1 Igara ɔtu pia i Bosate nrɔɔ̃ ame;

ɔsɛ ɔkɔ wũ ɔkigu i ngbegɔ ɔsɛ ɔɖɔɛ lɛ nduborea awe.

2 Ɔturi arabarara ɔɖuɖu se lɛ aya i ɔ̃ mɔmɔ kɔrɛ

ɣɛɛ Bosate sɛ ɔkere ɔtu ɔnyɔ.

3 Ira sɛɛ gu nnɛ loya ibara

sɛ ibo Bosate anɔ iɖo isɔrɛ.

4 Inyɔso anɔmi gu katoikɔlɛso ne,

matilese ɔkaniɛ wɔ nɖe ikpi kere iɖe!

5 Ɔturi wɔ mba ɔdzini siriita sɛ siɖe kusia

ayi kumɛgɔ i siri mala gu sikurukutua sɛ sibɔ siwɛrɛba.

6 Mila ɔnyagɛmi isu ina karana ne,

ipipi nɛ nsɛ ife kere gu kukpi kata ɔri aɖe.

7 Maturi nyanyariã ɔtile nsɛ iwɔra ma,

alasɔ masɛ masɛ̃ ira sɛɛ ibara.

8 Ɔturi wɔ loɣɛrɛ ɔri sɛ ɔgɔ,

ɣɛɛ nwɔ nna iɣɛrɛ sɛ ɔbara ira nɛ loya.

9 Iyo isã ɔɣokã iso iwe lɛ iɖo

iyo kame iwegu kalɔdze ɔrɔ̃go.

10 Ɔtilese sɛ ɔbie iranyanyariã ibara;

ɔ̃ ɔnyii ara iisɛ akpɛ̃ wũ nnya.

11 Si makpadzɛ̃ aɣiãrase kutsue ne, nwɔ loiɣe kayi ame sɛ ɔtsue iwola;

si mate nwɔ nɣe iwola ara ne, ɔsɛ ɔkpa anɔ.

12 Ɔbɔlɔlɔa sɛ ɔnyɔ ɔtilese iyo ɔsɛ ikpo

fiɛ ɔsɛ ɔkpadzɛ̃ matilese ɔpia i iwɔ ame.

13 Ɔturi wɔ nsɛ ɔtɛ̃ra atsue i mawɛrɛba kaku iso ne,

ɔ̃ wũ ɔto ɔ̃abiɛ kaku fiɛ kuwɛ̃ iibanɔ ɔtã wũ.

14 Karatã ga matã i iwɛrɛ ame sɛ kaɣɔra sikpã,

fiɛ kawɛrɛra ga makɔla i awu ame sɛ ibɔ isobuɛ i sikpã lala ame.

15 Si mabara ira nɛ loya ne isɛ itã ɔturi bɔlɔlɔa isoɣɔ

ɣɛɛ iɖe ifɔ̃ra itã maturi nyanyariã.

16 Ɔturi wɔ losɛnɛkɛ̃ i ara karɔ̃inɔ ɔri iso ne,

ɔto ɔ̃asɛ ɔ̃awarã i makpise ndɛ̃.

17 Ɔturi wɔ nsɛ ɔɖɔɛ kayi iɖe ne, ɔsɛ ɔkpese wɛrɛba;

ɔturi wɔ nsɛ ɔɖɔɛ ndã gu nnɔĩ ne, ɔ̃ibana ara.

18 Ɔtilese masɛ masu matã kukpuraso i ɔturi bɔlɔlɔa kanya,

fiɛ ɔturi wɔ loiɖe ɔnukuarese masɛ masu matã kukpuraso i ɔturi sɛɛ kanya.

19 Fafuĩ ame iwe lɛ iɖo

ɔrɔ̃go kalɔdze gu kanasikpã kɔrɛ isɛ.

20 Ɔturi wolai iyo ne araɖea wa mba ɔmɛrɛ̃ gu nnɔĩ pia;

ɣɛɛ kadzunisɛĩ sɛ ɔɖe irabiara nɛ ɔba.

21 Ɔturi wɔ nsɛ ɔbie ara bɔlɔlɔa ibara gu kuɖɔɛ ne,

ɔ̃ana ngbã gu isaruɛ gu kuwarɛ.

22 Ɔturi wolai sɛ ɔta ɔbo i makparɛrɛĩ ɔmagɛ̃siare iso

fiɛ ɔsɛ ɔbibiɛ ɔlekasɛkɔ̃ ga iso masiaiti ɔfere i karɔ̃.

23 Ɔturi wɔ nsɛ ɔkososo ku ɔ̃ kanya gu ɔnyagɛmi ne,

ɔ̃isɛ ɔpia so i imɔrɛ̃ ame.

24 Katoikɔlɛsoi gu ɔtesoi

wɔ nsɛ ɔbara inyɔso kaɖu ara masɛ makpere sɔ "Aɣiãrase".

25 Dãdze ɔrakolo nsɛ ɔɖoe wũ,

alasɔ ɔ̃ nrɔɔ̃ ɔsɛ̃ karabara ibara.

26 Dãdze sɛ ɔkɛkɛ anɔ ɔbua ku ɔwi biara,

ɣɛɛ ɔturi bɔlɔlɔa sɛ ɔtã maturi ara faa.

27 Ɔtilese isɔrɛ ɖe inyanyara -

ibua inyanyarĩ gbaã si iɖe sɔ masu ne mabɔ ku adzuni nyanyariã!

28 Aɖansiɛ ladze to ɔ̃awɔ,

fiɛ ɔrere wɔ lokã wũ atsue to ɔ̃awɔ.

29 Ɔtilese sɛ ɔbua ɔbara anɔɣɔa.

ɣɛɛ ɔturi sɛɛ sɛ ɔsɛ iti ame i ɔ̃ nsɛgbai iso.

30 Iwola gu ara karɔ̃inɔ gu adzuni ibara kuawɛ̃

iibawo iti ɔre si ita iya i Bosate iso.

31 Masɛ maledza ipɔngɔ masɛ itã kakpã iyi,

ɣɛɛ iɖeiso pia i Bosate nrɔɔ̃ ame.