔturi wɔ nsɛ ɔɖɔɛ ɔtu wɔ lokpa fiɛ ɔɣe ikaɖe nɛ lobualɛ ɔturi ne,

ɔto ɔ̃aɖe igara ɔlaa.

12 Bosate anɔ sɛ adzuɛ̃ inɔkpa,

ɣɛɛ ɔsɛ ɔkpɔkpɔtɔra mma nna ɔnukuare itɔ̃me.

13 Dãdze nsɛ ɔɣɛ sɔ, "Dzata pia i inyamɔ!"

Ɣee sɔ, "Mato maaɖoe me i ɔvurã iso!"

14 Rãrɔdze kanya ne, iwo wodoroa iɖe.

Ɔturi wɔ iso Bosate ɔna sikpã nto ɔ̃apɛ ɔbo ne ame.

15 Si adzunisɛ̃ra ɔmini ɔbi ɔtu iso ne,

ikpadzɛ̃ ɔpɛdziri nsɛ ɔbɛse wã ɔɖi i wũ iso.

16 Ɔturi wɔ nsɛ ɔwedza mawɛrɛba inyɛ sɔ ɔ̃ ara si asi abua,

gu nwɔ nsɛ ɔtã ranase ara ne - ma inyɔ ɔɖuɖu sɛ makpese mawɛrɛba.

17 Sɛ atsue si anɔ mawolai atɔ̃me;

si fɔ adzuni si asia i nnɛ lote-ɔ iso,

18 alasɔ ilɛ si akɔla wã i fɔ ɔtu ame

fiɛ wã ɔɖuɖu sia-ɔ i kanya iso.

19 Nto lobie sɔ siaiti i Bosate iso,

ɔso nto lote-ɔ ara nɔme fɔ wũ kɔraa ne.

20 Ɔtsɛrɛ loitsɛrɛ araite sitɛ,

wa ame i kuka gu inɔkpa pia lotã-ɔ?

21 Si lote-ɔ ɔnukuare gu nnɛ lokote,

sɔ si aawo mmuai sɛɛ ɔtã

mma lopia-ɔ katɔme ɣɛɛ?

22 Daayu wɛrɛba ala ɔ̃ siwɛrɛba ɔso,

daaɖe ɣiãni amumu i atɔ̃makaɣɛkɔ̃,

23 alasɔ Bosate to ɔ̃afɔ ma itɔ̃me,

fiɛ ɔto ɔ̃awɔra mma loɖe ma amumu ngbã.

24 Daapia kulaa ku ɔturi wɔ nsɛ ɔna sikpã malamala,

daasɛgu kanasikpã.

25 Si iiɖe ngbɔ ne, aato aasuã ɔ̃ nsɛgbai

fiɛ fɔ ngbã aabo i kata ame.

26 Daaɖe ɔturi wɔ nsɛ ɔpia kɔrɔ̃ i kuso kamaiya ame

ɣee daaya i ɔturi wɔ lonyɛ kuso kama;

27 alasɔ si kuira na-ɔ aasu atã i kuso kanya ne,

fɔ mɔmɔ karɛkɔ̃ ne, mato maafɔ-ɔ kã iso.

28 Daarui kume kuere kuere

gɔ i fɔ mawatɛtɛ ɔsia masɛ.

29 Ɔɔnya ɔturi wɔ mba kusɛ̃ i ɔ̃ karabara ame?

Ɔto ɔ̃asumu magara

iiɖe maturi fefea ɔ̃asumu.