1 Itɔ̃me nɛ i Ɣaa ɔtã Yesaya wɔ nɖe Amoz ɔbi i Yuda gu Yerusalem iso i ngbe ne:

2 I ayi tsɔra ame ne,

kube gɔ iso i Bosate Isɔrɛyo ɣɛ aaledza iya

lɛ kube gɔ lonya kuɖo abe tsɔra;

mato maakɔlɛ kɔ̃ kato maɖo kubemi tsɔra,

fiɛ nɖebi ɔɖuɖu aasia ɔbole maba i kɔ̃ kɔrɛ.

3 Nɖebi maturi gbodzoo aaba maaɣɛ sɔ,

"Miba bokɛlɛ Bosate kube iso,

si bokɛlɛ Yakob Ɣaa isɔrɛyo.

Ɔ̃ate bo nnɛ si bobara,

sɔ boasɛ i ɔ̃ siri iso."

Maate bo ɔ̃ iso ara i Zion,

fiɛ boafɔ Bosate itɔ̃me bobɔrɛgu i Yerusalem.

4 Ɔto ɔ̃aɣɛ atɔ̃me i nɖebi ndɛ̃

fiɛ ɔ̃aɖaɛ kakpadzɛ̃ i maturi gbodzoo ndɛ̃.

Mato maatore ma apɛmi makpesera akpuã

matore ma afele makpesera sinyɔĩ.

Kaɖe iisibasu ikpira i kaɖe mama iso,

fiɛ maisibasuã kakpã ikpɛ̃ manya.

5 Miba, O Yakob iyo,

mitã bosɛ i Bosate ikpawaĩ ame.

6 Ɔɔnyua fɔ kaɖe asɛ

Yakob iyo.

Mafɔ awara wa lobɔrɛ i kuɣɛ̃kabɔrɛkɔ̃ maɖe kaɖu

masɛ mapɛsibɔ lɛ ma Filistise

fiɛ ma gu maɣɔsɔrɛdze nsɛ maɖe masiaidzo.

7 Ma karɔ̃ ɔyigu sikãfudza gu sikãrɛtɛa;

aibawo ma karana ɔka.

Ma karɔ̃ ɔyigu apɔngɔ;

aibawo ma abuɛ wa i apɔngɔ sɛ akpadzɛ̃ ɔka.

8 Ma karɔ̃ ɔyigu aɣɔ;

masɛ mabɔ ati karɔ̃ matã ara wa mabara ala ma nrɔɔ̃,

ara wa i ma arɔĩ ɔbara.

9 Ne ɔso maabɔ maturi karɔ̃

maabɔ ɔturi biara karɔ̃,

daasu atsɛ ma.

10 Mikɛlɛ atawo ame,

si miwɛrɛ i karɔ̃ ame

i Bosate sikpã katɔ̃

gu ɔ̃ ikpawaĩ ɔle kɔrɛ!

11 Mma loisɛ mawarɛ kuira anɔ aaba karɔ̃;

fiɛ mma lokɔlɛ so kato aakpase;

Bosate ɔnɔwɛ̃ maakɔlɛ kato ku iyi nɛmɔ.

12 Bosate Ɔlesate ɔɔledza iyi ɔsɛ

ɔtã mma ɔɖuɖu nsɛ makɔlɛ so, manyɔ so,

alasɔ irabiara nɛ makɔlɛ kato ne,

(ɔto ɔ̃abɔ ne karɔ̃).

13 Bosate ɔɔɖo ngbɔ i Lebanon seder adziri kɔlɛa wa nto alɛnyɔ,

gu Basan adziri siare ɔɖuɖu iso.

14 Ɔɖo ngbɔ i abe kɔlɛa ɔɖuɖu,

gu kubemi kɔlɛa ɔɖuɖu iso,

15 ayo kɔlɛa ɔɖuɖu

gu abere wa mba ɔle iso,

16 kuɣamaɖese sikolo ɔɖuɖu,

gu ɔkolo siare biara.

17 Ɔ̃abɔ maturi sitatawele karɔ̃

ɔbɔ mma lokɔlɛ so kato karɔ̃;

Bosate ɔnɔwɛ̃ pɛ maakɔlɛ kato ku iyi nɛmɔ,

18 fiɛ aɣɔ aayu pelepele.

19 Maturi aatere maawɛrɛ i sikpolo i atasiare ame

gu abiɔ ame

ala Bosate kunigã ɔso,

ala ɔ̃ ɔle gu ikpawaĩ ɔso,

ku ɔwi wɔ i Bosate aatidza karɔ̃.

20 Iyi nɛmɔ ne, maturi to maafuĩdza ma aɣɔ

matã makpe gu kudzadzai

ma sikãrɛtɛa aɣɔ gu sikãfudza aɣɔ

wa mabara sɔ maasɔrɛ.

21 Mato maatere makɛlɛ atawo ame

gu ata kayirinɔ

matere ala Bosate kunigã,

ɔ̃ ɔle gu ikpawaĩ ɔso

ku iyi nɛ ɔ̃ata ɔtidza karɔ̃.

22 Nyua iti isu isia i ɔturi iso,

nwɔ mba siwarã kere i ɔ̃ aɣɔ̃roi ame.

Mme kusia maba?