1 Nwagbe nɖe atɔ̃me wa i Igara Lemuel, Masa igara - ikpakpatɔ̃me nɛ ɔsuã ɔbɔrɛgu i ɔ̃ ɔnyi kɔrɛ ne.

2 "O, wũ ɔbi! O, wũ kayiri ame ɔbi,

O, wũ ndamu ɔbi!

3 Daasu fɔ ɔle asiai marɔ̃go,

daasu fɔ sirɛrɛ̃ atã mma nsɛ mawɔra magara.

4 "O, Lemuel! Iiɖe magara ɔkpɛ ɔɖe i mmɔ -

wain inɛ iilɛ itã magara,

ɔɖeisoi iisɛ ɔbie ndã kpokporoa.

5 Si iiɖe ngbɔ, si ɔnɛ me ne, ɔto ɔ̃aɣara mmara,

fiɛ ɔto ɔ̃afirikira mma mato mawedza inyɛ ɔɖuɖu atɔ̃me sɔ aiya.

6 Mitã mma nto mawɔ ndã kpokporoa;

mitã mma nsɛ mana ibo gu ibɛbɛrɛ wain.

7 Mitã manɛ si maɣara ma siwɛrɛba,

manɛ si maisibanyigi ma inyɛwe ana.

8 "Ɖeika tã mma loisɛ mawo ika ɔɖe kanya,

ɖeika si afɔ, maturi ɔɖuɖu ma nna kuira gu buaidze kanya.

9 Ɖeika si aɖaɛ itɔ̃me i ɔri wɔ loya iso;

si afɔ mawɛrɛba gu maɣiãni kanya."

10 Nna loana ɔre sɛɛ ku iwobara?

Ɔfɔ kuɣa fafaafã ɔɖo ita nɛ lofɔ kuɣa.

11 Ɔ̃ ɔrã sɛ ɔsiaiti pelepele i ɔ̃ ɔre iso

fiɛ kuira sɛɛ iisɛ inya wũ.

12 Ɔsɛ ɔbara isɛɛ ɔtã ɔrɛrɛ̃, iiɖe iraboa,

i ɔ̃ agbanayi ɔɖuɖu ame.

13 Ɔsɛ ɔbie sɛrɛrerɔ̃ siwɛrɛ̃ gu ɖɔti

fiɛ ɔsɛ ɔsu ɔ̃ nrɔɔ̃ ɔbara karabara ku isoɣɔ.

14 Ɔse lɛ kuɣamaɖese nduisoibuɛ awe,

fiɛ ɔsɛ ɔkpadzɛ̃ araɖea ɔbɔrɛgu i kudzorokɔ̃ ɔbɔ.

15 Ɔsɛ ɔrɛ ɔta mala fiɛ kaɖe sɛ kasɛ̃.

Ɔsɛ ɔtã ɔ̃ iyomaturi aɖera

fiɛ ɔsɛ ɔtã ɔ̃ maɖaborɔ̃gomi ma aɖera.

16 Ɔsɛ ɔbara adzuni ɔbie kakpɛrɔ̃ ɔɣa;

fiɛ ɔsɛ ɔsu sikã dzɛ ɔna i ɔ̃ karabara ame, ɔkpɛ̃ kamɔwĩ.

17 Ɔsɛ ɔbara ɔ̃ karabara ku ɔle;

fiɛ ɔsɛ ɔpia ɔ̃ nrɔɔ̃ ɔle ɔtã karabara.

18 Ɔsɛ ɔnyɔ sɔ ɔ̃ kuɣaiɖe sɛ ibɔ wũ kusia.

Ɔ̃ ɔkaniɛ iisɛ ɔnyi ku kasɛ̃.

19 Ɔsɛ ɔmɔɛ̃ ɔdziri wɔ iso mapia ɖɔti

fiɛ ɔsɛ ɔmɔɛ̃ katara ku arɔĩ ana.

20 Ɔsɛ ɔbusi kɔrɔ̃ ame ɔtã mawɛrɛba

fiɛ ɔsɛ ɔbuai maɣiãni.

21 Ɔ̃isɛ ɔnigã i ɔ̃ iyomaturi iso si ɔyu pia,

alasɔ ma ɔɖuɖu sɛ mafu so kundu wɔ lofɔ kuɣa.

22 Ɔsɛ ɔbara ɔ̃ karɛkɔ̃ iso sikati;

fiɛ ɔsɛ ɔpia akalala gu ɔgo sikati lɛ igara arapia.

23 Maturi sɛ mawarɛ ɔ̃ ɔrã i itiri,

ngbegɔ ɔsɛ ɔsɛ i karɔ̃ i karɔ̃ kaɖe makpakpa ndɛ̃.

24 Ɔsɛ ɔkã akalala ara ɔrɔdɛ̃,

fiɛ ɔsɛ ɔrɔdɛ̃ sisɔnyira ɔtã kuɣamaɖese.

25 Ɔba ɔle fiɛ ɔɣɛ teteree ku ɔ̃ nsegbai gu kuwarɛ;

ayi wa nto aba ɖe sima i ɔ̃ kɔrɛ.

26 Ɔsɛ ɔɖeika ku iwola,

fiɛ ɔnukuare araite pia i ɔ̃ ɔnyagɛmi iso.

27 Ɔsɛ ɔrara anɔmi ɔnyɔ ara kuseme i ɔ̃ iyo ame

fiɛ ɔ̃isɛ ɔbara ndã.

28 Ɔ̃ mabi sɛ mata makpere wũ sɔ, kusɛkusɛ ɔturi;

ɔ̃ ɔrã ana sɛ ɔkpere wũ ngbɔ ame fiɛ ɔsɛ ɔle wũ ɔɣɛ sɔ,

29 "Marɔ̃go gbodzoo pia mma nsɛ mabara ara sɛɛ wa lobo anɔ;

ɣɛɛ fɔ ne, aɖe ma ɔɖuɖu iso."

30 Situriire ne, kasɔla iɖe fiɛ kulɛ ne, ira siefe iɖe;

ɣɛɛ ɔrɔ̃go wɔ nsɛ ɔnigã Bosate ne, ilɛ sɔ maale wũ.

31 Mitã wũ ɔ̃ karabara kuso,

si male wũ i itiri ala karabara ga ɔbara iti.