1 Daaɖe ndamu i kɔrãkaɖe iso,

alasɔ aiɣe nnɛ i iyi aakpadzɛ̃ ibɔ.

2 Tã ɔturi mama si ɔle-ɔ, iiɖe fɔ mɔmɔ kanya;

ɔturi wɔ i kuruɛ si ɔle-ɔ, iiɖe fɔ mɔmɔ sinyako.

3 Ita ba ɔrɔrã fiɛ sise ne ato aɖe,

ɣɛɛ kadzunisɛĩ sikpã ipia ɔturi ba ɔrɔrã iɖo wã anyɔ ɔɖuɖu.

4 Ɔturi wɔ loyigu sikpã sɛ ɔbara ɔtile fiɛ sikpã teterea sɛ siwɔra ara,

ɣɛɛ ɔturi wɔ nto ɔkpɛ̃ sirerɛ ɔkpɛ ɔɖo.

5 Ɔturi inyagalagu i ɔgbami

lɛ iɖo kuturiɖɔɛ wɛrɛa.

6 Si fɔ ɔlaa ɔkpadzɛ̃gu-ɔ itɔ̃me ne, awo iti ɔsia i ɔ̃ iso

ɣɛɛ tsrise ipɔpɔrɛ ɔturi gbodzoo ɖe kasɔla.

7 Ɔturi wɔ loɔmi sɛ ɔpupura maɣendu,

ɣɛɛ nwɔ kukã to ne, irabiara nɛ mba ɔɖo kɔraa sɛ iwe ɔ̃mɛrɛ̃ i kanya.

8 Ɔturi wɔ loyu ɔ̃ iyo ɔri

se lɛ karodzai ga loyu kã irodzayo kɔrɛ awe.

9 Ngarãdu gu kuakɔrɔ̃kɔrɔã sɛ apia ɔtu isoɣɔ,

fiɛ ɔmɛrɛ̃ wɔ mpia i ɔturi ɔlaa ame sɛ ibɔrɛ i ɔ̃ kuka sɛɛ ame.

10 Daanyua fɔ ɔlaa ɣee fɔ ɔse ɔlaa asɛ,

fiɛ daasɛ fɔ ɔnyii iyo ku iyi nɛ itikpi ɔba-ɔ iso.

Ɔgbamikui wɔ lobore ɔmatã-ɔ lɛ ɔɖo fɔ ɔnyibirɛrɛ̃ wɔ mpia dzoroo.

11 Wũ ɔbi, tsue iwola, si apia wũ ɔtu isoɣɔ;

iyɔ loawo ɔtã ɔturi ɔrere wɔ loanyɔ me pupurii itɔ̃me mmuai.

12 Ɔturi wolai sɛ ɔnya itikpi fiɛ ɔsɛ ɔwɛrɛ so i katarikɔ̃;

ɣɛɛ kadzunisɛĩ sɛ ɔsu so ɔpia i kame, fiɛ ɔsɛ ɔwe inyɛ i ne iti.

13 Fɔ ɔturi wɔ loya i ɔfɔ kama awu,

si asu apia awoba ame si ɔya i ɔrɔ̃go wɔ loɔsu so rãrɔdze kama.

14 Ɔturi wɔ nsɛ ɔlakulu ɔfere ɔ̃ ɔnyii kusɛkusɛ ku kaya ne,

masɛ mabu ne sigbarĩ matã wũ.

15 Ɔre wɔ nɖe kalɔdze se lɛ kado

wɔ nto ɔpɛ ɔ̃ito ɔnyua awe.

16 Ɔturi wɔ nsɛ ɔsɛ̃ wũ se lɛ ɔwiri wɔ nto ɔfuri ɔto ɔtuĩdza,

ɣee ɔse lɛ ɔsu ɔ̃ kɔrɔ̃ ɔto ɔka nnɔĩ awe.

17 Ibɔra nsɛ iruɛ ibɔra,

ngbɔ i ɔturi sɛ ɔruɛ ɔ̃ ɔnyii ne.

18 Ɔturi wɔ nsɛ ɔnyɔ ɔ̃ kubo iso to ɔ̃aɖe kɔ̃ adziribi,

fiɛ ɔturi wɔ nsɛ ɔdzuɛ̃ ɔ̃ ɔkɔse mato maapia kuwarɛ ne.

19 Kumɛgɔ i katɔ̃ sɛ kare katɔ̃ mɔmɔ si anyɔ i ndu ame ne,

ngbɔ i ɔturi nsegbai sɛ mikategu ɔ̃ ɔtu ne.

20 Kukpi gu iwɔ aisɛ ami kuiyikuiyi,

ngbɔ ame i maturi sɛ mabie ara mabua.

21 Masɛ mawanɛkɛ̃ra sikãfudza i ne ira ame fiɛ masɛ mawanɛkɛ̃ra skãrɛtɛa i ɔferewu ame,

ɣɛɛ masɛ makere ɔturi manyɔ ku ile nɛ ɔsɛ ɔna.

22 Atoasɔ si asu ɔwɛi awete kadzunisɛĩ

lɛ kumɛgɔ masɛ mawete atitabi i kaɣɛ ame ne,

aibaɖi ɔ̃ adzunisɛ̃ra i ɔ̃ ame anya.

23 Nyɔ sɔ aɣe fɔ masɛrɛrerɔ̃ ikuri kuseme kukaakɔ,

si ala fɔ manantsuĩ kukaakɔ.

24 Alasɔ karana iisɛ kase ɔwi ɖaa,

fiɛ sigaraikoto ana iisɛ ise itã siɣekparɛ ɔɖuɖu.

25 Si sikua siina fiɛ sikua ɣɛtɛ ɔre ne,

fiɛ masa sikua kanya i abemi iso ne,

26 fɔ sɛrɛrerɔ̃ abi to aatã ana arapia,

fiɛ aana sikã abɔrɛgu i fɔ kutepuĩ ame asu aɣa kakpɛkɔ̃.

27 Ato aana katepuĩ inyendu gbodzoo lɛ araɖea

itã mi gu fɔ iyomaturi

fiɛ aana akararã fɔ maɖabobirɔ̃gomi.