1 Kaɖikate ga i Ɣaa ɔɖi ɔte Yesaya wɔ nɖe Amoz ɔbibirɛrɛĩ i Yerusalem gu Yuda iso ku ɔwi wɔ i Uziya, Yotam, Axaz gu Xezekia ɔɖe sigara i Yuda karɔ̃ iso.

2 Kuɖokpo, minɔ! Karɔ̃, mikã atsue!

Alasɔ Bosate ɔɔɣɛ sɔ,

"Loɔkãrarã mabi, lonyɔ mabi iso,

ɣɛɛ mabi ɔɔta maya me iso.

3 Nantsuĩrɛrɛ̃ ɣe ɔ̃ ɔkɔse,

ɔfirimu ɣe ngbegɔ i ɔ̃ sate sɛ ɔsɛ wũ aɖera,

ɣɛɛ Israel iiɣe,

wũ maturi iinɔkarɔ̃."

4 Ndzo mitã ikpi kaɖe,

maturi ma loyigu aɣɛrɛ siare,

ara lalaa mabaradze ɔkparɛ,

mabi ma siri ame loikpa!

Maɔkora kama matã Bosate;

masɛ̃ Israel Ɔsekelea

fiɛ makora kama matã wũ.

5 Be ɔso maakpese mapɛ mi kama?

Be ɔso mitogu atsuele?

Mi iti ɔɖuɖu ɔɔfɔ igbɛ,

mi ɔtu ɔɖuɖu ɔɔbo ɔnyɛ.

6 Ita i fɔ itititɛ̃ ibo fɔ ngbatata

isosarɛ kuiwɛ̃ na -

ibɛbɛ gu so ibibiɛ

ayɛi gu imumu,

nwa maiwiri mabɔ ara

ɣee maipia wã nnɔĩ.

7 Fɔ karɔ̃ ɔɔkpese ikpakpi,

maɔtsuedza mi simagɛ̃siare ala ɔtɔ;

mafɔ nto masɔrɛ̃ mi ɔraɖui

i mi mɔmɔ anɔmi ame,

mafɔ ɔɔwɔra mi karɔ̃.

8 Zion ɔbirɔ̃gomi ɔnɔwɛ̃ ɔɔkuti

lɛ ikpayo i wainkakpɛkɔ̃ ndɛ̃,

lɛ ikpayo i ikekewe kakpɛkɔ̃ ame,

lɛ ɔmagɛ̃siare wɔ i matsirise ɔki malɔ.

9 Si iiɖe Bosate Ɔlesate

lonyua maturi mawɛ̃ ɔsɛ bo ne,

tee boakpese lɛ Sodom,

tee boakpese lɛ Gomora.

10 Minɔ Bosate itɔ̃me

mi Sodom maɖeisoi;

minɔ bo Ɣaa mmara,

mi Gomora maturi!

11 "Be i mi arafɛã gbodzoo ɖe atã me?"

Bosate loɣɛ ngbɔ.

"Araifɛ̃ asɔrɛ ɔɔfe me isi,

akpalasa gu mabɔi ma mba so iɖa;

lona isoɣɔ kuiwɛ̃

i manatsuĩrɛrɛ̃ gu akpalasa gu kutepuĩ ima ame.

12 Si miba i wũ anɔ ne,

nna loɔkarɛ ira ɔbɔrɛgu i mi kɔrɛ,

sɔ miatutuĩ sikpatɔrɛ̃ i wũ kakpataku ame?

13 Minyua asɔrɛ wa nna karɔ̃ ibɔ!

Mi kuakɔrɔ̃kɔrɔã to kukpɛ̃ me ɔnyanya.

Kuwa ɣɛtɛ, Iwarãyi gu mi ayi iɖe ɔɖuɖu -

loisibawo mi asarɛ nyanyariã ɔfɔ ɔpia.

14 Mi Kuwa Ɣɛtɛ gu ayiɖea ne,

ta wũ ɔkala sɛ ɔtsiri.

Ɔɔkpese me ato;

iɔɖa me ɔsore.

15 Si miwarɛ mi nrɔɔ̃ misɔ̃ me i kayiikparama ame ne,

loakɔla wũ katɔ̃;

si mikparamakayi gbidii kɔraa ne,

loibakã mi atsue.

Ima ɔɣede i mi nrɔɔ̃ iso;

16 mipie ndu si misekelera so.

Miɖi mi ara lalaa

mibɔrɛgu me i katɔ̃!

Minyua ikpi ibara,

17 misuã isɛɛ ibara!

Mibara ara i ɔri iso,

mipia mma i ɔtu ɔbiɛ kɔrɔ̃ i kayiri.

Mikpɛ̃ mitã makpisemabi,

si miɣɛ mitã makpisemare.

18 "Miba si boɣɛ borara so,"

Bosate loɣɛ ngbɔ.

"Atoasɔ mi akpi se lɛ ɔgo rɛtɛa ne,

aafudza lɛ atumagirĩ;

Atoasɔ arɛtɛ lɛ ima ne,

aafudza lɛ ɖɔti fudza.

19 Si minɔ so karɔ̃ sɔ miakã atsue ne,

miaɖe karɔ̃ iso ara sɛɛ,

20 ɣɛɛ si misɛ̃ fiɛ mita miya me iso ne,

ipɛmi loawɔra mi."

Alasɔ Bosate losu ɔ̃ kanya ɔɣɛ.

21 Nyɔ kumɛgɔ i ɔmagɛ̃siare wɔ maturi nsɛ msiaiti i Bosate ɔnɔwɛ̃ iso,

ɔɔkpese marɛrɛ̃siaidze!

Ɔwiɔ ɔyigu atɔ̃meiɣɛ i ɔri iso,

fiɛ sibɔlɔlɔ ɔwe i ɔ̃ ame,

ɣɛɛ kiniɔ ne, ayigu maturiɖoese!

22 Mi sikãfudza ɔɔkpi anɔ,

maɔlupu mi ndã sɛɛ ku ndu.

23 Mma lota maɣɛ i maturi iso i mi maɖeisoi ɖe,

mayukukpe malaa

masɛ mafɔ ara i iwɛrɛ ame,

fiɛ masɛ matere masiai karatã.

Maisɛ maɣɛ makpisemabi kanya,

fiɛ makuɛdze atɔ̃me iisɛ aba i ma katɔ̃.

24 Ne ɔso Sate, Bosate Ɔlesate,

Israel Ɣaa Siare ɔɔɖikanya sɔ,

"Aa, loaɖi wũ sikpã losia i wũ matsirise iso,

lotã wũ matsirise kuso.

25 Loakarĩ ikama losɔ̃ mi,

loafore matɔ ma mipɛ loɖi i mi iso kukaakɔ

lofore inyini igbã biara loɖi i mi iso.

26 Loakpesegu matɔ̃meɣɛdze lotã mi lɛ kokowi,

gu mma loaka mi lɛ karɔ̃kasɛkɔ̃.

Ne kama maarɔ mi sɔ,

Sibɔlɔlɔ Ɔmagɛ̃siare,

Ɔmagɛ̃siare wɔ maturi nsɛ mabara ara i ɔri iso."

27 Maaɖi Zion iki i atɔ̃meiɣɛ i ɔri iso,

fiɛ mma lofiriki ana aana iɖi iki i sibɔlɔlɔ ame.

28 Ɣɛɛ loawɔra makpibaradze gu mma lota maɣɛ me iso,

fiɛ mma lokpese Bosate i kama aawɔ.

29 "Kunuarɛ aakpɛ̃ mi i adziri siare wa iso misiaiti ɔso,

nwa ɔso i so sɛ siɣɔ mi;

Kunuarɛ aakpɛ̃ mi ala kuwĩ

gɔ mifɔ mitã so ɔso.

30 Miase lɛ adziri siare wa ayata nto akpi,

miase lɛ kawĩ ga ame i ndu na.

31 Ɔrɛrɛ̃ wɔ mba ɔle aakpese sikua korea,

ɔ̃ karabara aaɖe katɔmɛrɛ̃mɛrɛĩ.

Wã aka anyɔ ɔɖuɖu aatsue,

fiɛ kuwɛ̃ iibawo ɔtɔ ɔnidza."