YESAYA 47

Babilon Ɔkpase

1 Bosate sɔ, "Bɔdzo, si asɛ i sise ame,

Babilon Ɔbibirɔ̃gomi wɔ loiɣe ɔrɛrɛ̃.

Sɛ i karɔ̃ gɔ sigaraiyara siina-ɔ,

ma Babiloniase Ɔbibirɔ̃gomi.

Maisibarɔ-ɔ sɔ aɖe ɔbitɛ

wɔ loɣɔ ɔto ɔlɛnyɔ kuiyikuiyi.

2 Su kukɔtɛ si akɔtɛ geɖebu;

ɖi fɔ kudza.

Ɖi fɔ kayirinɔ awu, si abɛ ara aɖi fɔ ngba iso,

si asɛ aki i kuworei ame.

3 Mato maaɖi-ɔ isɔ̃

fiɛ fɔ kunuarɛ aase kpawee.

Loabara-ɔ lotikuso

loibanyɔ kuwɛ̃ nnya."

4 Bo Ɖidze, nwɔ iyere nɖe Bosate Ɔlesate -

nɖe Israel Ɔsekelea ne.

5 "Sɛ kpoo si alokanana, si akɛlɛ i idududu ame,

ma Babiloniase Ɔbibirɔ̃gomi.

Maisibakpere-ɔ sɔ

sigarakuɖekɔ̃ igararɔ̃go kuiyikuiyi.

6 Lonagu wũ maturi sikpã

ne lopukutura wũ kaɖekɔ̃ ne.

Losu ma lopia-ɔ i nrɔɔ̃ ame,

fiɛ aibara ma kayiribielea.

Mma loɔbe kɔraa

asorera ma ato wa mba ɔrɔrã.

7 Aɣɛ sɔ, 'Loaɖeiso ɔwi daaro -

lɛ igararɔ̃go!'

Ɣɛɛ aibu iti ame i ara wagbe iso

ɣee adzuĩ irere nɛ loawo ɔba.

8 "Kiniɔ ne, kã atsue, fɔ wɔ nsɛ aɖɔɛ isoɣɔ iɖe,

asɛ aɖe kayi gɔ apia fala fiɛ ato anyɔ sɔ apia i kaɣɔ ame.

Asɛ aɣere so sɔ,

"Mme nɖe wũ ne, kuwɛ̃ siina i wũ kama.

Loibakpese kpisere kuiyikuiyi

ɣee mabi iibakpi me iso.'

9 Ɣɛɛ ara aka anyɔ wagbe to aaba-ɔ

iso ɔluwɛ̃ i anɔmiikpa iwɛ̃ ame ku iyi iwɛ̃:

Mabi aakpi-ɔ iso fiɛ aakpese kpisere.

Ara wagbe to aaba-ɔ iso, aanya wã fiɛ iapɛgu-ɔ,

atoasɔ fɔ kabuɛ gbodzoo

gu kanyaipia ara ku ɔle ɔyi-ɔ iso.

10 Afɔ so aɖe i fɔ ɔtile ame

fiɛ aɣɛ sɔ, 'Kuwɛ̃ iisɛ ɔnya me.'

Fɔ iwola gu inɔkpa ɔkɔ-ɔ ayura

gɔ aɣere so sɔ,

'Mme nɖe wũ ne, fiɛ kuwɛ̃ siina ɔbua me iso.'

11 Kukpakpi to kuaba-ɔ iso,

fiɛ aibawo kɔ̃ kanya ɔpia ɔɖi.

Itɔ̃me nyanyariã to iaba-ɔ iso

gɔ aibawo mmusuo ɔyi asu aɖi ne.

Ara iwɔ nɛ aibawo ɔnya

to iaba-ɔ iso ɔluwɛ̃.

12 "Kɛlɛ i katɔ̃ si abara fɔ kanyaipia ara

gu fɔ kabuɛ gbodzoo,

nwa iso ɔɔbara karabara ta fɔ sibiɛtɛ ame.

Siainyɔ ato aana isaruɛ i ne ame.

Siainyɔ ato aasu wã apia ɔturi ifɔ̃.

13 So kere loɔtu-ɔ i kuka ɔɖuɖu gɔ ɔɔfɔ iti!

Mitã mma nɣe ɔwiri gu kato iso ara ame si mafɔ mi,

mma nsɛ manyɔ awãmi fiɛ masɛ maɣɛ ara masɛ ku kuwa ɖaa.

Mitã maɖi mi i ara wa nto aaba i mi iso ame.

14 Gbaã ne mase lɛ sikua korea awe;

ɔtɔ to ɔ̃atsuedza ma.

Maibawo ma mɔmɔ ɔɖi kɔraa

ɔbɔrɛgu i ɔtɔ itsue ɔle ame.

Atɔgirĩ wa lomɔɛ̃ ato kuawɛ̃ na i ngbe gɔ ɔturi aawa ɔtɔ;

ɔtɔ kuwɛ̃ na i ngbe ɔturi aasɛ i ɔ̃ kɔrɛ.

15 Ngbɔ i maturi ma nsɛ manyɔ awãmi, mma apiagu kubɛ -

fiɛ mi gu ma ɔɔɖe kuɣa ta sibiɛtɛ ame

aaba maakpese matã-ɔ ne.

Ɔbiara sɛ ɔkɛlɛ katɔ̃ i ɔ̃ iɣɛrɛ ame.

Kuwɛ̃ pɛ na ɔ̃afɔ-ɔ.