1 Samuel 15

Bosate Ɔsɛ̃ Saul Lɛ Igara

1 Samuel ɔɣere Saul sɔ, "Mme i Bosate ɔsese sɔ losɔla-ɔ nnɔĩ si aɖe igara i ɔ̃ kaɖe Israel iso. Kiniɔ ne, kã atsue si anɔ itɔ̃me nɛ i Bosate to ɔɣɛ. 2 Bosate Ɔlesate to ɔɣɛ sɔ, ' Loakpadzɛ̃ ma Amalekse kutsue ala nnɛ mabara Israel mabi gɔ mawɛrɛ masia Israel mabi ku ɔwi wɔ mabɔrɛ i Egipte karɔ̃ iso mato maba. 3 Ne ɔso kɛlɛ kiniɔ, si asɛ aata kakpã i ma Amalekse iso si awɔra ma ku irabiara nɛ maba pelepele. Daanyɔ ma nnya; ɖoe marɛrɛ̃ gu marɔ̃go, mabi gu mabiɛtɛ, manantsuĩ gu masɛrɛ, kupuapɔngɔ gu mafirimu.' "

4 Ne ɔso Saul ɔkpere ɔ̃ makpakpɛ̃dze ɔsirakanya i Telaim. Makpakpɛ̃dze ma nsɛ masɛ i ngba iso kukpi alafa anyɔ ɔbɔrɛ i Israel ame fiɛ kukpi kuweo ɔbɔrɛ i Yuda. 5 Ne Saul ɔkɛlɛ Amalek ɔmagɛ̃siare kɔrɛ masɛ maawɛrɛ masia i kawɛlagbolomi ame. 6 Ne ɔɣere ma Kenise sɔ, "Mirui, mikɛlɛ minyua ma Amalekse si loibawɔra mi gu ma; alasɔ mibara Israel mabi ɔɖuɖu kayiribielea gɔ mabɔrɛ i Egipte karɔ̃ iso." Ne ɔso ma Kenise ɔrui i ma Amalekse kɔrɛ.

7 Ne Saul ɔta kakpã i ma Amalekse iso i ɔri ɔɖuɖu iso ita i Xavila ikɛlɛ Sur wɔ mpia i Egipte kuɣɛ̃kabɔrɛkɔ̃ isɛ. 8 Ɔmɔɛ̃ Agag ma Amalekse igara ɔnyɔa, ɣɛɛ ɔɖoe ɔ̃ maturi ɔɖuɖu ku ipɛmi. 9 Ɣɛɛ Saul gu ɔ̃ makpakpɛ̃dze iiɖoe Agag gu masɛrɛ gu manantsuĩ ma nlɛ gbaã gu manantsuĩ kosoi ma mba iɖa. Maibie sɔ maawɔra wã pelepele. Ɣɛɛ ibiara nɛ manyɔ pupurii gu mabɔi ma nna ɔle ne mawɔra ma pelepele.

10 Ne Bosate ɔɣere Samuel sɔ, 11 "Ibo me so sɔ lotã Saul ɔɖe igara alasɔ ɔsɛ̃ me ɔ̃imɔɛ̃ wũ asɛra ɔla." Samuel ɔwe i isoma ame, fiɛ ɔkparamakayi ɔtã Bosate kasɛ̃ ɔɖuɖu gamɔ. 12 Samuel ɔta ku kaya tutuutu ɔkɛlɛ si ɔsɛ ɔ̃anya Saul, ɣɛɛ maɣere wũ sɔ, "Saul ka ɔkpa Karmel ɔmagɛ̃ ame. Mmɔ i Saul ɔɔtsue inyigira ɔsu ɔpia so kuwarɛ, ne ka ɔfiriki ɔso ɔri ɔkɛlɛ Gilgal ne."

13 Ɔwi wɔ i Samuel ɔbo i ɔ̃ kɔrɛ ne, Saul ɔɣɛ sɔ, "Bosate si ɔfere-ɔ kusɛkusɛ! Loɔbara i Bosate asɛra iso."

14 Ɣɛɛ Samuel ɔɣɛ sɔ, "Be ɔso nto lonɔ masɛrɛ ibiɛ? Be nɖe manantsuĩ siwutĩ dzɛ nto lonɔ?"

15 Saul ɔtã mmuai sɔ, "Makpakpɛ̃dze losu wã i ma Amalekse kɔrɛ mabɔ. Manyua masɛrɛ gu manantsuĩ ma nlɛ gbaã manyɔa sɔ maasɔrɛ ma matã Bosate fɔ Ɣaa, ɣɛɛ ara tsɔra ibiara ne bowɔra wã pelepele."

16 Samuel ɔɣere Saul sɔ, "Nyua ikaɖe! Tã me loɣere-ɔ nnɛ i Bosate ɔɣere me kɔmakaɖe ku kasɛ̃." Saul ɔɣɛ sɔ, "Ɣere me."

17 Samuel ɔkarɛ wũ sɔ, "Atoasɔ anyɔ so sɔ aire kuira saa ne, aiba aakpese Israel kumele tɔ̃ɖedze ɣɛɛ? Bosate losɔla-ɔ nnɔĩ ɔsɛra-ɔ igara i Israel kaɖe iso. 18 Ne ɔpia-ɔ katɔ̃me ɔɣere-ɔ sɔ, 'Kɛlɛ si asɛ aawɔra ma Amalekse, maturi nyanyariã mamɔ pelepele. Kpɛ̃gu ma kakpã gbɔgbɔɔgbɔ awɔra ma ɔɖuɖu aɖi.' 19 Be ɔso aikã Bosate atsue? Be ɔso amɔɛ̃ kakpã ame ara asɛ fiɛ abara iranyanyariã i Bosate anɔ?"

20 Saul ɔtã mmuai sɔ, "Ɣɛɛ lowarɛ Bosate. Losɛ katɔ̃me ga i Bosate ɔpia me. Lowɔra ma Amalekse pelepele fiɛ lomɔɛ̃ ma igara Agag lobɔ. 21 Makpakpɛ̃dze ɔsu masɛrɛ gu manatsuĩ i kakpã ame, ara wa nlɛ fiɛ maasu matã Ɣaa gɔ maasɔrɛ wã matã Bosate fɔ Ɣaa i Gilgal."

22 Ɣɛɛ Samuel ɔtã mmuai sɔ,

"Be nsɛ ipia Bosate isoɣɔ iɖo, araifɛ̃ asɔrɛ gu asɔrɛ

ɛɛbɛrɛ lɛ maturi si makã Bosate silɔ atsue?

Iwarɛ lɛ iɖo isɔrɛ,

fiɛ atsueikã lɛ iɖo sɔ afɛ̃ akpalasa iɖa.

23 Itaiyaiso se lɛ sibɔipɛ ikpi,

fiɛ iteso ikpi se lɛ iɣɔsɔrɛ ikpi.

Bosate ɔɔsɛ̃-ɔ lɛ igara,

alasɔ asɛ̃ ɔ̃ itɔ̃me."

24 Ne Saul ɔɣere Samuel sɔ, "Lobara ikpi. Loiwarɛ Bosate mmara gu fɔ asɛra. Lonigã maturi ne ɔso lobara nnɛ makarɛ ne. 25 Kiniɔ ne, nto-ɔ i kukpa, su wũ ikpi tsɛ me si akpesegu me bokɛlɛ si losɛ loasumu Bosate.

26 Ɣɛɛ Samuel ɔɣere wũ sɔ, "Loibakpesegu-ɔ. Asɛ̃ Bosate itɔ̃me, fiɛ Bosate ɔɔsɛ̃-ɔ lɛ Israel igara!"

27 Gɔ Samuel ɔpɛ ɔfiriki to ɔrui ne, Saul ɔpɛ ɔ̃ awu kutsueti iso ne akɛ ne. 28 Samuel ɔɣere wũ sɔ, "Bosate ɔɔkɛ Israel sigarakaɖekɔ̃ ɔɖi i fɔ nrɔɔ̃ ame nɔme. Ɔto ɔ̃asu ɔtã ɔturi mama sɔ ɔɖe igara - ɔturi wɔ nlɛ ɔɖo-ɔ. 29 Nwɔ nɖe Israel Ikpawaĩ iisɛ ɔla sila ɣee ɔfirikira ɔ̃ adzuni; alasɔ ɔ̃iɖe ɔturi awune sɔ ɔ̃afirikira ɔ̃ adzuni."

30 Ne Saul ɔtã mmuai sɔ, "Lobara ikpi. Ɣɛɛ pia me kuwarɛ i wũ kaɖe makpakpa gu Israel mabi katɔ̃. Kpesegu me, si loasumu Bosate fɔ Ɣaa." 31 Ne ɔso Samuel ɔkpesegu Saul, ne Saul ɔsumu Bosate ne. 32 Samuel ɔɣɛ sɔ, "Kɔ Agag ma Amalekse igara bɔ me,"

Agag ɔba i ɔ̃ kɔrɛ ku kafɔkaɖe ku adzuni sɔ, "Gbaã ne sikpã dzɛ loabɔ kukpi ɔɔfe."

33 Ɣɛɛ Samuel ɔɣɛ sɔ,

"Lɛ kumɛgɔ i fɔ ipɛmi ɔbara marɔ̃go gbodzoo lɛ maiɣe mabi ne,

ngbɔ ame fɔ ɔnyi aakpese lɛ ɔrɔ̃go wɔ loiɣe ɔbi i marɔ̃go ndɛ̃."

Ne Samuel ɔɖoe Agag i Bosate anɔ i Gilgal.

34 Ne Samuel ɔkɛlɛ Rama, ɣɛɛ Saul ɔkɛlɛ kaa i Gibea i Saul iyo. 35 Gbɔgbɔɔgbɔ Samuel ɔkpi ne, ɔ̃isisɛ ɔ̃anya Saul ana, atoasɔ Samuel ɔwe i isoma ame i nnɛ i Saul ɔbara iti. Ibo Bosate so sɔ ɔsɛ Saul sigara i Israel kaɖe iso.