1 Daarɛtɛra anɔmi i matilese iso,

fiɛ daabie sɔ aawe i ma ikuri ame;

2 alasɔ ɔtile ara iso masɛ mabu i iti ame,

fiɛ masɛ maɖeika i kumɛgɔ maabɔ imɔrɛ̃.

3 Iwola masɛ masu matsue iyo,

fiɛ masɛ masɛra ne iki i karɔ̃inɔ ame.

4 Iki i inɔkpa ame masɛ masu karana ga loibɔ

fiɛ kato kalɛnyɔ mayigu i kuyoi ame.

5 Ɔturi wolai ba ɔle gbaã,

fiɛ ɔturi wɔ ku inɔkpa sɛ ɔna ɔle ɔbua.

6 Alasɔ isɔ̃ra sɛɛ ame miawo ɔta kakpã,

fiɛ iɖeiso sɛ iba iki i kuka matãdze gbodzoo iso.

7 Iwola ɔfe kato ikɔlɛ itã kadzunisɛĩ,

fiɛ ɔna kuira ɔ̃aɣɛ i iturikuri kanyakasakɔ̃ i itiri.

8 Ɔturi wɔ nsɛ ɔɖo iranyanyariã adzuni ne,

ɔ̃ masɛ makpere sɔ aranyanyariã sate ne.

9 Kadzunisɛĩ adzunisɛ̃ra ibara ɖe ikpi,

fiɛ maturi ɔtsiri aɣiãrase.

10 Si asɛ afɛ̃ ku imɔrɛ̃ ɔwi ne,

fɔ ɔle ɔbua ɔtɛmi!

11 Fɔ mma masɛgu maaɖoe,

si amɔɛ̃ mma nsɛ dodadoda to makɛlɛ maaɖaɛ ma ɔme afegu kama.

12 Si aɣɛ sɔ, "Boiɣe kuira i nnɛgbe iso" ne,

nwɔ nsɛ ɔkere ɔtu ɔnyɔ ne ɔ̃ibanya ne ɔɖiite?

Nwɔ nsɛ ɔdzuɛ̃ fɔ ngbã ne, ɔɣe ne.

Ɔto ɔ̃atã ɔbiara ɔtikuso i nnɛ ɔbara kanya.

13 Wũ ɔbi, nɛ maɣendu ala milɛ;

maɣendu mɛ i kuɣesɛi ame aawe-ɔ ɔmɛrɛ̃.

14 Tsue sɔ ngbɔ ana i iwola sɛ iwe fɔ ɔkala ɔmɛrɛ̃ ne;

si anya ne ne, iyɔ ɔriinyɔ piɔ-ɔ i ɔwi wɔ nto ɔba ame,

fiɛ fɔ ɔriinyɔ iibaɖe siefe.

15 Daase lɛ ɔtilese wɔ nsɛ ɔpia ɔkpã ɔwɛrɛ gɔ ɔ̃abiɛ ɔturi bɔlɔlɔa iyo,

daata abo i ɔ̃ kawekɔ̃ ayu wũ;

16 alasɔ atoasɔ ɔturi bɔlɔlɔa sɛ ɔrɔ̃ ikpɛ ikɔdzɛ ne, ɔsɛ ɔta ana,

ɣɛɛ matilese sɛ marɔ̃ si mabo i kukpakpi ame.

17 Daana isoɣɔ si fɔ tsirise ɔrɔ̃.

Si ɔtura ne so daaɣɔ-ɔ.

18 Si iiɖe ngbɔ ne, Bosate to ɔ̃anya iyɔ iibabo wũ anɔ,

fiɛ ɔto ɔ̃atuĩdza sikpã ina i ɔ̃ iso.

19 Daana sikpã ala maturi nyanyariã iti,

fiɛ daarɛtɛra anɔmi i matilese iso,

20 alasɔ ɔturi nyanyariã na ɔriinyɔ kuwɛ̃ ku kɔrãkaɖe ame,

fiɛ mato maanidza ɔtilese ɔkaniɛ.

21 Wũ ɔbi, nigã Bosate gu igara,

daabua i matsuelese iso.

22 Alasɔ iwɔ aabɔrɛ i ma inyɔ ɔɖuɖu kɔrɛ iba i matsuelese iso ɔluwɛ̃.

Nna nɣe itikpi nɛ loabɔrɛ i Ɣaa ɣee igara kɔrɛ iba i ma iso?

23 Nwagbe ɖe mawolai simai ana:

Ɔturi kama isiai i atɔ̃meiɣɛ ame iilɛ.

24 Ɔturi wɔ nsɛ ɔɣere ɔturi wɔ loɣɛrɛ sɔ, "Aɖe ibɛ" ne -

maturi aagbarĩ wũ fiɛ nɖebi aatsiri wũ.

25 Ɣɛɛ ialɛgu maturi ma nsɛ makpadzɛ̃ ɔturi wɔ loɣɛrɛ kutsue,

kusɛkusɛ gbaã aaba i ma iso.

26 Ɔturi wɔ nsɛ ɔtã itɔ̃me mmuai ku ɔnukuare ne

ite sɔ ɔlaa gbaã ɔɖe.

27 Wiri fɔ inyamɔ karabara

si akpɛ̃ siwĩ;

ne kama, tsue fɔ iyo.

28 Daaɖe aɖansiɛ ata aya i fɔ ɔnyii iso siefe,

ɣee asu fɔ kanya asɔsɔla ku mila.

29 Daaɣɛ sɔ, "Loabara wũ lɛ nnɛ ɔbara me.

Loabara wũ nnɛ ɔbara me lotikuso."

30 Loki i dãdze ɔwɛ̃ kakpɛkɔ̃ lofe,

ne loki i kadzunisɛĩ wainkakpɛkɔ̃ ame ne.

31 Miyu gu akora ɔfɔ ɔwĩ ame pelepele,

sikua ɔyi siɣɛ sifɔ karɔ̃,

fiɛ ɔ̃ ata ibere ɔɔrɔ̃.

32 Losɛ iti ame i nnɛ lonya iso.

I nnɛ lonya ame ne, losuã ira lobɔrɛgu i kame sɔ:

33 "Sirɛ kɛkɛĩ, sirɛ itua kɛkɛĩ,

karĩ nrɔɔ̃ si asɛ kɛkɛĩ awarã -

34 siwɛrɛba nto siamɔɛ̃ ɔturi lɛ yukukpe awe

fiɛ ɔɣiã sɛ ɔba i ɔturi iso lɛ ɔrɛrɛ̃ wɔ lotɔ so akpandza awe.