1 Itɔ̃me mmuai itã ku silɔ pɔkɔsɔɔ sɛ iɣɔra sikpã,

ɣɛɛ kanya isɔsɔ̃ ɔturi sɛ itã sikpã ɔkɔlɛ kato.

2 Ɔturi wolai ɔnyagɛmi sɛ ɔɖi inɔkpa ɔte,

ɣɛɛ adzunisɛ̃ra nsɛ abɔrɛ i kadzunisɛĩ kanya kere.

3 Bosate anɔmi pia i kakɔi biara.

Ɔto ɔnya nwɔ nto ɔbara ɔtile gu nwɔ nto ɔbara isɛɛ.

4 Ikaɖe ku silɔ pɔkɔsɔɔ ɖe kudziri gɔ nsɛ kutã ngbã,

ɣɛɛ kasɔla ɔnyagɛmi sɛ ɔpia ɔturi siwarã igbɛ.

5 Kadzunisɛĩ sɛ ɔnyɔ ɔ̃ ɔse ikpadzɛ̃ pupurii,

ɣɛɛ ɔturi wɔ nsɛ ɔnɔ iyira ba iɣaraso ku adzuni sɛɛ.

6 Karana gbodzoo pia i ɔturi bɔlɔlɔa iyo.

Ɣɛɛ ɔtilese ara wa ɔna sɛ atã ɔna amɔrɛã.

7 Mawolai kanya sɛ kasamera inɔkpa;

ɣɛɛ iise ngbɔ ku madzunisɛĩ situ.

8 Bosate ɔtsiri ɔtilese isɔrɛ,

ɣɛɛ ɔturi sɛɛ kayiikparama sɛ ɔɣɔ Bosate anɔ.

9 Bosate ɔtsiri ɔtilese nsɛgbai;

ɣɛɛ ɔsɛ ɔɖɔɛ mma nsɛ mabie ara bɔlɔlɔa ibara.

10 Kutsueikpadzɛ̃ teteree se itã ɔturi wɔ lonyua ɔri ɔsɛ.

Ɔturi wɔ nsɛ ɔtsiri iyira to ɔ̃akpi.

11 Si kukpi gu iwɔ abusi ase i Bosate anɔmi ame ne,

iyɔ ɔturi awune ɔtu se kpawee ɔɖo!

12 Aɣiãrase iisɛ ɔbie sɔ mayira wũ;

ɔ̃isɛ ɔsɛ ɔsu itɔ̃me ɔtugu kawolai.

13 Ɔtu wɔ nsɛ ɔna isoɣɔ sɛ ɔtã kanɔɣɔa,

ɣɛɛ si imararãso pia i ɔtu ame ne, isɛ ipia ɔturi siwarã igbɛ.

14 Ɔturi ɔtu wɔ nsɛ ɔnya ara ɔɖiite sɛ ɔbie inɔkpa,

ɣɛɛ kadzunisɛĩ kanya sɛ kaɣɛ adzunisɛ̃ra.

15 Mma mato mayika mabɔ karɔ̃ ayi ɔɖuɖu sɛ awe ɔle,

ɣɛɛ nwɔ nsɛ ɔna isoɣɔ nsɛ ɔɖe iyi ku ɔwi biara.

16 Ara kɛkɛĩ wa i ɔturi ba fiɛ Bosate kunigã ɔbua iso

lɛ iɖo karana gbodzoo ga i amɔrɛã ɔbua.

17 Ɔraɖui yuɛ aɖera wa i kuɖɔɛ ɔbua iso

lɛ aɖo nantsuĩ wɔ mba iɖa aɖera wa itsiri ɔbua iso.

18 Ɔturi wɔ nsɛ ɔna sikpã malamala sɛ ɔbɔ kulu,

ɣɛɛ ɔturi pɔkɔsɔa sɛ ɔnidza kalɔ.

19 Dãdze ɔri iso i miyu sɛ mifɔ mitɛ̃,

ɣɛɛ ɔturi sɛɛ ɔri iso ɖe ɔri wɔ makpɛ̃ mayira kukaakɔ.

20 Ɔbi wolai sɛ ɔpia ɔ̃ ɔse isoɣɔ,

ɣɛɛ ɔturi dzunisɛĩ sɛ ɔnyɔ ɔ̃ ɔnyi pupurii.

21 Kadzunisɛĩ sɛ ɔna isoɣɔ i adzunisɛ̃ra iso,

ɣɛɛ nwɔ nsɛ ɔnɔ ara karɔ̃ sɛ ɔsɛ i ɔri tɔrɔrɔa iso.

22 Siriita iisɛ siba i kame si kuka na i ne ame,

ɣɛɛ si kuka matãdze ɔsi ne siriita sɛ sisɛ katɔ̃ kukaakɔ.

23 Itɔ̃me mmuai itã kukaakɔ mala sɛ ipia ɔturi isoɣɔ -

fiɛ itɔ̃me nɛ maɣɛ ku ne ɔɣɛwi sɛ ilɛ ɔnɔ!

24 Mawolai ne, ngbã ɔri to ɔkɛlɛ kato

sɔ si ɔrera so kama i ikpibiɔ ame iso ikɛlɛ.

25 Bosate sɛ ɔbiɛ kakɔlɛsokatoi iyo,

ɣɛɛ ɔsɛ ɔsɛra ame ɔtã kpisere.

26 Bosate ɔtsiri ɔtilese adzuni,

ɣɛɛ ɔsɛ ɔna isoɣɔ i mma lokpa i ɔ̃ anɔmi ame iso.

27 Anɔbese sɛ ɔkpadzɛ̃ ɔ̃ iyomaturi ɔpia i imɔrɛ̃ ame.

Ɣɛɛ ɔturi wɔ lotsiri kawɛrɛra ifɔ ne, ɔ̃asɛ ngbã.

28 Ɔturi bɔlɔlɔa sɛ ɔdzuĩ itɔ̃me iso kukaakɔ fiɛ ɔsɛ ɔtã mmuai,

ɣɛɛ ɔtilese sɛ ɔbusi kanya ɔɣɛ itɔ̃me nyanyariã irere faa.

29 Bosate pia dzoroo i ɔtilese kɔrɛ

ɣɛɛ Bosate sɛ ɔnɔ ɔturi bɔlɔlɔa kayiikparama.

30 Anɔɣɔa sɛ apia ɔturi ɔtu isoɣɔ,

fiɛ itɔ̃me bielea sɛ itã akui ɔsarɛ.

31 Ɔturi wɔ nsɛ ɔkã iyira nɛ lotã ngbã atsue

to ɔ̃awe i mawolai ndɛ̃.

32 Ɔturi wɔ nsɛ ɔsɛ ikpadzɛ̃ i karɔ̃ ne, sɛ ɔnyɔ so pupurii,

ɣɛɛ ɔturi wɔ nsɛ ɔbie iyira ne ɔsɛ ɔna ara karɔ̃inɔ.

33 Bosate kunigã sɛ kute ɔturi iwola,

fiɛ karɔ̃ibɔso sɛ iba fiɛ kuwarɛ.