1 "Bosate ɔɣere Kores wɔ ɔsɔla nnɔĩ sɔ,

fɔ kuɖearɔ̃ lomɔɛ̃ loto

loabɔ nɖebi karɔ̃ i fɔ kayirinɔ

ato aafɔ ɔle i ma magara iso.

Loabusi kuyogodɔ̃ lotã-ɔ

fiɛ kuwɛ̃ iisibasɛ̃ kɔ̃.

2 Loaɖe-ɔ katɔ̃

loabibiɛ abe lobara tsɛtsɛtsɛ

loabibiɛ ayiwa kuyogodɔ̃

fiɛ loatu abɔra kuyogodɔsɛ̃dziri loɖi.

3 Loasu karana ga i ngɔi gudua ame,

ara wa makɔla i kuwɛrɛkɔ̃ lotã-ɔ,

si aatsue sɔ Mme nɖe Bosate,

Israel Ɣaa, nwɔ lokpere-ɔ ku fɔ iyere.

4 Loɔkpere-ɔ, ku fɔ iyere

ala Yakob wũ ɔɖabo ɔso,

Israel wɔ loɖi losɛ so.

Atoasɔ ainya me aɖiite ne,

loasia-ɔ iyere nɛ mba kuwarɛ gbaã.

5 Mme nɖe Bosate, fiɛ kuwɛ̃ mama siina.

I wũ kama ne, Ɣaa kuwɛ̃ siina.

Loatã-ɔ ɔle,

atoasɔ ainya me aɖiite kɔraa.

6 Si maturi awune ɔɖuɖu i kayiiso ita i kuɣɛ̃kabɔrɛkɔ̃

ikɛlɛ kuɣɛ̃iyokabokɔ̃

aatsue sɔ ɣaa mama kuwɛ̃ siina iɖo me.

Mme nɖe Bosate, fiɛ ɣaa mama kuwɛ̃ siina.

7 Mme lobara ɔtɔ fiɛ lobara idududu.

Losɛ lobɔ isaruɛ fiɛ nsɛ lokpadzɛ̃ kukpakpi lobɔ.

Mme, Bosate, nsɛ lobara ara wagbe ɔɖuɖu.

8 "Kato i kuɖokpo, pɛ sibɔlɔlɔ lɛ kado awe;

tã adɔdɔ si asɔrɛ̃ sɛ̃ abɔ karɔ̃.

Tã karɔ̃ si kabusi bogã,

si atã iɖi si ire,

si sibɔlɔlɔ si simɔ ku ne;

Mme, Bosate, Mme lobara ne.

9 "Ndzo mitã nwɔ nsɛ ɔlɔgu ɔ̃ Baradze,

Ndzo mitã ibui nɛ nse lɛ abui mama i karɔ̃.

Sise sɛ sikarɛ rapɔdze sɔ,

'Be ato abara?'

Fɔ karabara sɛ kaɣɛ sɔ,

'Ɔna nrɔɔ̃ kumiwɛ̃'?

10 Ndzo mitã nwɔ nsɛ ɔɣere ɔ̃ ɔse sɔ,

'Be ɔso aɣe me?'

Ɣee ɔɣere ɔ̃ ɔnyi sɔ,

'Be ɔso aɣe me ngbɔ?'

11 "Bosate, Israel Ɔsekelea,

nwɔ lobara Israel to ɔɣere ma sɔ,

Ise i ara wa loaba iso ne,

miakarɛ me ara i wũ mabi iso,

ɣee mitã me mmara i wũ kɔrɔ̃ karabara iso?

12 Mme nɖe nwɔ lobara karɔ̃

fiɛ loɖi maturi awune losia i kã iso.

Wũ mɔmɔ nrɔɔ̃ losu lowarɛ kato i kuɖokpo;

fiɛ losɛ awãmi i wã kasɛkɔ̃ fiɛ nto loɖe wã iso.

13 Loaɖi Kores i wũ sibɔlɔlɔ ame.

Loabara ɔ̃ siri ɔɖuɖu sise tɔrɔrɔ.

Ɔto ɔ̃aledza wũ ɔmagɛ̃siare iɖaɛ,

fiɛ ɔ̃atã wũ mafɔrɔĩ isɛguso,

fiɛ ɔ̃ibabie sɔ ɔ̃afɔ kuso i ne iti.

Kumɛɔ i Bosate Ɔlesate to ɔɣɛ ne."

14 Bosate to ɔɣere Israel sɔ,

"Ato aaɖe sigara i ma Egiptese ara wa mabara iso, ma Nubiase* are

gu ma Sebease are, mma lokɔlɛ -

mato maaba fɔ kɔrɛ gu ara ɔɖuɖu wa mato marɔdɛ̃

fiɛ wã ɔɖuɖu aaɖe fɔ are.

Mato maasiai-ɔ i kama

lɛ mayorɛdze mpia i kugbagɔrɔĩ ame.

Mato maapɛ agɛgɛ̃ i fɔ katɔ̃

mapɛ-ɔ nrɔɔ̃ maɣɛ sɔ,

'Gbaã ne Ɣaa piagu-ɔ, fiɛ kuwɛ̃ mama na;

ɣaa mama kuwɛ̃ na.' "

15 Gbaã ne, Ɣaa wɔ nsɛ ɔwɛrɛ so aɖe,

O Ɣaa gu Israel Ɖidze.

16 Mato maapia maɣɔpɔdze ɔɖuɖu kunuarɛ masopara ma ana;

mato maasopara ma masakanya.

17 Ɣɛɛ Bosate to ɔ̃aɖi Israel

ku iɖi nɛ nna katuĩ.

Maisibasopara-ɔ ɣee mapia-ɔ kunuarɛ ana,

ku ɔwi wɔ loaba ame kuiyikuiyi.

18 Bosate to ɔɣɛ sɔ -

ɔ̃ wɔ lobara kato,

Ɔ̃ nɖe Ɣaa;

ɔ̃ loɖi karɔ̃ fiɛ ɔbara kã,

ɔɣedza kã fiɛ kase.

Ɔ̃ibara kã sɔ kase kakunu,

ɣɛɛ ɔbara kã sɔ maturi awune si masɛ i kã iso.

Ɔsɛ ɔɣɛ sɔ,

"Mme nɖe Bosate,

fiɛ ɣaa mama kuwɛ̃ siina.

19 Loisu wũ atɔ̃me lowɛrɛ,

i kakɔi ga nɖe idududu kasɛkɔ̃.

Loiɣere Yakob ɔkparɛ sɔ,

'Mibie me siefe.'

Mme, Bosate nsɛ loɣɛ ɔnukuare.

Nsɛ loɣɛ nnɛ loya.

20 "Misa so kanya si miba;

misikanya, mi nɖebi maturiterea.

Madzunisɛĩ nɖe mma nto kudziri kuɣɔpɔa maki,

ma nsɛ makparamakayi matã maɣaa ma loisɛ mawo ɔturi ɔɖi.

21 Miɣɛ ne i mi ndɛ̃,

si misiaita i nnɛ miaɣɛ misu miɖi so.

Nna lonya ne ɔɣɛ ɔsɛ kokooko?

Nna loɣɛ ne ta ɔwi dzoroo ame?

Iiɖe Mme, Bosate loɖe ɣɛɛ?

Ɣaa mama kuwɛ̃ na isu iɖo Mme,

Ɣaa bɔlɔlɔa gu Ɖidze;

kuwɛ̃ na ɣɛɛ mme pɛ.

22 "Maturi ɔɖuɖu

mifiriki minyɔ me si loɖi mi;

alasɔ Mme nɖe Ɣaa, fiɛ ɣaa kuwɛ̃ mama siina.

23 Lotarĩgu wũ mɔmɔ iyere,

loɔɣɛ nnɛ nɖe ɔnukuare

fiɛ loibafirikira nnɛ loɣɛ.

Ɔbiara aabɔitikarɔ̃ ɔtã me;

fiɛ ɔnyagɛmi biara aaɖe ɔnukuare ɔtã me.

24 Maturi to maaɣɛ sɔ, 'Bosate kɔrɛ i wũ sibɔlɔlɔ gu ɔle ɔɖuɖu sɛ abɔrɛ.' "

Mma ɔɖuɖu nto managu wũ sikpã

to maaba i ɔ̃ kɔrɛ fiɛ mato maapia ma kunuarɛ.

25 Ɣɛɛ i Bosate ame i Israel sikparɛ ɔɖuɖu aaɖeiso

fiɛ i ɔ̃ ame maase bɔlɔlɔ fiɛ maana isoɣɔ maɖe ndamu.