1 So aaɣɔ fafuĩ ame gu karɔ̃ korea;

so aaɣɔ igbigbi itata fɔrɔfɔrɔ.

Lɛ inya ne,

2 iafere aɣɔ̃la ɔluwɛ̃;

so aaɣɔ ne ilakulu i isoɣɔ ame.

Maasu Lebanon kuwarɛ matã ne,

Karmel kube gu Saron katɛfɛkɔ̃ kuwarɛ;

maanya Bosate Kuwarɛ,

Bo Ɣaa ɔle.

3 Pia nrɔɔ̃ mɛ lofɛfɛ̃ ɔle,

pia agɛgɛ̃ wa lonyɔkɔtɔ̃ ɔle;

4 ɣere mma mba ifɔ̃ situ

"Mina situ, midaanigã;

mi Ɣaa to ɔ̃aba,

ɔto ɔ̃aba ɔ̃ati maturi kuso;

kuso gɔ mba ɔle

ɔ̃aba ɔ̃ɔɖi mi."

5 Iyɔ manɔbiɛdze anɔ aabusi

fiɛ matsuetɛ̃se atsue aabusi.

6 Iyɔ mabafã to maakɔlɛ maɣo lɛ kasɔlɔ,

mamumu ɔla isoɣɔ kulu.

Ndu aagodɛ̃ mibɔrɛ pupuupu i igbigbi ame

fiɛ ndu aabore ɔkore i fafuĩ ame.

7 Iwarĩ nɛ nto itsue aakpese itubu,

ndu aagodɛ̃ i karɔ̃ korea iso.

Ngbegɔ i aboroi ɔwɛrɛ ɔwiɔ ne,

sikua gu tsatsa sikua gu ndu kɔrɛ sikua aare.

8 Fiɛ ɔri siare aaki i mmɔ;

maarɔ wũ sɔ Isekele Ɔri.

Mma loisekele iibasɛ i ɔ̃ iso;

ɔ̃ase ɔtã mma nsɛ i Ɔri iso;

matilese dzunisɛĩ iibasɛ i ɔ̃ iso.

9 Dzata kuwɛ̃ iibawe i mmɔ,

ɣee bɔi lalaa kuwɛ̃ ɔsɛ i ɔ̃ iso;

maibanya ma i mmɔ.

Ɣɛɛ mma maɖi kere loasɛ i mmɔ,

10 mma i Bosate ɔɖi aakpese maba.

Maabo i Zion ku aka;

isoɣɔ nɛ nna katuĩ aaɖe sigaraikoto i ma ati iso.

Ilɛlɛ gu isoɣɔ aaɖe ma ɔkpɛ,

fiɛ isoma gu imararãso aatere i ma kɔrɛ.