1 Ɔturi awune sɛ ɔbara ɔriita i adzuni ame,

ɣɛɛ Bosate kɔrɛ i ne iɖi iɣɛ sɛ ibɔrɛ.

2 Ɔturi arabarara ɔɖuɖu na iɣɛrɛ i ɔ̃ mɔmɔ kɔrɛ,

ɣɛɛ Bosate nsɛ ɔkere nnɛ i ɔturi ɔbara ɔnyɔ.

3 Su irabiara nɛ aabara pia i Bosate nrɔɔ̃ ame,

iyɔ fɔ adzuni siriita to siaba i kame.

4 Bosate sɛ ɔbara irabiara i ɔ̃ mɔmɔ adzuni iso -

ɔbara ta ɔtilese kukpakpi iyi ɔsɛ.

5 Bosate ɔtsiri makɔlɛsokatoi ɔɖuɖu.

Fɔ nnɛgbe ɖe gbaã sɔ: Maibanyua matilese kutsueikpadzɛ̃ kuiyikuiyi!

6 Iki Bosate iɖɔɛ gu ɔnukuareiɖe itã wũ ne, ɔsɛ ɔsu bo akpi ɔtsɛ bo;

iki i Bosate kunigã ame ne ɔturi sɛ ɔɖi so i iranyanyariã ame.

7 Si ɔturi ɔrere nsɛgbai ɔbo i Bosate anɔ ne,

ɔsɛ ɔtã sɔ nwɔmɔ matsirise sɛ mawegu i isobuɛ ame.

8 Ara tɛmi wa i ɔturi ba ku sibɔlɔlɔ

lɛ iɖo ara gbodzoo wa mana i ɔri wɔ loiya iso.

9 Ɔturi awune sɛ ɔbara siriita i ɔ̃ mɔmɔ ɔri iso,

ɣɛɛ Bosate nsɛ ɔte ɔ̃ kanenekɔ̃.

10 Igara ikaɖe ne, ikpakpatɔ̃me iɖe,

fiɛ ɔ̃isɛ ɔbara iɣɛrɛ si ɔɖaɛ itɔ̃me.

11 Ikerera gu ara ikere sɛɛ ɔɖuɖu ɔbɔrɛ i Bosate kɔrɛ;

akerera ɔɖuɖu wa i akpo ame ɖe ɔ̃ arabarara.

12 Magara ɔtsiri iranyanyariã ibara,

alasɔ ara bɔlɔlɔa ibara iso masɛra sigaraiyara.

13 Magara sɛ mana isoɣɔ i ɔnukuareiɣɛ iso;

masɛ maɖɔɛ ɔturi wɔ nsɛ ɔɣɛ ɔnukuare.

14 Igara sikpã ɖe kukpi kpabo,

ɣɛɛ nwɔ nɣe iwola sɛ ɔɣɔra sɛ̃.

15 Igara anɔɣɔa ame ne, ngbã mpia.

Fiɛ ɔ̃ nnyainyɔ se lɛ adɔdɔ i kusɛ ame.

16 Ilɛ si ana iwola iɖo sɔ aana sikãrɛtɛa.

Ilɛ si aɖi karɔ̃inɔ iɖo sɔ aaɖi sikãfudza.

17 Ɔturi sɛɛ nsɛgbai sɛ miɖi so i iranyanyariã ame;

ɔturi wɔ nsɛ ɔkososo ku ɔ̃ nsɛgbai sɛ ɔdzuɛ̃ ɔ̃ ngbã.

18 Iteso sɛ iɖe iwɔ katɔ̃,

inyɔso sɛ iɖe irɔ̃ katɔ̃.

19 Karɔ̃ibɔso i mawɛrɛba ndɛ̃ lɛ iɖo

kakpãramɔɛã iɣɛgu matesoi.

20 Ɔturi wɔ nsɛ ɔkã araite sɛɛ atsue sɛ ɔna isaruɛ,

so sɛ siɣɔ nwɔ nsɛ ɔsiaiti i Bosate iso.

21 Ɔturi wolai ta i ɔtu ame ne, masɛ marɔ wũ sɔ karɔ̃inɔse,

fiɛ ikaɖe nɛ nsɛ ilɛ ɔnɔ sɛ itã mafɔ ɔturi maɖe.

22 Ara karɔ̃inɔ ɖe ngbã itubu itã mma mba ne,

ɣɛɛ adzunisɛ̃ra sɛ abɔ kutsueikpadzɛ̃ itã madzunisɛĩ.

23 Ɔturi wolai ɔtu sɛ ɔdzuɛ̃ ɔ̃ kanya,

fiɛ ɔ̃ kanya sɛ katã araite ɔsɛ katɔ̃.

24 Itɔ̃me nɛ nsɛ ilɛ ɔnɔ ne, kuɣesɛi kuɖe,

iba ɔkala ɔmɛrɛ̃ fiɛ isɛ isa sosina.

25 Ɔri ɔwɛ̃ pia wɔ ibara lɛ ɔkote i ɔturi anɔmi ame,

ɣɛɛ ɔ̃ kawirikɔ̃ ɖe kukpi.

26 Araɖea wa nsɛ akpɛ̃ rabaradze ɔkã nsɛ atã ɔbara karabara;

kukã nsɛ kutã ɔɣiɛ so.

27 Ikpekete nsɛ ɔɖo iranyanyariã i ɔturi iso,

fiɛ ɔ̃ ikaɖe se lɛ ɔtɔ wɔ nsɛ ɔtsuedza ara awe.

28 Kasɔla ɔturi sɛ ɔpia kulu i maturi ndɛ̃,

fiɛ ituriraiɣɛ sɛ inina maburise ndɛ̃.

29 Ɔtilese sɛ ɔɣɛ ɔpia ɔ̃ ɔnyii

fiɛ ɔsɛ ɔkɔ wũ ɔkigu i ɔri wɔ loilɛ iso.

30 Ɔturi wɔ nsɛ ɔma ɔturi anɔmi ne ɔba adzuni lalaa;

ɔturi wɔ losɛ̃ sinyako kpa ne, ɔsɛ ɔbara iranyanyariã.

31 Iti fudza ɖe kuwarɛ igaraikoto;

masɛ mana ne iki ara bɔlɔlɔa ibara ame.

32 Ɔturi wɔ nsɛ ɔɣara so lɛ ɔɖo kpãrɛrɛĩ,

nwɔ nsɛ ɔɖesoiso lɛ ɔɖo nwɔ nsɛ ɔmɔɛ̃ ɔmagɛ̃siare.

33 Mapɛ kareremi i ngba ndɛ̃,

ɣɛɛ Bosate nsɛ ɔɖaɛ ne ame.