1 Bosate sɔ,

"Lɛ i mi ɔnyi isɛ̃soko

wɔ losɛ̃ wũ ala se?

Ɣee iɖe wũ nyɛtãse

wɔ lorɔdɛ̃ mi lotã?

Ala mi akpi ibara iti ɔso marɔdɛ̃ mi.

Mi aɣɛrɛ ɔso masɛ̃ mi ɔnyi.

2 Ɔwi wɔ loba ne, be ɔso kuwɛ̃ na?

Ɔwi wɔ lokpere ne, be ɔso kuwɛ̃ na ɔ̃atɔrã?

Wũ kɔrɔ̃ ne kufe ikurukutu sɔ kuibawo kuso ɔtã i fɔ iti?

Ɔle nna me sɔ loibawo-ɔ ɔɖi?

Gɔ lonyagɛ̃ kere lotã ɔpo ɔsɔ̃.

Nsɛ lokpesera siwore fufuĩ ame;

sɛ̃ afara ɔbu ala ndu na ɔso

fiɛ makpi ala kutukã iti.

3 Losu idududu loku kuɖokpo lɛ arapia awe,

fiɛ losu ipundukoto lofu kɔ̃."

4 Bosate Wɔ Nsiguso ɔsu rasuãdze ɔnyagɛmi ɔtã me,

sɔ loatsue itɔ̃me nɛ nsɛ ipia mma iɔɖa ɔle.

Ɔsɛ ɔtara me ku kaya biara,

ɔsɛ ɔtara wũ atsue sɔ lonɔ ara lɛ nwɔ mato mate ara awe.

5 Bosate Wɔ Nsiguso ɔɔbusi me atsue,

fiɛ loita loya-ɔ iso,

loikɛlɛ kama.

6 Lonyua wũ kama lotã mma lopɛ me.

Lofirikira arɛkpo lotã mma lokpadzɛ̃ wũ ɔkore.

Loikɔla wũ katɔ̃

gɔ mabara me aɣiãra fiɛ matua sinyatu mafere me.

7 Alasɔ Bosate Wɔ Nsiguso nsɛ ɔbuai me,

loibaɖe kunuarɛ.

Ne ɔso loɔtã wũ katɔ̃ ɔbo ɔle lɛ ita nɛ mba ɔle ku ɔbe awe,

fiɛ loɣe sɔ kunuarɛ iibakpɛ̃ me.

8 Ɔ̃ wɔ nsɛ ɔte sɔ loiɣɛrɛ ɔɔbore ɔbo.

Nna loawo itɔ̃me ɔbara me?

Mitã boya anɔ ku anɔ!

Nna nɖe nwɔ losu itɔ̃me i wũ iso?

Mitã ɔbɔ itɔ̃me i wũ iso!

9 Bosate Wɔ Nsiguso nsɛ ɔbuai me iso.

Nna loatã me ipɔ?

Ma ɔɖuɖu to maabɛ lɛ kumɛgɔ i arapia sɛ abɛ;

makorokpɛ to maaɖe ma lɛ kumɛgɔ makorokpɛ sɛ maɖe ɔkati awe.

10 Nna nsɛ ɔnigã Bosate i mi ndɛ̃,

fiɛ ɔsɛ ɔbara i Ɣaa ɔɖabo itɔ̃me iso?

Mitã nwɔ nsɛ ɔsɛ i idududu ame,

nwɔ nna ɔtɔ,

si ɔsiaiti i Bosate iyere iso

si ɔpiɛtɛ i ɔ̃ Ɣaa iso.

11 Ɣɛɛ kiniɔ ne, mi ma ɔɖuɖu nsɛ mitsue sitɔ

fiɛ misɛ mibie kaka mɔɛã sitɔ mitã so,

mikɛlɛ, misɛ i mi sitɔ ame

gu kuka gɔ mitsue sitɔ mito.

Nnɛgbe miana mibɔrɛgu i wũ kɔrɔ̃ ame ne:

Miakɛlɛ mirɛ i amumuɣɔ ame.